ഇത് കൊറോണ കാലമാണ്. ചുരുട്ടിക്കൂട്ടി വച്ചിരുന്ന സമരങ്ങളെല്ലാം വീണ്ടും പൊടി തട്ടിയെടുത്തിരിക്കുകയാണ്. കഴിഞ്ഞ സര്‍ക്കാരിലെന്ന പോലെ ഈ സര്‍ക്കാരിലും നാണക്കേടുണ്ടാക്കിയിരിക്കുകയാണ് മന്ത്രി എ.കെ. ശശീന്ദ്രന്‍.

പീഡന പരാതി ഒത്തുതീര്‍ക്കാന്‍ ഇടപെട്ട ഓഡിയോ പുറത്തുവന്നതോടെ രണ്ടാം പിണറായി സര്‍ക്കാരില്‍ ഗുരുതര ആരോപണം നേരിടുന്ന ആദ്യ മന്ത്രിയായി എ.കെ.ശശീന്ദ്രന്‍ മാറി. ഒന്നാം പിണറായി സര്‍ക്കാരിന്റെ കാലത്തും ശശീന്ദ്രന്‍ വിവാദത്തില്‍പ്പെട്ടിരുന്നു. ഫോണ്‍കെണി കേസില്‍പ്പെട്ടതോടെ ശശീന്ദ്രനു മന്ത്രി സ്ഥാനം രാജി വയ്‌ക്കേണ്ടി വന്നിരുന്നു. കോടതി കുറ്റവിമുക്തനാക്കിയതിനെത്തുടര്‍ന്നാണ് മന്ത്രിസഭയിലേക്കു തിരിച്ചെത്തിയത്.

കൊല്ലം കുണ്ടറയില്‍ പെണ്‍കുട്ടി അപമാനിക്കപ്പെട്ട കേസിനെക്കുറിച്ച് ധാരണയുണ്ടായിട്ടും അട്ടിമറിക്കാന്‍ കൂട്ടുനിന്നെന്ന ആരോപണമാണ് മന്ത്രിക്കെതിരെ ഉയരുന്നത്. പീഡന പരാതിയാണെന്ന് അറിഞ്ഞില്ലെന്നും പാര്‍ട്ടിക്കാരനെതിരെയുള്ള പരാതിയാണെന്നു കരുതിയാണ് ഇടപെട്ടതെന്നുമുള്ള മന്ത്രിയുടെ വാദങ്ങള്‍ ഫോണ്‍ സംഭാഷണത്തില്‍തന്നെ പൊളിഞ്ഞു.

എന്‍സിപി നേതാവ് ജി. പത്മാകരന്‍ കയറിപിടിച്ചെന്ന പരാതി ഒത്തുതീര്‍ക്കണമെന്നാണോ മന്ത്രി ആവശ്യപ്പെടുന്നതെന്ന് ഫോണില്‍ സംസാരിക്കവേ പെണ്‍കുട്ടിയുടെ അച്ഛന്‍ ചോദിക്കുന്നുണ്ട്. സംഭവമെല്ലാം അറിഞ്ഞെന്നും നല്ല രീതിയില്‍ കേസ് തീര്‍ക്കണമെന്നും മന്ത്രി പറയുന്നുണ്ട്.

മന്ത്രിക്കു പരാതിയെപറ്റി അറിയില്ലെന്ന വാദം ശരിയല്ലെന്നു പെണ്‍കുട്ടിയും പറയുന്നു. പരാതി പിന്‍വലിക്കണമെന്ന് എന്‍സിപി നേതാക്കള്‍ ആവശ്യപ്പെട്ടിരുന്നതായും ഭീഷണിപ്പെടുത്തിയതായും പെണ്‍കുട്ടി പറഞ്ഞു. കുണ്ടറയിലെ പ്രാദേശിക എന്‍സിപി നേതാവാണ് പെണ്‍കുട്ടിയുടെ പിതാവ്. പെണ്‍കുട്ടി യുവമോര്‍ച്ചയുടെ പ്രവര്‍ത്തകയാണ്.

തദ്ദേശ തിരഞ്ഞെടുപ്പില്‍ ബിജെപി സ്ഥാനാര്‍ഥിയായി മത്സരിച്ചിരുന്നു. പിതാവ് എന്‍സിപി നേതൃത്വത്തോട് പരാതി പറഞ്ഞിട്ടും നടപടിയെടുക്കാത്തതിനെത്തുടര്‍ന്നാണ് കഴിഞ്ഞമാസം 28ന് പെണ്‍കുട്ടി കുണ്ടറ പൊലീസ് സ്‌റ്റേഷനില്‍ പരാതി നല്‍കിയത്.

എന്നാല്‍, പൊലീസ് ആരോപണവിധേയനു അനുകൂലമായ നിലപാടാണ് സ്വീകരിച്ചതെന്നു പെണ്‍കുട്ടി പറയുന്നു. എസ്പിക്കു പരാതി നല്‍കിയിട്ടും നടപടിയുണ്ടായില്ല.

അതേസമയം ഈ കേസ് ബിജെപി ഏറ്റെടുത്തിരിക്കുകയാണ്. പീഡന കേസില്‍നിന്നും എന്‍സിപി നേതാവിനെ രക്ഷിക്കാന്‍ ശ്രമിച്ച മന്ത്രി എ.കെ.ശശീന്ദ്രനെ സംരക്ഷിക്കുന്ന മുഖ്യമന്ത്രി പിണറായി വിജയന്‍ ഇരയെ അപമാനിക്കുകയാണെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ പറഞ്ഞു. വേട്ടക്കാര്‍ക്കൊപ്പമാണ് പിണറായി വിജയനും സര്‍ക്കാരുമെന്ന് അവര്‍ തെളിയിക്കുകയാണെന്നും അദ്ദേഹം പറഞ്ഞു.

സത്യപ്രതിജ്ഞാലംഘനം നടത്തിയ മന്ത്രിയെ മുഖ്യമന്ത്രി സംരക്ഷിക്കുന്നത് കേരളത്തിലെ ജനാധിപത്യത്തിന് തീരാകളങ്കമാണ്. ശശീന്ദ്രന്‍ ഉടന്‍ രാജിവയ്ക്കുകയാണ് വേണ്ടത്. ഇല്ലെങ്കില്‍ പുറത്താക്കാനുള്ള ആര്‍ജവം മുഖ്യമന്ത്രി കാണിക്കണം. മുഖ്യമന്ത്രിയില്‍ നിന്നും നീതി കിട്ടിയില്ലെന്നു പെണ്‍കുട്ടി പറഞ്ഞത് കേരളത്തിന് നാണക്കേടാണ്. ഒരു പെണ്‍കുട്ടിയെ എന്‍സിപി നേതാവ് പീഡിപ്പിക്കാന്‍ ശ്രമിച്ച പരാതി പിന്‍വലിക്കാന്‍ മന്ത്രി സംസാരിച്ചിട്ടും അത് എന്‍സിപി അന്വേഷിക്കട്ടെ എന്ന സിപിഎം നിലപാട് രാജ്യത്തെ നീതിന്യായ വ്യവസ്ഥയോടുള്ള വെല്ലുവിളിയാണെന്നും സുരേന്ദ്രന്‍ പറഞ്ഞു.

അതേസമയം സ്ത്രീ പീഡന പരാതി ഒത്തുതീര്‍പ്പാക്കാന്‍ ഇടപെട്ടെന്ന ആരോപണം നേരിടുന്ന മന്ത്രി എ.കെ ശശീന്ദ്രനെ നിയമസഭയില്‍ പിന്തുണച്ച് മുഖ്യമന്ത്രി പിണറായി വിജയന്‍ രംഗത്തെത്തി. മന്ത്രി ഇടപെട്ടത് രണ്ട് പാര്‍ട്ടി നേതാക്കള്‍ തമ്മിലുള്ള പ്രശ്‌നം പരിഹരിക്കുന്നതിന് വേണ്ടിയാണെന്നും മന്ത്രി തെറ്റ് ചെയ്തുവെന്ന് പറയാനാവില്ലെന്നും മുഖ്യമന്ത്രി പറഞ്ഞു.