കൊവിഡ് മഹാമാരിയ്ക്കിടെ മഴക്കെടുതിയും സംസ്ഥാനത്തെ ജനജീവിതം ദുസഹമാക്കിയിരിക്കുകയാണ്. വടക്കന്‍ ജില്ലകളിലും ഇടുക്കി ഉള്‍പ്പെടെയുള്ള ഹൈറേഞ്ച് ജില്ലകളിലും ആണ് വന്‍നാശനഷ്ടങ്ങൾ ഉണ്ടായിരിക്കുന്നത്. വിവിധയിടങ്ങളില്‍ രാത്രി പുഴകള്‍ കരകവിഞ്ഞൊഴുകി. സംസ്ഥാനത്ത് വരും ദിവസങ്ങളില്‍ അതിതീവ്ര മഴയ്ക്ക് സാധ്യതയുണ്ടെന്നും അറിയിപ്പുണ്ട്.

അതേസമയം മഴ നാലു ദിവസം കൂടി തുടരുമെന്നതിനാല്‍ ജാഗ്രത പാലിക്കണമെന്നും അധികൃതര്‍ അറിയിച്ചു. കേരളം ഉള്‍പ്പെടെയുള്ള ആറ് സംസ്ഥാനങ്ങള്‍ക്ക് ദേശീയ ജല കമ്മീഷന്‍ പ്രളയ മുന്നറിയിപ്പും നല്‍കിയിട്ടുണ്ട്.

മഴ തുടരുന്നതിനിടെ വിവിധയിടങ്ങളിൽ ഉരുൾ പൊട്ടലുണ്ടായിട്ടുണ്ട്. ഇടുക്കിയിൽ പീരുമേട്ടിലും,മേലെ ചിന്നാറിലും കോഴിക്കോട് വിലങ്ങാട് മലയിലും ഉരുൾപൊട്ടലുണ്ടായത്. പീരുമേട്ടിൽ മൂന്നിടത്താണ് ഉരുൾ പൊട്ടിയത്. ഇതോടെ തൂവൽ,പെരിഞ്ചാംകുട്ടി, മേലെ ചിന്നാർ മേഖലകളിൽ അധികൃതർ ജാഗ്രത നിർദേശം നൽകി.

വെള്ളം ഉയർന്നതോടെ കല്ലാർകുടി, ലോവർ പെരിയാർ ഡാമുകളുടെ എല്ലാ ഷട്ടറുകളും തുറന്നിട്ടുണ്ട്. പെരിയാറിൽ ജലനിരപ്പ് വീണ്ടും ഉയരുകയാണ്. ഏലൂരിലെ 32 കുടുംബങ്ങളെ മാറ്റിപ്പാർപ്പിച്ചു. പൊന്മുടി ഡാമിന്റെയും ഷട്ടറുകൾ തുറന്നു. പത്തനംതിട്ട മൂഴിയാർ അണക്കെട്ടിന്റെ മൂന്ന് ഷട്ടറുകൾ തുറന്നു. കബനി നദി കരകവിഞ്ഞ് വീടുകളിൽ വെള്ളം കയറി. നിലമ്പൂർ ചാലിയാർ പുഴയിൽ. മലവെള്ളപ്പാച്ചിലുണ്ടായതിനെത്തുടന്ന് നിലമ്പൂരിൽ വെള്ളം കയറി. നിലമ്പൂർ-ഗൂഡല്ലൂർ പാതയിലെ ഗതാഗതവും തടസപ്പെട്ടു.

ഇതിനിടെ ഇടുക്കിയില്‍ മലവെള്ളപ്പാച്ചിലില്‍ ഒലിച്ചുപോയ കാറിലുണ്ടായിരുന്ന ഒരാളുടെ മൃതദേഹം ലഭിച്ചു. തല്ലതണ്ണി സ്വദേശി മാര്‍ട്ടിന്റെ മൃതദേഹമാണ് ലഭിച്ചത്. കാറിലുണ്ടായിരുന്ന അനീഷിനായി തെരച്ചില്‍ തുടരുകയാണ്. തല്ലതണ്ണിയില്‍ ഉരുള്‍പൊട്ടലിനെ തുടര്‍ന്നുണ്ടായ മലവെള്ളപ്പാച്ചിലില്‍ പാലത്തില്‍ നിന്ന് കാര്‍ ഒലിച്ചുപോകുകയായിരുന്നു. ഏലപ്പാറ- വാഗമണ്‍ റോഡിലെ നല്ലതണ്ണി പാലത്തില്‍ വ്യാഴാഴ്ച രാത്രി എട്ടോടെയാണ് സംഭവം ഉണ്ടായത്.

അതേസമയം മഴ കനക്കുന്ന സാഹചര്യത്തിൽ മലപ്പുറത്ത് ഇന്ന് റെഡ് അലർട്ട് പ്രഖ്യാപിച്ചിട്ടുണ്ട്. എറണാകുളം മുതൽ വടക്കോട്ട് കാസർകോട് വരെ എട്ടു ജില്ലകളിൽ ഓറഞ്ച് അലർട്ടും കോട്ടയം, ആലപ്പുഴ ജില്ലകളിൽ യെല്ലോ അലർട്ടും പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട ജില്ലകളിൽ ഇന്ന് ഒറ്റപ്പെട്ട സ്ഥലങ്ങളിൽ മഴയുണ്ടാകും. നാളെ തിരുവനന്തപുരം,​ കൊല്ലം ജില്ലകളിൽ യെല്ലോ അലർട്ടും മറ്റു ജില്ലകളിലും ഓറഞ്ച് അലർട്ടും പ്രഖ്യാപിച്ചിട്ടുണ്ട്.

ദുരിതാശ്വാസ ക്യാമ്പുകളിലേക്ക് മാറേണ്ട സാഹചര്യമുണ്ടായാൽ കൊവിഡ് മാനദണ്ഡങ്ങൾ പാലിക്കണമെന്ന് സർക്കാർ അറിയിച്ചു. ക്വാറന്റീനിൽ കഴിയുന്നവർ, രോഗലക്ഷണമുള്ളവർ, കൊവിഡ് മൂലം കൂടുതൽ അപകടസാദ്ധ്യതയുള്ളവർ, സാധാരണ ജനങ്ങൾ എന്നിങ്ങനെ നാലു വിഭാഗങ്ങളായി ക്യാമ്പുകൾ സജ്ജമാക്കാൻ ജില്ലാ ഭരണകൂടങ്ങൾക്ക് സർക്കാർ നിർദ്ദേശം നൽകി. കേരളതീരത്ത് ശക്തമായ കാറ്റിന് സാദ്ധ്യതയുണ്ടെന്നും മുന്നറിയിപ്പുണ്ട്.