താരങ്ങളായ ആദിത്യന്റേയും അമ്പിളി ദേവിയുടേയും സന്തോഷത്തോടെയുള്ള വിവാഹ ജീവിതം മാധ്യമങ്ങള്‍ ആഘോഷിച്ചതാണ്. എന്നാല്‍ എത്രവേഗമാ എല്ലാം മാറിമറിഞ്ഞത്. അവസാനം ആദിത്യന്‍ ആത്മഹത്യക്ക് ശ്രമിക്കുകയും അമ്പിളി ദേവിയുടെ പരാതിയിന്‍മേല്‍ പോലീസ് കേസെടുക്കുകയും ചെയ്തിട്ടുണ്ട്.

സ്ത്രീധന പീഡനത്തിനും വധഭീഷണി മുഴക്കിയതിനും നടന്‍ ആദിത്യന്‍ ജയനെതിരെ ചവറ പോലീസ് കേസെടുത്തത്. കരുനാഗപ്പള്ളി എസിപിക്കും ചവറ സ്‌റ്റേഷനിലും സൈബര്‍ സെല്ലിലും ഭാര്യയും നടിയുമായ അമ്പിളി ദേവി നല്‍കിയ പരാതിയെ തുടര്‍ന്നാണു നടപടി.

അതിനിടെ, കൈഞരമ്പ് മുറിച്ച നിലയില്‍ മെഡിക്കല്‍ കോളജ് ആശുപത്രിയിലെത്തിച്ച ആദിത്യന്റെ ആരോഗ്യനില മെച്ചപ്പെട്ടു. വാര്‍ഡിലേക്കു മാറ്റിയതിനു പിന്നാലെ പൊലീസ് മൊഴിയെടുത്തു. ആത്മഹത്യാശ്രമത്തിനു കേസെടുക്കുമെന്നു സൂചന ഉണ്ടായിരുന്നെങ്കിലും തുടര്‍നടപടി സ്വീകരിച്ചിട്ടില്ല. കുടുംബപ്രശ്‌നങ്ങളെ തുടര്‍ന്നു ജീവനൊടുക്കാന്‍ ശ്രമിക്കുകയായിരുന്നെന്നു നടന്‍ മൊഴി നല്‍കിയതായി സൂചനയുണ്ട്.

അതേസമയം, ആദിത്യനെതിരെ നിയമപരമായി മുന്നോട്ടുപോകുമെന്ന് നടി അമ്പിളി ദേവി രാവിലെ മാധ്യമങ്ങളോടു പറഞ്ഞിരുന്നു. ഭാര്യയെന്നോ അമ്മയെന്നോ സ്ത്രീയെന്നോ പരിഗണനയില്ലാതെ തന്നെ മാനസികമായി പീഡിപ്പിച്ചു. ഇല്ലാത്തെ തെളിവുകള്‍ ഉണ്ടെന്നു പറഞ്ഞായിരുന്നു അപമാനിക്കല്‍. അത്രയും ക്രൂരമായ പീഡനം അനുഭവിച്ചു. നിയമത്തിന്റെ വഴിയില്‍ പോകാനാണു തീരുമാനം.

എന്നാല്‍, ഉന്നത ഉദ്യോഗസ്ഥരുമായി ബന്ധമുണ്ടെന്നും തന്നെ ഒന്നും ചെയ്യാനില്ലെന്നുമാണ് ആദിത്യന്റെ വെല്ലുവിളി. പക്ഷേ, തനിക്കു നിയമത്തില്‍ വിശ്വാസമുണ്ടെന്നും അമ്പിളി ദേവി പറഞ്ഞു. നിയമപരമായ നടപടികളില്‍ നിന്നു പിന്നോട്ടില്ലെന്നും അമ്പിളി ദേവി പറഞ്ഞു.

2019ല്‍ തന്നെ ആദിത്യന്‍ വിവാഹം കഴിച്ചെന്നും അന്ന് ആവശ്യപ്പെട്ട നൂറ് പവനും പത്ത് ലക്ഷം രൂപയും നല്‍കിയിരുന്നതായും പരാതിയില്‍ പറയുന്നു. എന്നാല്‍, പിന്നീട് സ്ത്രീധനമായി കൂടുതല്‍ തുക ആവശ്യപ്പെട്ട് നിരന്തരം തന്നെ മാനസികമായി പീഡിപ്പിച്ചു. തുടര്‍ന്ന് തൃശൂരിലേക്ക് പോയ ആദിത്യന്‍ കഴിഞ്ഞ മാര്‍ച്ചില്‍ വീട്ടിലെത്തി വധഭീഷണി മുഴക്കിയെന്നും അമ്പിളി ദേവി കരുനാഗപ്പള്ളി എ.സി.പിക്കും ചവറ പോലീസിലും നല്‍കിയ പരാതിയില്‍ പറയുന്നു.

സാമൂഹികമാധ്യമങ്ങളില്‍ ആദിത്യന്‍ തന്നെപ്പറ്റി പറയുന്നത് ശുദ്ധ അസംബന്ധമാണന്ന് അമ്പിളി ദേവി പറഞ്ഞു. പരമ്പരകളില്‍ മാത്രമല്ല, ജീവിതത്തിലും നല്ല അഭിനേതാവാണ് താനെന്ന് അദ്ദേഹം തെളിയിച്ചു കൊണ്ടിരിക്കുകയാണന്നും അമ്പിളി പറഞ്ഞു.

തന്നെപ്പറ്റി ഇല്ലാക്കഥകള്‍ പറയുന്ന ആദിത്യന്‍ ഉന്നയിക്കുന്ന ഏതന്വേഷണത്തിലും സഹകരിക്കാന്‍ തയ്യാറാണ്. ആദിത്യനുമായിട്ടുള്ള വിവാഹം പോലും തനിക്കു പറ്റിയ മണ്ടത്തരാണ്. വിവാഹത്തിനു ശേഷമാണ് അദ്ദേഹത്തിന്റെ രണ്ടാം മുഖം മനസിലാക്കുന്നത്. തന്റെ മാതാപിതാക്കളുടെ മുന്നില്‍പ്പോലും വിദഗ്ധമായി അഭിനിയച്ച് പ്രതിഫലിപ്പിക്കാന്‍ സാധിച്ചു. നിയമപരമായി ആദിത്യനെതിരെ നീങ്ങും. ഇനി ആദിത്യനുമായി സഹകരിച്ചു മുന്നോട്ട് പോകാന്‍ പറ്റാത്ത സാഹചര്യമാണുള്ളത്. വീട്ടുകാരുമായി ആലോചിച്ച് കാര്യങ്ങള്‍ തീരുമാനിക്കുമെന്നും അമ്പിളി ദേവി പറഞ്ഞു.

ഇതിന് പിന്നാലെയാണ് അമ്പിളിദേവി കേസ് കൊടുക്കുന്നതും പോലീസ് കേസെടുത്തതും.