എണ്ണക്കപ്പലിലുണ്ടായ തീപിടിത്തത്തില്‍ മരിച്ച 9 പേരില്‍ മലയാളി യുവാവും.... മൃതദേഹം നാട്ടിലെത്തിക്കാനുളള ശ്രമം തുടങ്ങിയതായി ബന്ധുക്കള്‍ .

കഴിഞ്ഞ ദിവസം ഇറാഖ് തീരത്തോടടുത്ത് എണ്ണക്കപ്പലിലുണ്ടായ തീപിടിത്തത്തില്‍ മരിച്ച 9 പേരില്‍ മലയാളി യുവാവും ഉള്‍പ്പെടുന്നു. കപ്പലിലെ ജീവനക്കാരന്‍ കൊയിലാണ്ടി വിരുന്നുകണ്ടി കോച്ചപ്പന്റെ പുരയില്‍ അതുല്‍രാജ്(28) ആണ് മരിച്ചത്. ജൂലൈ 13നാണ് അപകടമുണ്ടായതെന്നാണ് വിവരം.

ഇറാഖ് എണ്ണക്കപ്പലിലെ ജീവനക്കാരനായിരുന്നു അതുല്‍രാജ്. പേര്‍ഷ്യന്‍ ഉള്‍ക്കടലില്‍ ഉണ്ടായ അപകടത്തില്‍ രണ്ട് ഇന്ത്യക്കാരടക്കം ഒമ്പതു പേര്‍ മരിച്ചിട്ടുണ്ട്.

അപകട വിവരം ഞായറാഴ്ചയാണ് അതുല്‍രാജിന്റെ വീട്ടിലറിയുന്നത്. കഴിഞ്ഞ ഒക്ടോബറിലാണ് അതുല്‍രാജ് കപ്പല്‍ ജോലിക്കുപോയത്.

കോച്ചപ്പന്റെ പുരയില്‍ ഉത്തമന്റെയും ജയന്തിയുടെയും മകനാണ്. സഹോദരി അതുല്യ. മൃതദേഹം നാട്ടിലെത്തിക്കാനുളള ശ്രമം തുടങ്ങിയതായി ബന്ധുക്കള്‍ അറിയിച്ചു. കേന്ദ്ര വിദേശകാര്യ വകുപ്പുമായും ഇറാഖിലെ ഇന്ത്യന്‍ എംബസിയുമായും ബന്ധപ്പെട്ടിട്ടുണ്ട്.