കടയ്ക്കലില്‍ മാനസിക വെല്ലുവിളി നേരിടുന്ന യുവതിയെ തട്ടിക്കൊണ്ടു പോയി ലൈംഗികമായി പീഡിപ്പിച്ച കേസില്‍ പ്രതി അറസ്റ്റില്‍. ആറ്റിങ്ങല്‍ സ്വദേശി ചന്ദ്രദാസാണ് അറസ്റ്റിലായത്. യുവതിയെ വിവാഹം കഴിച്ചെന്ന് നാട്ടുകാരെ തെറ്റിദ്ധരിപ്പിച്ചായിരുന്നു ഇയാള്‍ പീഡനത്തിന് ഇരയാക്കിയത്. മാനസിക വെല്ലുവിളി നേരിടുന്ന മുപ്പത്തിയഞ്ചുകാരിയായ യുവതിയെ കഴിഞ്ഞ മാസം 23നാണ് കാണാതായത്. തുടര്‍ന്ന് യുവതിയുടെ അമ്മ പോലീസില്‍ പരാതി നല്‍കുകയായിരുന്നു. ദിവസങ്ങള്‍ നീണ്ട അന്വേഷണത്തിനൊടുവിലാണ് കുളത്തൂപ്പുഴയ്ക്കടുത്ത് ചതുപ്പ് എന്ന സ്ഥലത്ത് നിന്ന് ഇന്നലെ യുവതിയെ പോലീസ് കണ്ടെത്തിയത്. സിസിടിവി ദൃശ്യങ്ങളടക്കം കേന്ദ്രീകരിച്ച്‌ നടത്തിയ അന്വേഷണത്തിലാണ് മേഖലയിലെ ആക്രിക്കച്ചവടക്കാരനായ ചന്ദ്രദാസാണ് യുവതിയെ കൊണ്ടുപോയതെന്ന് വ്യക്തമായതും ചന്ദ്രദാസിനെ കണ്ടെത്തി അറസ്റ്റ് ചെയ്തതും. കോടതിയില്‍ ഹാജരാക്കിയ ചന്ദ്രദാസിനെ റിമാന്‍ഡ് ചെയ്തു.