ബുറെവിയുടെ ആശങ്ക അവസാനിച്ചതായിയാണ് കാലാവസ്ഥ കേന്ദ്രം ഇപ്പോള്‍ അറിയിക്കുന്നത്. ബുറെവി മന്നാര്‍ കടലിടുക്കില്‍ നിശ്ചലമായി നില്‍ക്കുമ്പോള്‍, മുന്നൊരുക്കങ്ങളില്‍ വലഞ്ഞവര്‍ ചോദിക്കുന്ന ചോദ്യമുണ്ട്. കാലാവസ്ഥാ പ്രവചനം തെറ്റിയോ, അതോ മറ്റെന്തെങ്കിലും കാരണമുണ്ടോ? കേരളത്തെ ഏതെങ്കിലും തരത്തില്‍ ഇനിയിത് ബാധിക്കുമോ എന്നതിനും ഉത്തരം വേണ്ടതുണ്ട്. ചോദ്യങ്ങള്‍ക്കൊപ്പം നവമാധ്യമങ്ങളില്‍ രൂക്ഷവിമര്‍ശനവും കാലാവസ്ഥ പ്രവചനത്തിനെതിരെ ഉയരുന്നുണ്ട്.

നവംബര്‍ 30 മുതല്‍ കേരളത്തെയും തമിഴ്‌നാടിനെയും പേടിപ്പിച്ചു നിര്‍ത്തുകയായിരുന്നു ബുറെവി. ശ്രീലങ്കയും കടന്ന് മന്നാര്‍ കടലിടുക്കിലൂടെ തെക്കന്‍ തമിഴ്‌നാട്ടിലെത്തുന്ന ചുഴലിക്കാറ്റിന് മണിക്കൂറില്‍ 90 മുതല്‍ 100 കിലോമീറ്റര്‍ വേഗം കൈവരിക്കുമെന്നായിരുന്നു കാലാവസ്ഥാ മുന്നറിയിപ്പ്. ഡിസംബര്‍ മൂന്ന്, നാല് തീയതികളില്‍ കേരളത്തിലും ശക്തമായ കാറ്റും മഴയും ഉണ്ടാകുമെന്നായിരുന്നു പ്രവചനം. ചുഴലിക്കാറ്റ് തിരുവനന്തപുരം ജില്ലയിലൂടെ കടന്നുപോകുമെന്ന സഞ്ചാരപാതയും കേന്ദ്ര കാലാവസ്ഥാ വകുപ്പ് പുറത്തുവിട്ടു. എന്നാല്‍ ഇന്നലെ ഉച്ചയോടെ ഈ കണക്കുകൂട്ടലുകള്‍ മാറി.

ബുറെവി ചുഴലിക്കാറ്റ് അതി തീവ്ര ന്യൂനമര്‍ദമായി ശക്തി കുറയുമെന്നും ഇന്ന് ഉച്ചയോടെ കേരളം കടന്ന് അറബിക്കടലിലെത്തുമെന്നുമായി മുന്നറിയിപ്പ് മാറി. അഞ്ച് ജില്ലകളില്‍ റെഡ് അലര്‍ട്ട് വന്നതോടെ സര്‍ക്കാര്‍ മുന്‍കരുതല്‍ നടപടികളും ജാഗ്രതയും വര്‍ധിപ്പിച്ചു. പൊതു അവധിയും പ്രഖ്യാപിച്ചു. എന്നാല്‍ രാത്രിയോടെ കാര്യങ്ങള്‍ വീണ്ടും മാറിമറിഞ്ഞു. ബുറെവി വീണ്ടും ശക്തി കുറഞ്ഞ് ന്യൂനമര്‍ദമായി മാറും, കാറ്റിന്റെ വേഗത പരമാവധി മണിക്കൂറില്‍ 60 കിലോമീറ്റര്‍ വരെയെ ഉണ്ടാകൂ എന്ന അറിയിപ്പു വന്നു.

എന്നാല്‍ ഇന്ന് പുലര്‍ച്ചയോടെ ബുറെവി കടലില്‍തന്നെ നിലയുറപ്പിച്ചിരിക്കുകയാണെന്നും തെക്കന്‍ തമിഴ്‌നാട്ടിലേക്ക് പോലും കടന്നില്ലെന്നും കാലാവസ്ഥാ വകുപ്പ് അറിയിക്കുകയായിരുന്നു. കണക്കുകൂട്ടല്‍ തെറ്റിയത് കാലാവസ്ഥാ ശാസ്ത്രജ്ഞര്‍ക്കല്ല. പ്രവചനങ്ങള്‍ക്കപ്പുറം കാലാവസ്ഥ തന്നെ അപ്പാടെ മാറിമറിഞ്ഞതിന്റെ മികച്ച ഉദാഹരണമാകുകയാണ് ബുറെവി. ഏതായാലും 'കാറ്റ്' പോയ ബുറെവി കേരളത്തിന് ഭീഷണിയാകില്ലെന്നത് മാത്രമാണ് ആകെയുള്ള ആശ്വാസം.