മഞ്ഞപ്രയില്‍ വൃദ്ധദമ്പതികളെ അയല്‍വാസി വെട്ടിപ്പരിക്കേല്‍പ്പിച്ചതായി പരാതി.സംഭവത്തില്‍ അയല്‍വാസിയായ ജോസിനെ പൊലീസ് അറസ്റ്റുചെയ്തു. ഉതുപ്പ്, അന്നമ്മ എന്നി വൃദ്ധദമ്പതികള്‍ക്കാണ് പരിക്കേറ്റത്. ഇന്ന് രാവിലെ പത്തരയോടെയായിരുന്നു സംഭവം. വൃദ്ധദമ്പതികളുടെ വീട്ടില്‍നിന്ന് കൃഷിക്ക് മരുന്ന് തളിക്കുന്ന ഒരു ഉപകരണം നഷ്ടപ്പെട്ടിരുന്നു. ഇത് പ്രതിയായ ജോസ് എടുത്തുകൊണ്ടുപോയെന്നായിരുന്നു ഉതുപ്പ് കരുതിയത്. തുടര്‍ന്ന് ഉതുപ്പ് ജോസിനെ ചോദ്യംചെയ്തു. പിന്നാലെ ഇരുവരും തമ്മില്‍ വാക്കുതര്‍ക്കമുണ്ടാകുകയായിരുന്നു.

ഇതിനിടെ പ്രകോപിതനായ ജോസ് കയ്യിലുണ്ടായിരുന്ന വാക്കത്തി ഉപയോഗിച്ച് ഉതുപ്പിനെയും അന്നമ്മയെയും വെട്ടിപ്പരിക്കേല്‍പ്പിക്കുകയായിരുന്നു. സംഭവമറിഞ്ഞ് സ്ഥലത്തെത്തിയ നാട്ടുകാരാണ് ഇരുവരെയും ആശുപത്രിയിലെത്തിച്ചത്. ആക്രമണത്തില്‍ തലയ്ക്ക് ഗുരുതരമായി പരിക്കേറ്റ ഇരുവരും അങ്കമാലി താലൂക്ക് ആശുപത്രിയില്‍ ചികിത്സയിലാണ്. കസ്റ്റഡിയിലെടുത്ത ജോസിനെ ചോദ്യംചെയ്തുവരികയാണെന്ന് പൊലീസ് വ്യക്തമാക്കി.