മലപ്പുറം ജില്ലയിലെ എംഎസ്പിയിലെ സെന്‍ട്രല്‍ പൊലീസ് കന്റീനില്‍ നിന്ന് മൊബൈല്‍ ഫോണുകള്‍ മോഷ്ടിച്ച താല്‍ക്കാലിക ജീവനക്കാരന്‍ പിടിയില്‍.

കന്റീനില്‍ വില്‍പനയ്ക്കു വച്ചിരുന്ന വിവിധ കമ്പനികളുടെ 117 മൊബൈല്‍ ഫോണുകളാണ് പല തവണകളായി മോഷ്ടിച്ച് നഗരത്തിലെ സ്വകാര്യ കടകളില്‍ വില്‍പന നടത്തിയിരുന്നത്.

മലപ്പുറം മേല്‍മുറി സ്വദേശി കൂട്ടംപള്ളി ഷൈജുവാണ്(47) മലപ്പുറം പൊലീസ് പിടിയിലായത്.

കന്റീന്‍ മാനേജരുടെ പരാതിയിലാണ് പൊലീസ് കേസെടുത്ത് പ്രതിയെ പിടികൂടിയത്. ഏകദേശം 16 ലക്ഷത്തോളം രൂപ മോഷണത്തിലൂടെ സമ്പാദിച്ചതായി പൊലീസ് പറഞ്ഞു. കന്റീനിലെ ഇന്റേണല്‍ ഓഡിറ്റിങ്ങിലാണ് മോഷണം പിടിക്കപ്പെട്ടത്.

മലപ്പുറം ഫസ്റ്റ് ക്ലാസ് മജിസ്‌ട്രേട്ട് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.