അണ്ടര്‍ സെക്രട്ടറി ഒ.ജി ശാലിനിയുടെ ഗുഡ്‌സ് സര്‍വീസ് എന്‍ട്രി പിന്‍വലിച്ച നടപടി പിന്‍വലിക്കാനുള്ള സാധ്യത മങ്ങി. ഗുഡ് സര്‍വീസ് എന്‍ട്രി നല്‍കിയിട്ടില്ലെന്നും പിന്‍വലിച്ചിട്ടില്ലെന്നുമാണ് സര്‍ക്കാര്‍ പറയുന്നത്.

മുഖ്യമന്ത്രിക്ക് അവര്‍ പരാതി നല്‍കിയെങ്കിലും തത്കാലം മുഖ്യമന്ത്രി അതില്‍ ഇടപെടില്ല. അവരുടെ അപേക്ഷ റവന്യുമന്ത്രി പരിഗണിക്കട്ടെ എന്ന നിലപാടാണ് മുഖ്യമന്ത്രിക്കുള്ളത്. താന്‍ ഗുഡ്‌സ് സര്‍വീസ് എന്‍ട്രി പിന്‍വലിച്ചില്ലല്ലോ എന്നതാണ് മുഖ്യമന്ത്രിയുടെ നിലപാട്.

നിയമത്തിന്റെ അടിസ്ഥാനത്തില്‍ ശാലിനി ചെയ്തതില്‍ തെറ്റൊന്നും ഇല്ലെങ്കിലും സര്‍ക്കാരിന്റെ പരിഗണനയിലിരിക്കുന്ന ഫയല്‍ വിവരാവകാശ നിയമപ്രകാരം നല്‍കുന്നതിന് മുമ്പ് ഫയലിന്റെ ഇപ്പോഴത്തെ കസ്‌റ്റോഡിയന്റെ അനുമതി തേടണമായിരുന്നു എന്നാണ് മുഖ്യമന്ത്രി കരുതുന്നത്.

ശാലിനിക്കെതിരെ നടപടിയെടുത്തത് റവന്യു സെക്രട്ടറിയാണ്. അത് താന്‍ പിന്‍വലിച്ചാല്‍ അത് സെക്രട്ടറിക്ക് ആക്ഷേപമായി മാറും. അതിന് മുഖ്യമന്ത്രി തയ്യാറല്ല. ഇക്കാര്യം ചീഫ് സെക്രട്ടറിയും മുഖ്യമന്ത്രിയെ അറിയിച്ചു. ഫയലില്‍ തീരുമാനമെടുക്കേണ്ടത് സെക്രട്ടറി തന്നെയാണെന്ന ചിന്തയാണ് ചീഫ് സെക്രട്ടറിക്ക് ഉള്ളത്. മുഖ്യമന്ത്രിയുടെ തലത്തിലേക്ക് കാര്യങ്ങള്‍ എത്തേണ്ട അവസ്ഥ ഇപ്പോഴില്ലെന്ന് ചീഫ് സെക്രട്ടറി കരുതുന്നു. സെക്രട്ടറിയുടെ തീരുമാനം തിരുത്തേണ്ട സാഹചര്യമില്ലെന്നാണ് സര്‍ക്കാര്‍ കരുതുന്നത്.

ഒ.ജി ശാലിനി സര്‍ക്കാരിനെ കളങ്കപ്പെടുത്താന്‍ ശ്രമിച്ചു എന്ന ചിന്തയും സര്‍ക്കാരിനുണ്ട്. ഒരു കൂടിയാലോചനയും കൂടാതെയാണ് അവര്‍ നടപടിയെടുത്തതെന്നും സര്‍ക്കാര്‍ കരുതുന്നു. ഇത്തരം ജീവനക്കാരെ മുളയിലെ നുള്ളണമെന്ന അഭിപ്രായമാണ് സര്‍ക്കാരിനുള്ളത്. സര്‍ക്കാരിന് എതിരെ നില്‍ക്കുന്ന ഉദ്യോഗസ്ഥരെ കിടത്തി പൊറുപ്പിക്കേണ്ടതില്ലെന്ന തീരുമാനം സര്‍ക്കാര്‍ സ്വീകരിച്ചു കഴിഞ്ഞു.

ഗുഡ് സര്‍വ്വീസ് എന്‍ട്രി തിരികെ നല്‍കണമെന്ന് അണ്ടര്‍ സെക്രട്ടറി ഒ ജി ശാലിനി ആവശ്യപ്പെട്ടതിന് പിന്നാലെയാണ് സര്‍ക്കാര്‍ തീരുമാനം വന്നത്. സര്‍വ്വീസ് ചട്ടങ്ങള്‍ മറികടന്നാണ് ഗുഡ് സര്‍വ്വീസ് എന്‍ട്രി തിരികെയെടുത്തതെന്നും തന്റെ ഭാഗം കേള്‍ക്കാതെയാണ് നടപടിയെന്നുമാണ് ശാലിനിയുടെ പരാതി. ഇക്കാര്യങ്ങള്‍ ചൂണ്ടിക്കാട്ടി ഉദ്യോഗസ്ഥ മുഖ്യമന്ത്രിക്കും റവന്യു മന്ത്രിക്കും പരാതി നല്‍കി.

മരം മുറി ഫയലുകള്‍ വിവരാവകാശ നിയമപ്രകാരം നല്‍കിയതിന് പിന്നാലെയായിരുന്നു ശാലിനിക്കെതിരായ നടപടി. ഗുഡ് സര്‍വ്വീസ് എന്‍ട്രി റദ്ദാക്കിയത് വിവാദമായതിന് പിന്നാലെ റവന്യൂവകുപ്പിലെ അണ്ടര്‍ സെക്രട്ടറിയായ ശാലിനിയെ സെക്രട്ടറിയേറ്റിന് പുറത്തേക്ക് മാറ്റിയിരുന്നു. ഹയര്‍ സെക്കന്‍ഡറി ഡയറക്ടറേറ്റിലേക്കാണ് മാറ്റം. ഉന്നത ഉദ്യോഗസ്ഥരുടെ നിര്‍ദ്ദേശ പ്രകാരം ശാലിനി ഇപ്പോള്‍ നിര്‍ബന്ധിത അവധിയിലാണ്.

തന്റെ ഭാഗം കേള്‍ക്കാതെയാണ് ഗുഡ് സര്‍വീസ് എന്‍ട്രി പിന്‍വലിച്ചതെന്ന ശാലിനിയുടെ വാദം നിലനില്‍ക്കില്ല. കാരണം ഗുഡ് സര്‍വീസ് എന്‍ട്രി സര്‍ക്കാര്‍ നയത്തിന്റെ ഭാഗമാണ്. അത് നല്‍കണമോ വേണ്ടയോ എന്ന് തീരുമാനിക്കാനുള്ള പൂര്‍ണ അധികാരം സര്‍ക്കാരിന് മാത്രമാണുള്ളത്. ഉദ്യോഗസ്ഥയെ ഹയര്‍ സെക്കന്ററി ഡയറക്ടറേറ്റിലേക്ക് മാറ്റിയതും ചോദ്യം ചെയ്യാന്‍ കഴിയില്ല. അതും സര്‍ക്കാരിന്റെ നയപരമായ വിഷയം തന്നെയാണ്.

കൂടുതല്‍ വിവാദങ്ങള്‍ക്ക് നിന്നാല്‍ ഉദ്യോഗസ്ഥക്കെതിരെ മറ്റ് നടപടികളിലേക്ക് സര്‍ക്കാര്‍ നീങ്ങിയേക്കും. അതിന് ഇടവരുത്തരുതെന്ന ഉപദേശം സംഘടന തലത്തില്‍ തന്നെ ഉദ്യോഗസ്ഥക്ക് നല്‍കിയിട്ടുണ്ടെന്നാണ് ലഭിക്കുന്ന സൂചനകള്‍.