ഏക മകള്‍ മീനാക്ഷിയെ വക്കിലാക്കണമെന്ന സ്വപ്‌നം ബാക്കിയാക്കിയാണ് വിജയകുമാര്‍ യാത്രയായത്.... ലോക്ക്ഡൗണ്‍ നിയന്ത്രണങ്ങള്‍ വന്നതോടെ കച്ചവടം അവതാളത്തിലായി.... എപ്പോഴും ചിരിച്ച മുഖത്തോടെ മാത്രമേ നാട്ടുകാര്‍ വിജയകുമാറിനെ കണ്ടിരുന്നൂള്ളൂ... ആ ചിരി ഇനി ഇല്ലെന്നോര്‍ക്കുമ്പോള്‍ സങ്കടം സഹിക്കാനാവാതെ ഉറ്റവരും ബന്ധുക്കളും നാട്ടുകാരും.....

പഠിക്കാന്‍ വളരെയധികം മിടുക്കിയായ ഏക മകള്‍ മീനാക്ഷിയെ വക്കിലാക്കണമെന്ന സ്വപ്‌നം ബാക്കിയാക്കിയാണ് വിജയകുമാര്‍ ഒരു മുഴം കയറില്‍ ജീവനൊടുക്കിയത്. പേരൂര്‍ക്കട ലാ അക്കാഡമിയില്‍ രണ്ടാംവര്‍ഷ എല്‍എല്‍.ബി വിദ്യാര്‍ത്ഥിയാണ് മീനാക്ഷി.

ചെറുപ്പത്തിലേ പോളിയോ ബാധിച്ച് വലതുകാലിന് സ്വാധീനക്കുറവുണ്ടായിരുന്ന വിജയകുമാറിന്റെ ഏക ഉപജീവനമാര്‍ഗമായിരുന്നു സ്‌റ്റേഷനറിക്കട.

പലരില്‍ നിന്നായി കടംവാങ്ങിയും ചിട്ടികള്‍ പിടിച്ചുമായിരുന്നു വാടക കെട്ടിടത്തില്‍ പ്രവര്‍ത്തിച്ചിരുന്ന കട മുന്നോട്ടുകൊണ്ടുപോയിരുന്നത്. ലോക്ക്ഡൗണ്‍ നിയന്ത്രണങ്ങള്‍ വന്നതോടെ കച്ചവടം അവതാളത്തിലായി. കട തുറക്കാന്‍ സാധിക്കാതിരുന്നതും സമീപം മറ്റു കടകള്‍ വന്നതും കച്ചവടത്തെ സാരമായി ബാധിച്ചു.

കച്ചവടമില്ലാത്തതിന്റെ മനോവിഷമത്തെപ്പറ്റി വിജയകുമാര്‍ സഹോദരന്‍ ഹരികുമാറിനോട് രണ്ടുദിവസം മുമ്പ് സംസാരിച്ചിരുന്നു. ഏഴ് മാസത്തെ കടവാടകയും ചിട്ടി വായ്പ വിഹിതവും അടച്ചിട്ടില്ലെന്നും സൂചനയുണ്ട്. ജ്യൂസും ബേക്കറി ഇനങ്ങളും അടങ്ങുന്നതായിരുന്നു വിജയകുമാറിന്റെ പിടാരം ജംഗ്ഷനിലെ കട. അഞ്ച് സെന്റില്‍ ചെറിയൊരു വീട് തട്ടിക്കൂട്ടിയതും ബാങ്ക് വായ്പയെടുത്തായിരുന്നു.

വിജയകുമാറിന്റെ ഭാര്യ ശ്രീലേഖ കൊവിഡ് ബാധിച്ച് ഗുരുതരാവസ്ഥയില്‍ കഴിഞ്ഞശേഷമാണ് ജീവിതത്തിലേക്ക് തിരികെയത്തിയത്. കൊവിഡ് ഭേദമായെങ്കിലും ശാരീരിക അവശത പിടിമുറുക്കിയതോടെ ആകെയുണ്ടായിരുന്ന സ്വകാര്യസ്ഥാപനത്തിലെ ജോലി നിറുത്തേണ്ടിവന്നതും കുടുംബത്തെ പ്രതിസന്ധിയിലാക്കി. ജീവിതം മുന്നോട്ടുകൊണ്ടുപോകാന്‍ ഒരു നിവൃത്തിയും ഇല്ലെന്ന് ബോദ്ധ്യമായതോടെയാകാം വിജയകുമാര്‍ അത്മഹത്യയ്ക്ക് മുതിര്‍ന്നതെന്ന് നാട്ടുകാര്‍ പറയുന്നു.

കടബാദ്ധ്യതയെക്കുറിച്ച് സംസാരിച്ചിരുന്നെങ്കിലും വിജയകുമാര്‍ ഈ കടുംകൈ ചെയ്യുമെന്ന് ബന്ധുക്കള്‍ക്കും വിശ്വസിക്കാനാവുന്നില്ല. ആരോടും മുഖം കറുത്ത് സംസാരിക്കാത്ത വിജയകുമാര്‍ നാട്ടുകാരുടെയും മറ്റ് വ്യാപാരികളുടെയും പ്രിയങ്കരനായിരുന്നു. വിജയകുമാറിന്റെ വേര്‍പാട് ആ നാട്ടുകാരെ കണ്ണീരിലാഴ്ത്തി.