അറബിക്കടലിലും ബംഗാള്‍ ഉള്‍ക്കടലിലും ന്യൂനമര്‍ദം രൂപപ്പെട്ടതോടെ സംസ്ഥാനത്ത് മഴ ശക്തമാകാന്‍ സാദ്ധ്യത. ഒക്ടോബര്‍ 23, 24, 25 തീയതികളില്‍ കേരളത്തില്‍. ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്കും അതിശക്തമായ മഴയ്ക്കും സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഒക്ടോബര്‍ 23 മുതല്‍ 26 വരെ ഇടിമിന്നലോടുകൂടിയ മഴയ്ക്കും മണിക്കൂറില്‍ 30 മുതല്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാദ്ധ്യതയുണ്ട്.

തെക്കുകിഴക്കന്‍ അറബിക്കടലിലും അതിനോട് ചേര്‍ന്ന ലക്ഷദ്വീപ് മേഖലയിലുമായി ന്യൂനമര്‍ദം സ്ഥിതിചെയ്യുന്നുണ്ട്. ഇതുമായി ബന്ധപ്പെട്ട ചക്രവാതച്ചുഴിയില്‍നിന്ന് കേരളത്തിലൂടെ വടക്കന്‍ തമിഴ്‌നാട് തീരം വരെ ന്യൂനമര്‍ദ പാത്തിയും രൂപപ്പെട്ടിട്ടുണ്ട്. ഇതിന്റെ സ്വാധീനത്തിലാണ് കേരളത്തില്‍ ശക്തമായ മഴയ്ക്ക് സാദ്ധ്യതയുള്ളത്.

തെക്കുകിഴക്കന്‍ ബംഗാള്‍ ഉള്‍ക്കടലിലും സമീപ മദ്ധ്യകിഴക്കന്‍ ബംഗാള്‍ ഉള്‍ക്കടലിലുമായി പുതിയ ന്യൂനമര്‍ദം രൂപപ്പെട്ടിട്ടുണ്ട്. ഇത് നാളെയോടെ തീവ്ര ന്യൂനമര്‍ദമായി ശക്തിപ്രാപിക്കാനാണ് സാദ്ധ്യത. തുടര്‍ന്ന് പടിഞ്ഞാറ്‌വടക്കുപടിഞ്ഞാറന്‍ ദിശയില്‍ നീങ്ങുന്ന ന്യൂനമര്‍ദം ഒക്ടോബര്‍ 25ന് അതിതീവ്ര ന്യൂനമര്‍ദമായി മാറിയേക്കും.

ഒക്ടോബര്‍ 26ന് രാവിലെ മദ്ധ്യപടിഞ്ഞാറന്‍ ബംഗാള്‍ ഉള്‍ക്കടലില്‍ ചുഴലിക്കാറ്റായി ശക്തിപ്രാപിക്കാനും സാദ്ധ്യതയുണ്ടെന്നാണ് കാലാവസ്ഥാ നിരീക്ഷണം വ്യക്തമാക്കി. തുടര്‍ന്നുള്ള രണ്ട് ദിവസങ്ങളില്‍ കൂടുതല്‍ ശക്തിപ്രാപിച്ച് പടിഞ്ഞാറ്‌വടക്കുപടിഞ്ഞാറന്‍ ദിശയില്‍ നീങ്ങുന്ന ചുഴലിക്കാറ്റ് വടക്കന്‍ ആന്ധ്രാപ്രദേശ് തീരത്തേക്കും അതിനോട് ചേര്‍ന്ന തെക്കന്‍ ഒഡിഷ തീരത്തേക്കും നീങ്ങാനാണ് സാദ്ധ്യത.