കാലിക്കറ്റ് സര്വകലാശാല: പുതുതായി പ്രഖ്യാപിച്ച ന്യൂജനറേഷന് കോഴ്സുകളുടെ സിലബസ് കോളജുകളില് തയാറാക്കാന് നിര്ദേശം
പുതുതായി പ്രഖ്യാപിച്ച ന്യൂജനറേഷന് കോഴ്സുകളുടെ സിലബസ് കോളജുകള് തയാറാക്കി സര്വകലാശാലയിലെ അക്കാദമിക് വിഭാഗത്തിനു സമര്പ്പിക്കണമെന്ന കാലിക്കറ്റ് സര്വകലാശാലയുടെ ഉത്തരവ് വിവാദമാകുന്നു. തങ്ങള്ക്ക് അനുവദിച്ച കോഴ്സുകളുടെ സിലബസ് സ്വയം തയാറാക്കാനാണ് കോളജുകളോട് ആവശ്യപ്പെട്ടത്.
പഠനവകുപ്പുകള് ആണ് സിലബസുകള് തയാറാക്കേണ്ടത് എന്നിരിക്കെ സര്വകലാശാല ചട്ടങ്ങളുടെ ലംഘനമാണ് പുതിയ ഉത്തരവ്. എന്നാല്, പുതിയ കോഴ്സുകളുമായി ബന്ധപ്പെട്ടുള്ള കരടു സിലബസ് മാത്രമാണ് കോളജുകളില് നിന്ന് ആവശ്യപ്പെട്ടതെന്നും ഉത്തരവ് തയാറാക്കിയതില് തെറ്റു സംഭവിച്ചെന്നുമാണ് സര്വകലാശാലയുടെ വിശദീകരണം.
സാധാരണയായി സര്വകലാശാലാ പഠന വകുപ്പുകള് തയാറാക്കുന്ന സിലബസുകള് പിന്നീട് ഫാക്കല്റ്റിയും അക്കാദമിക് കൗണ്സിലും അംഗീകരിച്ചതിനുശേഷമാണ് പ്രാബല്യത്തിലാകുന്നത്. എന്നാല്, സര്ക്കാര് പുതുതായി പ്രഖ്യാപിച്ച ന്യൂജനറേഷന് കോഴ്സുകള്ക്കുള്ള പഠനവകുപ്പുകള് സര്വകലാശാലകളില് നിലവില് വന്നിട്ടില്ല.
ഈ പശ്ചാത്തലത്തിലാണ് കോളജുകളില് നിന്നു നേരിട്ട് സിലബസ് ആവശ്യപ്പെട്ട് തിടുക്കത്തില് കോഴ്സുകള് ആരംഭിക്കുന്നതിനുള്ള നീക്കം നടക്കുന്നത്. കോളജുകളില് നിന്നു ലഭിക്കുന്ന സിലബസുകള് നവംബര് 15-ന് അകം അക്കാദമിക് കൗണ്സിലില് എത്തിച്ച് അംഗീകാരം തേടണമെന്നും ഉത്തരവില് പറയുന്നു.
ബിരുദ, ബിരുദാനന്തര വിഭാഗങ്ങളിലായി കാലിക്കറ്റ് സര്വകലാശാലയ്ക്ക് കീഴിലുള്ള കോളജുകളില് 62 ന്യൂജന് കോഴ്സുകള് അനുവദിച്ച് കഴിഞ്ഞദിവസം സര്ക്കാര് ഉത്തരവിറങ്ങിയിരുന്നു. കാലിക്കറ്റിലെ 23 സര്ക്കാര് കോളജുകള്ക്കും 36 എയ്ഡഡ് കോളജുകള്ക്കും പുതിയ കോഴ്സുകള് ലഭിച്ചിട്ടുണ്ട്.
https://www.facebook.com/Malayalivartha
