വയലിനിസ്റ്റ് ബാലഭാസ്കറിന്റെ മരണവുമായി ബന്ധപ്പെട്ട് ബാലഭാസ്കറിന്റെ മാനേജര് വിഷ്ണു സോമസുന്ദരത്തേയും കലാഭവന് സോബിയെയും നുണപരിശോധനയ്ക്ക് വിധേയമാക്കി
വയലിനിസ്റ്റ് ബാലഭാസ്കറിന്റെ മരണവുമായി ബന്ധപ്പെട്ട് രണ്ടുപേരെ ഇന്നലെ നുണപരിശോധനയ്ക്ക് വിധേയമാക്കി. ബാലഭാസ്കറിന്റെ മാനേജര് വിഷ്ണു സോമസുന്ദരം, സംഭവത്തിന്റെ ദൃക്സാക്ഷിയെന്ന അവകാശവാദമുന്നയിച്ച് രംഗത്തുവന്ന കലാഭവന് സോബി എന്നിവരുടെ നുണപരിശോധനയാണു നടത്തിയത്. കഴിഞ്ഞ ദിവസം ബാലഭാസ്കറുടെ ഡ്രൈവര് അര്ജുന്, മറ്റൊരു മാനേജറായിരുന്ന പ്രകാശ് തമ്പി എന്നിവരുടെ നുണപരിശോധന നടത്തിയിരുന്നു.ബാലഭാസ്കറിന്റെ അപകടമരണത്തില് ദുരൂഹതയുള്ളതായി കലാഭവന് സോബി വെളിപ്പെടുത്തിയതാണ് നുണപരിശോധന നടത്താന് സി.ബി.ഐയെ പ്രേരിപ്പിച്ചത്.
സോബിയെ സംഭവം നടന്ന സ്ഥലത്തെത്തിച്ച് സി.ബി.ഐ. മൊഴിയെടുത്തിരുന്നു. സംഭവത്തിനു പിന്നില് സ്വര്ണക്കടത്തുകാരാണെന്നും സോബി ആരോപിച്ചിരുന്നു. സോബിയുടെ മൊഴികള് വിശ്വസനീയമാണെന്നതില് സി.ബി.ഐ. സംശയം പ്രകടിപ്പിച്ചിരുന്നു. ഇതേ തുടര്ന്നാണ് നുണപരിശോധന നടത്താന് തീരുമാനിച്ചത്.
വിഷ്ണു സോമസുന്ദരം പിന്നീട് സ്വര്ണക്കടത്തുകേസുമായി ബന്ധപ്പെട്ടുവെന്ന സൂചനകളാണ് കേസില് വഴിത്തിരിവു സൃഷ്ടിച്ചത്. ബാലഭാസ്കറിന്റെ ഇടപാടുകള്, സ്വത്തുവിവരങ്ങള് എന്നിവയും അന്വേഷണപരിധിയില് ഉണ്ട്. ബാലഭാസ്കറിനെ അപായപ്പെടുത്തുംവിധം എന്തെങ്കിലും സംഭവങ്ങള് നടന്നോ എന്നും സി.ബി.ഐ. അന്വേഷിക്കുന്നുണ്ട്. ബാലഭാസ്കറിനൊപ്പം നിന്നവര് അദ്ദേഹത്തെ സ്വര്ണക്കടത്തിന് ദുരുപയോഗിച്ചോയെന്നും അന്വേഷിക്കുന്നുണ്ട്.
"
https://www.facebook.com/Malayalivartha
