ബുര്‍വി ചുഴലിക്കാറ്റ് ദുര്‍ബലമായതോടെ ആശങ്കയൊഴിഞ്ഞ് കേരളം. എന്നാല്‍, നാളെവരെ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കു സാധ്യതയെന്നു മുന്നറിയിപ്പ്. ചുഴലി ദുര്‍ബലമായതോടെ റെഡ് അലെര്‍ട്ട് പിന്‍വലിച്ചെങ്കിലും ജാഗ്രത തുടരുമെന്നു സര്‍ക്കാര്‍.
ഇന്നലെ രാവിലെ ശ്രീലങ്കയ്ക്കു സമീപം മാന്നാര്‍ കടലിടുക്കിലെത്തിയ അതിതീവ്രന്യൂനമര്‍ദം ഉച്ചയ്ക്കു തമിഴ്നാട് രാമനാഥപുരത്തിനു സമീപമെത്തി. അവിടെനിന്നു 40 കി.മീ, പാമ്പനില്‍നിന്ന് 70 കി.മീ, കന്യാകുമാരിയില്‍നിന്ന് 160 കി.മീ. വ്യാപ്തിയിലായിരുന്നു കാറ്റിന്റെ ഭ്രമണപഥം.

രാമനാഥപുരം, തൂത്തുക്കുടി ജില്ലകളിലൂടെ സഞ്ചരിച്ച് തീവ്രന്യൂനമര്‍ദം കൂടുതല്‍ ദുര്‍ബലമായി ന്യൂനമര്‍ദമായി മാറുമെന്നു കാലാവസ്ഥാവകുപ്പ് അറിയിച്ചു. കേന്ദ്ര കാലാവസ്ഥാവകുപ്പിന്റെ അറിയിപ്പുപ്രകാരം, കേരളത്തിലെത്തുന്നതിനു മുമ്പ് കാറ്റിന്റെ വേഗം 30-40 കിലോമീറ്ററായി കുറയും. കേരളത്തില്‍ ഒറ്റപ്പെട്ട, ശക്തമോ അതിശക്തമോ ആയ മഴയ്ക്കു സാധ്യതയുണ്ട്. തെക്കന്‍ കേരളത്തില്‍ 35-45 വരെ കി.മീ. വേഗത്തില്‍ കാറ്റുണ്ടായേക്കും. മത്സ്യബന്ധന നിരോധനം തുടരും.

സംസ്ഥാന ദുരന്തനിവാരണ അതോറിറ്റി അനുവദിക്കുന്നതുവരെ കേരളതീരത്തുനിന്ന് കടലില്‍ പോകരുത്. മുന്‍കരുതലിന്റെ ഭാഗമായി അടച്ച തിരുവനന്തപുരം വിമാനത്താവളം ഇന്നലെ വൈകിട്ട് നാലിനു തുറന്നു. ദുരിതാശ്വാസ ക്യാമ്പുകളില്‍ കഴിയുന്നവരെ സ്ഥിതിഗതികള്‍ വിലയിരുത്തിയശേഷം ഇന്നുമുതല്‍ തിരിച്ചയയ്ക്കും. ഓറഞ്ച്, യെലോ അലെര്‍ട്ടുള്ള ജില്ലകളിലെ താഴ്ന്നപ്രദേശങ്ങള്‍, നദീതീരങ്ങള്‍, മലയോരങ്ങള്‍ എന്നിവിടങ്ങളില്‍ അതീവജാഗ്രത തുടരണം. ഇടിമിന്നല്‍ ജാഗ്രതാനിര്‍ദേശം പാലിക്കണം.