മനുഷ്യരാശി കണ്ടതില്‍ വെച്ച് ഏറ്റവും വലിയ മഹാമാരിയെയാണ് നാം നേരിടുന്നത്. നമ്മുടെ ജാഗ്രതക്കുറവിന് ഭയാനകമായ സംഹാരശേഷിയുണ്ടെന്ന ബോധ്യം നാം വിസ്മരിക്കരുത്. നാം ഇതും മറികടക്കുമെന്നും ദുരന്തങ്ങളെ അതിജീവിച്ച ചരിത്രമാണ് മാനവരാശിയുടേതെന്ന് മുല്ലപ്പള്ളി രാമചന്ദ്രന്‍ പറഞ്ഞു.

കോവിഡിന്റെ പകര്‍ച്ചയും വ്യാപനവും ജനജീവതത്തെ പൂര്‍ണ്ണമായും നിശ്ചലമാക്കുകയും സാമ്പത്തിക രംഗത്തെ തകര്‍ത്തെറിയുകയും ചെയ്തു. കോവിഡിനെ നിയന്ത്രിക്കാന്‍ സാധ്യമായ എല്ലാ വഴികളികളിലും നാം പരമാവധി ശ്രമിക്കുന്നുണ്ട്.

നമ്മുടെ ജാഗ്രതക്കുറവിന് ഭയാനകമായ സംഹാരശേഷിയുണ്ടെന്ന ബോധ്യം നാം വിസ്മരിക്കരുത്.കോവിഡ് ബാധിതരെ കൊണ്ട് ആശുപത്രികള്‍ നിറഞ്ഞ് കവിയുകയാണ്. പ്രണാവായുവിനായി ജനം പരക്കം പായുന്നു.കോവിഡിന്റെ ഒന്നാം തരംഗത്തെ ഐക്യത്തോടെയും മനക്കരുത്തോടെയും ജാഗ്രതയോടെയും നേരിട്ടവരാണ് നാം ഓരോരുത്തരും.

ഓക്‌സിജന്‍ വിതരണം തടസ്സപ്പെടുത്താന്‍ ആരു ശ്രമിച്ചാലും അവരെ തൂക്കിക്കൊല്ലുമെന്ന ഡല്‍ഹി ഹൈക്കോടതിയുടെ പരാമര്‍ശം നാം ഇപ്പോള്‍ നേരിടുന്ന ഗുരുതരാവസ്ഥയുടെ ആഴവും പരപ്പും പ്രകടമാക്കുന്നതാണ്.കോവിഡ് പ്രതിസന്ധി കൈകാര്യം ചെയ്യുന്നതില്‍ ഭരണകൂടങ്ങളുടെ കുറ്റകരമായ വീഴ്ചയിലേക്ക് വിരല്‍ചൂണ്ടുന്നതാണ് കോടതിയുടെ നിരീക്ഷണം.

ഓക്‌സിജന്‍ ലഭിക്കാതെ നിരവധി പേരാണ് ഉത്തരേന്ത്യയില്‍ മരണത്തിന് കീഴ്‌പ്പെടുന്നത്.ഇത് ഹൃദയഭേദകമാണ്. കേരളത്തിന് ഇപ്പോള്‍ ഇങ്ങനെ ഒരു അവസ്ഥയെ നേരിടേണ്ട സാഹചര്യമില്ല. എന്നാല്‍ രോഗികളുടെ എണ്ണം ക്രമാതീതമായി പ്രതിദിനം വര്‍ധിക്കുന്നത് ആശങ്ക വര്‍ധിപ്പിക്കുന്നതാണ്.കിടക്കകളുടേയും വെന്റിലേറ്ററുകളുടേയും ലഭ്യത കൂടുതല്‍ ഈ ഘട്ടത്തില്‍ നാം ഉറപ്പാക്കേണ്ടതുണ്ട്.

കോവിഡ് വ്യാപനത്തിന്റെ പരമാവധി തീവ്രത കുറയ്ക്കാന്‍ നാം സ്വയം പോരാളികളായി മാറണം. സുരക്ഷാമുന്‍കരുതലുകളെ സംബന്ധിച്ച് ആരോഗ്യ വിദഗ്ദ്ധര്‍ നല്‍കുന്ന നിര്‍ദ്ദേശങ്ങള്‍ കൃത്യമായി പാലിക്കുകയും ഉള്‍ക്കൊള്ളുകയും വേണം.

മാസ്‌ക് ധരിക്കുന്നത് ജീവിതചര്യയായി മാറ്റണം. സാമൂഹിക അകലവും വ്യക്തിശുചിത്വവും നാം പാലിക്കണം.നമ്മുടെ സ്വയംനിയന്ത്രണം സമൂഹത്തിന് നല്‍കുന്ന നന്മ വളരെ വലുതാണ്.നമ്മുടെ സഹോദരങ്ങളാണ് രോഗാവസ്ഥയില്‍ കഷ്ടപ്പെടുന്നത്. അവര്‍ക്ക് ആശ്വാസവും സഹായവും എത്തിക്കേണ്ടത് നാം ഓരോരുത്തരുടേയും കടമയും കര്‍ത്തവ്യവുമാണ്.

ദുരന്തമുഖങ്ങളില്‍ ജനങ്ങള്‍ക്കൊപ്പം നിന്ന പ്രസ്ഥാനമാണ് കോണ്‍ഗ്രസ്.ദേശീയ പ്രസ്ഥാനകാലത്ത് പലഘട്ടങ്ങളിലും കോണ്‍ഗ്രസ് ഈ ഉജ്ജ്വല മാതൃക കാട്ടിയിട്ടുണ്ട്.കോവിഡ് പ്രതിരോധ പ്രവര്‍ത്തനങ്ങളില്‍ എന്നും മികച്ച സംഭാവനകള്‍ നല്‍കിയവരാണ് ഓരോ കോണ്‍ഗ്രസ് പ്രവര്‍ത്തകനും.

സാമ്പത്തിക പരാധീനതകളെ അവഗണിച്ച് കഷ്ടപ്പെടുന്ന സഹോദരങ്ങള്‍ക്ക് സഹായം എത്തിക്കാന്‍ മത്സരിച്ച കോണ്‍ഗ്രസ് പ്രവര്‍ത്തകരുടെ വീര്യം വീണ്ടും സമൂഹം ആവശ്യപ്പെടുന്ന ഘട്ടത്തിലൂടെയാണ് നാം കടന്ന് പോകുന്നത്.

കോവിഡ് പ്രതിരോധ പ്രവര്‍ത്തനങ്ങളില്‍ ഓരോ കോണ്‍ഗ്രസ് പ്രവര്‍ത്തകനും മുന്നണി പോരാളികളായി മുന്നോട്ട് വരുന്നത് അഭിമാനകരമാണ്. ദുരന്തങ്ങളെ അതിജീവിച്ച ചരിത്രമാണ് മാനവരാശിയുടേത്.ഐക്യത്തോടുള്ള പ്രവര്‍ത്തനങ്ങളിലൂടെ നാം ഈ പ്രതിസന്ധിഘട്ടവും മറികടക്കും.