ചൈനയുടെ മുട്ടിടിക്കും... കടലിലൂടെ ഇന്ത്യയെ ആക്രമിക്കാനുള്ള ശത്രുക്കളുടെ മോഹങ്ങളെ തകര്ത്ത് ഇന്ത്യ കുതിക്കുന്നു; അന്തര്വാഹിനികളെ തകര്ക്കാന് കഴിയുന്ന യു.എസ് കോപ്റ്റര് അമേരിക്കന് റോമിയോ ഇന്ത്യയുടെ ഭാഗമാകുന്നു; ആദ്യ രണ്ട് അന്തര്വാഹിനി നശീകരണ ഹെലികോപ്റ്ററുകള് ഇന്ത്യക്ക് കൈമാറി
ഇന്ത്യന് നാവിക സേനയ്ക്ക് കരുത്ത് പകര്ന്ന് അമേരിക്കന് റോമിയോ അന്തര്വാഹിനി നശീകരണ ഹെലികോപ്റ്ററുകള്. കടലിലൂടെയുള്ള ആക്രമണങ്ങളെ ഫലപ്രദമായി ചെറുക്കാനും രക്ഷാപ്രവര്ത്തനങ്ങള് നടത്താനും ഈ ഹെലീകോപ്ടറുകളിലൂടെ സാധിക്കുന്നു.
ഇരുപതിനായിരം കോടി രൂപയ്ക്ക് അമേരിക്കയില് നിന്ന് വാങ്ങുന്ന 24 അന്തര്വാഹിനി നശീകരണ ഹെലികോപ്റ്ററുകളില് ആദ്യ രണ്ടെണ്ണം ഇന്ത്യക്ക് കൈമാറി. ബാക്കിയുള്ളവ വരും മാസങ്ങളില് കൈമാറും. ഇവ ഇന്ത്യന് നാവികരെ അമേരിക്കയില് പരിശീലിപ്പിക്കാന് ഉപയോഗിക്കുന്നതിനാല് അടുത്ത വര്ഷം മദ്ധ്യത്തോടെയേ ഇന്ത്യയില് എത്തൂ.
ലോക്ക്ഹീഡ് മാര്ട്ടിന് കമ്പനി നിര്മ്മിക്കുന്ന, അന്തര്വാഹിനി വേട്ടക്കാരന് എന്നറിയപ്പെടുന്ന എം. എച്ച്. 60 റോമിയോ കോപ്ടറാണിത്. ശത്രുവിന്റെ അന്തര്വാഹിനികളെ കണ്ടെത്തി തകര്ക്കുന്ന കോപ്റ്ററുകള് ആദ്യമായാണ് ഇന്ത്യ സ്വന്തമാക്കുന്നത്.
പഴക്കം ചെന്ന ബ്രിട്ടീഷ് സീ കിംഗ്, റഷ്യന് കമോവ് ഹെലികോപ്ടറുകളുള്ള ഇന്ത്യന് നേവിക്ക് എം.എച്ച് 60 കരുത്ത് പകരും. ഇന്ത്യന് മഹാസമുദ്രമേഖലയില് ചൈനയുടെ സാന്നിദ്ധ്യം ശക്തമാകുന്ന പശ്ചാത്തലത്തിലാണ് യു. എസ് കോപ്ടറുകള് ഇന്ത്യ വാങ്ങുന്നത്.
അമേരിക്കയിലെ സാന് ഡിയാഗോ നാവിക കേന്ദ്രത്തില് നടന്ന ചടങ്ങില് യു. എസ് നേവല് എയര് ഫോഴ്സ് വൈസ് അഡ്മിറല് കെന്നത്ത് വിറ്റ്സെലും ഇന്ത്യന് നാവിക സേനയുടെ വൈസ് അഡ്മിറല് രവ്നീത് സിംഗും കോപ്റ്ററിന്റെ രേഖകള് കൈമാറി. ഇന്ത്യന് അംബാസഡര് തരണ്ജിത്ത് സിംഗ് സന്ധു പങ്കെടുത്തു.
വളരെ പ്രത്യേകതകളാണ് ഈ ഹെലീകോപ്ടറുകള്ക്കുള്ളത്. ആകാശത്തും സമുദ്രത്തിനടിയിലും സമുദ്രോപരിതലത്തിലും നിരീക്ഷണത്തിനും ആക്രമണത്തിനും കഴിവ്. ശത്രുവിന്റെ കപ്പലുകളെയും തകര്ക്കും. ലോകത്തെ ഏറ്റവും ആധുനിക വിവിധോദ്ദേശ്യ മാരിട്ടൈം കോപ്റ്ററാണ്. ആകാശത്തു നിന്ന് ഭൂമിയിലേക്ക് പ്രയോഗിക്കാവുന്ന ഹെല്ഫയര് മിസൈലുകളും അന്തര്വാഹിനികളെ തകര്ക്കുന്ന മാര്ക്ക് 54 ടോര്പ്പിഡോകളും ഉള്പ്പെടെ ആധുനിക ആയുധ സന്നാഹങ്ങളുണ്ട്. ഏതു കാലാവസ്ഥയിലും ഉപയോഗിക്കാം. കടലിലെ രക്ഷാപ്രവര്ത്തനത്തിനും സഹായിക്കും. നിലവില് അമേരിക്കന് നിര്മ്മിത പി. 8ഐ പട്രോളിംഗ് വിമാനങ്ങളാണ് അന്തര്വാഹിനികളെ കണ്ടെത്താന് ഇന്ത്യ ഉപയോഗിക്കുന്നത്. ഇത് കരയില് നിന്നാണ് ഓപ്പറേറ്റ് ചെയ്യുന്നത്.റോമിയോ കോപ്റ്റര് യുദ്ധക്കപ്പലുകളുടെ ഭാഗമായിരിക്കും.
അമേരിക്കയില് നിന്ന് പുതുതായി വാങ്ങുന്ന എം എച്ച് 60 ആര് വിവിധോദ്ദേശ ഹെലികോപ്ടറുകളിലെ ആദ്യ രണ്ടെണ്ണമാണ് അമേരിക്കന് നാവിക സേന ഇന്ത്യക്ക് കൈമാറിയത്. ഇത്തരം 24 ഹെലികോപ്ടറുകളാണ് ഇന്ത്യ അമേരിക്കയുടെ പക്കല് നിന്നും വാങ്ങുന്നത്. ലോക്ക്ഹീഡ് മാര്ട്ടിന് നിര്മ്മിച്ച് അമേരിക്കന് സര്ക്കാരിന്റെ അംഗീകാരത്തോടെ വില്ക്കപ്പെടുന്നത്.
ചടങ്ങില് വച്ച് അമേരിക്കന് നേവല് എയര് ഫോഴ്സിന്റെ വൈസ് അഡ്മിറല് കെന്നത്ത് വിറ്റ്സെലും ഇന്ത്യന് നാവിക സേനയുടെ വൈസ് അഡ്മിറല് രവ്ണീത് സിംഗും തമ്മില് രേഖകളും കൈമാറി. യു എസ് നേവിയിലെ മുതിര്ന്ന ഉദ്യോഗസ്ഥരും നിര്മ്മാതാക്കളായ ലോക്ക്ഹീഡ് മാര്ട്ടിന്റെ പ്രതിനിധികളും ചടങ്ങില് പങ്കെടുത്തു. ഈ കച്ചവടത്തോടെ ഇന്ത്യയും അമേരിക്കയും തമ്മിലുള്ള ബന്ധങ്ങള് പുതിയ തലങ്ങളിലേക്ക് കടന്നതായി അംബാസിഡര് തരണ്ജിത്ത് സന്ധു പറഞ്ഞു.
https://www.facebook.com/Malayalivartha
