ശബരിമലയില്‍ യുവതികളെ കയറ്റാനുള്ള ശ്രമങ്ങള്‍ക്ക് ശക്തമായ തിരിച്ചടി നേരിട്ടതോടെ ഇപ്പോള്‍ സര്‍ക്കാരും പാര്‍ട്ടിയും പൂര്‍ണമായും അതില്‍ നിന്നും പിന്മാറുകയാണ്. യുവതികളെ തടയാന്‍ കര്‍മ്മസമിതി പ്രവര്‍ത്തകരോ കെ. സുരേന്ദ്രനോ ഒന്നും വേണ്ട. സര്‍ക്കാര്‍ തന്നെ അതിനുള്ള വഴി അടിച്ചിരിക്കുകയാണ്.

50 വയസില്‍ താഴെയുള്ള സ്ത്രീകള്‍ക്ക് ശബരിമല ദര്‍ശനത്തിന് അവസരമില്ലെന്ന് വ്യക്തമാക്കി പുതുക്കിയ വെര്‍ച്വല്‍ ക്യൂ ബുക്കിങ്. ദര്‍ശനത്തിന് അവസരം ലഭിക്കുന്നവരുടെ എണ്ണം വര്‍ധിപ്പിച്ചതിനെത്തുടര്‍ന്ന് ബുധനാഴ്ച വൈകിട്ട് 5ന് ആണ് പുതിയ വെര്‍ച്വല്‍ ക്യൂ ബുക്കിങ് തുടങ്ങിയത്. ദര്‍ശനത്തിന് ബുക്ക് ചെയ്യാനുള്ള നിര്‍ദേശത്തിലാണ് നിലപാട് മാറ്റം വ്യക്തമാക്കുന്നത്.

സുപ്രീം കോടതി വിധിക്കു പിന്നാലെ യുവതികളെ ശബരിമലയില്‍ പ്രവേശിപ്പിക്കാന്‍ സര്‍ക്കാര്‍ നടത്തിയ നീക്കത്തിനെതിരെ വന്‍ പ്രതിഷേധം ഉയര്‍ന്നിരുന്നു. പിന്നീട് ആദ്യമായാണ് 50 വയസ്സിനു താഴെയുള്ള സ്ത്രീകള്‍ക്ക് ദര്‍ശനം അനുവദിക്കില്ലെന്ന് ഔദ്യോഗികമായി പറയുന്നത്.

കോവിഡിന്റെ പശ്ചാത്തലത്തില്‍ 65 വയസ്സിനു മുകളിലുള്ളവര്‍ക്കും 10 വയസില്‍ താഴെയുള്ള കുട്ടികള്‍ക്കും ദര്‍ശനം അനുവദിക്കില്ലെന്നും പുതിയ നിര്‍ദേശത്തിലുണ്ട്. ഇന്നലെ മുതല്‍ ജനുവരി 19 വരെയുള്ള ദിവസങ്ങളില്‍ 44,000 പേര്‍ക്കായിരുന്നു ദര്‍ശനത്തിന് ബുക്ക് ചെയ്യാന്‍ അവസരം.

ശബരിമല യുവതീ പ്രവേശനവുമായി ബന്ധപ്പെട്ട സുപ്രീം കോടതി വിധിയും അനുബന്ധ വിഷയങ്ങളും വിശദ പരിശോധനയ്ക്കായി വിശാല ബെഞ്ചിന് വിടാന്‍ കോടതി തന്നെ നിര്‍ദ്ദേശിച്ചിട്ടുണ്ടെങ്കിലും കേരള സര്‍ക്കാര്‍ ഔദ്യോഗികമായി തീരുമാനം അറിയിച്ചിട്ടില്ല. കോടതി നിര്‍ദ്ദേശത്തിനു ശേഷം യുവതികളെ പോലീസ് തന്നെ തിരിച്ചയക്കുമെങ്കിലും ഇത് സംബന്ധിച്ച് ഔദ്യോഗികമായി അറിയിപ്പ് നല്‍കിയിരുന്നില്ല. ഇതാദ്യമായാണ് യുവതീ പ്രവേശന വിലക്ക് പൊലീസിന്റെ ഔദ്യോഗിക നിര്‍ദ്ദേശത്തില്‍ ഇടം പിടിച്ചത്.

അതേസമയം ശബരിമലയില്‍ ഇന്ന് മുതല്‍ കൂടുതല്‍ തീര്‍ത്ഥാടകരെ ദര്‍ശനത്തിന് അനുവദിക്കും. ഇന്ന് 12 മണി മുതലാണ് വെര്‍ച്വല്‍ ക്യൂ ബുക്കിംഗ് ആരംഭിക്കുക. ആയിരത്തില്‍ നിന്ന് രണ്ടായിരമാക്കിയാണ് തീര്‍ത്ഥാടകരുടെ എണ്ണം ഉയര്‍ത്തിയത്. ഭക്തരുടെ എണ്ണം കുറഞ്ഞതോടെ വരുമാനത്തിലും വലിയ ഇടിവാണ് ഉണ്ടായത്. ഇതേ തുടര്‍ന്നാണ് ഭക്തരുടെ എണ്ണം ഉയര്‍ത്താന്‍ ദേവസ്വം ബോര്‍ഡ് ആവശ്യപ്പെട്ടത്.

മണ്ഡലമകരവിളക്ക് കാലത്ത് ശബരിമലയില്‍ പ്രവേശിക്കാന്‍ കേരളത്തിലെ ചില യുവതികളായ ആക്റ്റിവിസ്റ്റുകള്‍ വിര്‍ച്വല്‍ ക്യൂ വെബ്‌സൈറ്റില്‍ രജിസ്റ്റര്‍ ചെയ്തതായി റിപ്പോര്‍ട്ടുകള്‍ വന്നത് ഏറെ ചര്‍ച്ചയായിരുന്നു. കഴിഞ്ഞ ലോക്‌സഭാ തെരഞ്ഞെടുപ്പില്‍ സിപിഎമ്മിനെ ഒരു സീറ്റില്‍ കൊണ്ടിത്തിച്ചത് ഈ ആക്ടിവിസ്റ്റുകളുടെ മല കയറ്റമാണ്. പരാജയമടഞ്ഞതോടെ പാര്‍ട്ടി വീടുകള്‍ കയറിയിറങ്ങി കാര്യങ്ങള്‍ വിശദീകരിച്ചു.

അന്ന് ശബരിമലയുടെ പേരില്‍ ജയിലില്‍ കിടന്ന കെ. സുരേന്ദ്രന്‍ ബിജെപി അധ്യക്ഷനാണ്. രാഷ്ട്രീയ വിവാദത്തില്‍പ്പെട്ട് തിരിച്ചുവരാന്‍ പാടുപെടുന്ന സര്‍ക്കാര്‍ വീണ്ടും ഭക്തര്‍ക്ക് നേരെ തിരിഞ്ഞാല്‍ അത് വരുന്ന നിയമസഭയില്‍ വലിയ തിരിച്ചടിയാകും. ബിജെപിയും കോണ്‍ഗ്രസും വലിയ ആയുധമാക്കും. അതിനാലാണ് ഈ തീരുമാനമെന്നാണ് പറയുന്നത്.