കൊയിലാണ്ടിയില്‍ കീഴരിയൂര്‍ കണ്ണോത്ത് നിക്കാഹിനെത്തിയ വരന്റെയും സംഘത്തിന്റെയും കാര്‍ വധുവിന്റെ ബന്ധുക്കള്‍ തടഞ്ഞു നിര്‍ത്തി ആക്രമിച്ചു. വരനും സുഹൃത്തുക്കളായ മുഹമ്മദ് ഷാഫി, ഷബീര്‍ എന്നിവര്‍ക്കും പരുക്കേറ്റു. കൊയിലാണ്ടി പോലീസ് കേസ് രജിസ്റ്റര്‍ ചെയ്ത് അന്വേഷണം തുടങ്ങി. ആറുപേരാണ് ആക്രമം നടത്തിയത്. രണ്ട് പേരെ തിരിച്ചറിഞ്ഞിട്ടുണ്ട്. പ്രതികള്‍ ഒളിവിലാണ്.

വ്യാഴാഴ്ച വൈകിട്ടാണ് സംഭവം. നടേരി മഞ്ഞളാട്ട് കുന്നുമ്മല്‍ കിടഞ്ഞിയില്‍ മീത്തല്‍ കുഞ്ഞിമുഹമ്മദിന്റെ മകനായ മുഹമ്മദ് സാലിഹി(29)ന്റെ നിക്കാഹിനിടെയായിരുന്നു ആക്രമം. വടിവാള്‍ ഉപയോഗിച്ച് കാറിന്റെ ചില്ലുകള്‍ അടിച്ചു തകര്‍ത്ത ശേഷം മുഹമ്മദ് സാലിഹിനെ ആക്രമിക്കാനും ശ്രമമുണ്ടായി. കാര്‍ അതിവേഗം ഓടിച്ചു പോയതിനാലാണ് കൂടുതല്‍ അക്രമത്തില്‍ നിന്ന് രക്ഷപ്പെട്ടതെന്ന് ബന്ധുക്കള്‍ പറഞ്ഞു. പരുക്കേറ്റവര്‍ കൊയിലാണ്ടി താലൂക്കാശുപത്രിയില്‍ ചികില്‍സ തേടി.

കീഴരിയൂര്‍ സ്വദേശിയായ പെണ്‍കുട്ടിയുമായി മുഹമ്മദ് സാലിഹ് പ്രണയത്തിലായിരുന്നു. രണ്ടുമാസം മുമ്പ് ഇവരുടെ രജിസ്റ്റര്‍ വിവാഹവും നടന്നിരുന്നു.  തുടര്‍ന്ന് ബന്ധുക്കളുടെ സമ്മത പ്രകാരം മതാചാര പ്രകാരമുളള നിക്കാഹ് നടത്താനായി വിളിച്ചുവരുത്തിയതാണ്. കീഴരിയൂരിനു സമീപത്തെ മദ്രസയില്‍ നിക്കാഹ് നടത്താനായിരുന്നു നിശ്ചയിച്ചിരുന്നത്. വരനും സംഘവും സഞ്ചരിച്ച കാര്‍ കണ്ണോത്ത് ഭാഗത്തെത്തിയപ്പോള്‍ ആറംഗ സംഘം ഇവരെ തടഞ്ഞു നിര്‍ത്തി ആക്രമിക്കുകയായിരുന്നു.

പെണ്‍കുട്ടി ഒളിച്ചോടി സാലിഹിന്റെ വീട്ടിലെത്തിയപ്പോഴും മുഹമ്മദ് സാലിഹിന് നേരെ ആക്രമണം നടന്നിരുന്നു. അന്ന് കുട്ടിയുടെ ബന്ധുക്കള്‍ വീടാക്രമിച്ച് പെണ്‍കുട്ടിയെ കടത്തി കൊണ്ടു പോയിരുന്നു. എന്നാല്‍ പെണ്‍കുട്ടി വീണ്ടും സാലിഹിന്റെ വീട്ടിലെത്തി താമസമാക്കുകയായിരുന്നു. പിന്നീട് ഇരു വിഭാഗത്തിന്റെയും ബന്ധുക്കള്‍ പരസ്പരം സംസാരിച്ച് മതാചാര പ്രകാരം വിവാഹം നടത്തി കൊടുക്കാന്‍ തീരുമാനിച്ചിരുന്നെങ്കിലും കുട്ടിയുടെ അമ്മാവന്മാര്‍ എതിരുനിന്നതാണ് അക്രമത്തില്‍ കലാശിച്ചത് എന്നാണു പറയുന്നത്.