അനന്യയുടെ ആത്മഹത്യയുടെ ഞെട്ടലിൽ നിന്ന് ഇനിയും സുഹൃത്തുക്കളും പ്രിയപ്പെട്ടവരും പുറത്തുവന്നിട്ടില്ല. ചികിത്സ പിഴവിനെ തുടർന്ന് മരണതുല്യമായ വേദനയും പേറി ജീവിച്ചവൾ. ഒടുവിൽ സഹിക്കവയ്യാതെ ഒരുമുഴം കയറിൽ എല്ലാം അവസാനിപ്പിച്ച് വേദനകളില്ലാത്ത ലോകത്തേക്ക് മടങ്ങുമ്പോൾ ഹൃദയം നുറുങ്ങുന്ന നോവോർമ്മകൾ സുഹൃത്തുക്കൾ ഇന്നലെ മുതലായിരുന്നു പങ്കുവെച്ചത്.

ഇപ്പോഴിതാ വികാരഭരിതയായി ഒരു കുറിപ്പ് പങ്കുവെച്ചിരിക്കുകയാണ് സീമാവിനീത്. ഒരുപറ്റം ആളുകൾ ചേർന്ന് അവളുടെ ശരീരം കൊത്തിപറിച്ചു കൊന്നിരിക്കുന്നു! പൊതുസമൂഹം പ്രാധാന്യം കൊടുക്കാൻ സാധ്യത ഇല്ലാത്ത ഒരു വാർത്തയാണ് ഇത് കാരണം ഞങ്ങളെ പോലെ ഉള്ളവർ ദൈവത്തിനെ മറന്നു ജീവിക്കുന്നവരാണെന്നാണ് സീമ ഫേസ്ബുക്ക് കുറിപ്പിലൂടെ പറയുന്നത്.

ഫെയ്‌സ്ബുക്ക് കുറിപ്പ് വായിക്കാം:

അനന്യ എന്ന ട്രാൻസ് വുമൺ ആത്മഹത്യാ ചെയ്തിരിക്കുന്നു.... അല്ല എനിക്ക് ആത്മഹത്യാ എന്ന് പറയാൻ കഴിയില്ല ഒരുപറ്റം ആളുകൾ ചേർന്ന് അവളുടെ ശരീരം കൊത്തിപറിച്ചു കൊന്നിരിക്കുന്നു

പൊതുസമൂഹം പ്രാധാന്യം കൊടുക്കാൻ സാധ്യത ഇല്ലാത്ത ഒരു വാർത്തയാണ് ഇത് കാരണം
ഞങ്ങളെ പോലെ ഉള്ളവർ ദൈവത്തിനെ മറന്നു ജീവിക്കുന്നവരാണ്......
ഈശ്വരന്റെ സൃഷ്‌ടിക്കു വിപരീതമായി ചെയ്തവരാണ്......

ജനിച്ച ശരീരത്തിത്തിൽ ജീവിക്കാതെ സ്വന്തം സുഖത്തിനു വേണ്ടി ശരീരം മാറ്റിമറിക്കാൻ ശ്രമിച്ചവരാണ്.... നന്നായിപ്പോയി ഇവർക്കൊക്കോ ഇങ്ങനെ വന്നതിൽ......... പൊതുസമൂഹത്തിലെ മിക്കവരുടെയും വാക്കുകളാണ് ഇപ്പോഴും നേരം വെളുക്കാത്ത മലമലരുകളുടെ വാക്കുകൾ ......

കഷ്ടം കൊന്നവരെ വീണ്ടും വീണ്ടും കൊല്ലിക്കുന്ന വാക്കുകൾ. ജീവിച്ചിരിക്കുന്ന മറ്റുള്ളവർ കൂടി മരിച്ചിരുന്നെങ്കിൽ എന്ന് ആഗ്രഹിക്കുന്ന ഒരു പറ്റം എല്ലാം തികഞ്ഞ മനുഷ്യൻ എന്ന് സ്വയം പറയുന്ന ഒരു പറ്റം കിരാതൻമ്മാരുടെ വാക്കുകൾ......

ഹോ കഷ്ടം ജീവിക്കാൻ അർഹതയില്ലാത്തവർ മരിക്കണമെന്ന പൊതുബോധമാണ്....
പക്ഷേ മരിച്ചുപോയവൾ, അവൾ പ്രതിനിധാനം ചെയ്യുന്ന കമ്മ്യൂണിറ്റിയുടെ അഭിമാനമായിരുന്നു മുന്നേ പറഞ്ഞ പൊതുബോധങ്ങളെ ഉടച്ചുവാർക്കാൻ കഴിവുള്ളവളായിരുന്നു.........

നിനക്ക് യാത്രമൊഴി അർപ്പിക്കാൻ വാക്കുകളില്ല .....
ഈ വാക്കുകളിലൂടെയോ ഒരു പോസ്റ്റിലൂടെയോ ഒരു സ്റ്റാറ്റസിലൂടെയോ അല്ലാതെ തന്നെ നീ എന്നും ഉണ്ടാവും എന്റെ നെഞ്ചിൽ.......
നിന്റെ സീമേച്ചി