വനംവകുപ്പ് മന്ത്രി എ.കെ. ശശീന്ദ്രന്‍ രാജിവയ്ക്കുമെന്ന് കേരളത്തിലെ മറ്റാരും വിശ്വസിക്കാതിരിക്കെ സ്വന്തം പാര്‍ട്ടി സഖാക്കള്‍ ശശീന്ദ്രന്‍ രാജിവയ്ക്കുമെന്ന് കരുതി പണി കൊടുത്തു.

ശശീന്ദ്രന്‍ രാജിവയ്ക്കുമെന്ന അഭ്യൂഹങ്ങള്‍ക്ക് പിന്നാലെ ധൃതിപിടിച്ച് വനംവകുപ്പിലെ ഫോറസ്റ്റ് ഓഫീസര്‍മാരെ സ്ഥലംമാറ്റി ഉത്തരവ് പുറത്തിറങ്ങി. കഴിഞ്ഞ ദിവസം ഇറങ്ങിയ വനം വകുപ്പിലെ ഫോറസ്റ്റ് റേഞ്ച് ഓഫീസര്‍മാരുടെ സ്ഥലംമാറ്റ പ്പട്ടികയിലാണ് ക്രമക്കേട് നടന്നതായി സംശയമുള്ളത്. വിഷയം ശ്രദ്ധയില്‍പ്പെട്ട ഉടന്‍ മന്ത്രി എ കെ ശശീന്ദ്രന്‍ നേരിട്ട് ഇടപെട്ടു സ്ഥലം മാറ്റ ഉത്തരവ് മരവിപ്പിച്ചു. വനം മന്ത്രി അറിയാതെയാണ് ഉത്തരവിറങ്ങിയതെന്നു ശ്രദ്ധയില്‍പെട്ടതിനെ തുടര്‍ന്നാണ് നടപടി.

സംസ്ഥാനത്തെ ഫോറസ്റ്റ് ഉദ്യോഗസ്ഥന്മാരെ വിവിധ ഇടങ്ങളിലേക്ക് സ്ഥലം മാറ്റികൊണ്ടുള്ള കഴിഞ്ഞ ദിവസം ഇറങ്ങിയ ഉത്തരവാണ് മരവിപ്പിച്ചത്. ഉദ്യോഗസ്ഥ തലത്തില്‍ ധൃതി പിടിച്ചു സ്ഥലം മാറ്റ ഉത്തരവിറക്കിയത് എ കെ ശശീന്ദ്രന്‍ വനമന്ത്രിസ്ഥാനത്തു നിന്നും ഒഴിവാകും എന്ന കണക്കുകൂട്ടലിലാണെന്നും സൂചനയുണ്ട്. ഇതേ പറ്റി വകുപ്പ് തലത്തില്‍ അന്വേഷണം ആരംഭിച്ചിട്ടുണ്ട്.

അതേസമയം പീഡനക്കേസ് ഒത്തുതീര്‍പ്പാക്കാന്‍ മന്ത്രി എ.കെ. ശശീന്ദ്രന്‍ പിതാവിനെ ഫോണില്‍ വിളിച്ചെന്ന കൊല്ലം സ്വദേശിയായ യുവതിയുടെ പരാതിയെ ചൊല്ലിയുയര്‍ന്ന വിവാദങ്ങള്‍ ചീറ്റിപ്പോയില്ലേയെന്ന് ചോദിച്ച് മുഖ്യമന്ത്രി പിണറായി വിജയന്‍. ശബ്ദസംഭാഷണത്തില്‍ കേസിന്റെ കാര്യം പിതാവ് പറയുന്നത് വ്യക്തമായി തന്നെ കേള്‍ക്കാമെന്നിരിക്കെ, കേസ് അപ്രസക്തമായിയെന്ന് കരുതാനാകുമോയെന്ന് വാര്‍ത്താലേഖകര്‍ ചൂണ്ടിക്കാട്ടിയപ്പോഴാണ്, നിയമസഭയില്‍ കാര്യങ്ങളൊക്കെ കേട്ടതല്ലേ, അതെല്ലാം ചീറ്റിപ്പോയില്ലേ എന്ന് മുഖ്യമന്ത്രി പ്രതികരിച്ചത്. കൊടകര കുഴല്‍പ്പണക്കേസിലെ പുതിയ കുറ്റപത്രത്തെക്കുറിച്ച് ചൂണ്ടിക്കാട്ടിയപ്പോള്‍ അന്വേഷണ ഏജന്‍സി കണ്ടെത്തിയ കാര്യമല്ലേ, അത് തന്റെ കൈയിലില്ല എന്ന് മുഖ്യമന്ത്രി മറുപടി നല്‍കി.

അതേസമയം പീഡന പരാതി ഒതുക്കിതീര്‍ക്കാന്‍ ശ്രമിച്ചതായ ആരോപണത്തില്‍ എ.കെ. ശശീന്ദ്രന്‍ തെറ്റു ചെയ്‌തെന്ന് കണ്ടെത്തിയാല്‍ മന്ത്രി സ്ഥാനത്തുനിന്ന് നീക്കി നിര്‍ത്തുമെന്ന് എന്‍.സി.പി സംസ്ഥാന അദ്ധ്യക്ഷന്‍ പി.സി. ചാക്കോ പറഞ്ഞു. തിങ്കളാഴ്ച ചേരുന്ന സംസ്ഥാന കമ്മിറ്റി യോഗം ഇക്കാര്യത്തില്‍ വിശദമായ ചര്‍ച്ച നടത്തുമെന്നും അദ്ദേഹം വ്യക്തമാക്കി. കോട്ടയത്ത് പ്രസ്‌ക്ലബില്‍ നടന്ന മീറ്റ് ദ പ്രസ് പരിപാടിയില്‍ മാദ്ധ്യമങ്ങളോട് പ്രതികരിക്കുകയായിരുന്നു ചാക്കോ.

പ്രാദേശികമായി ഉണ്ടായ തര്‍ക്കങ്ങളാണ് വിവാദം ആളിക്കത്തുന്നതിന് കാരണമായതെന്ന് അദ്ദേഹം പ്രതികരിച്ചു. 18 ദിവസം കഴിഞ്ഞാണ് പരാതി നല്‍കിയത്. എന്തുകൊണ്ടാണ് പരാതി വൈകിയതെന്ന് ചിന്തിക്കേണ്ടതുണ്ട്. സ്ത്രീ പീഡന വിഷയത്തില്‍ എന്‍.സി.പിക്ക് ഉറച്ച നിലപാടാണ് ഉള്ളത്. ഇക്കാര്യത്തില്‍ വിട്ടുവീഴ്ച ചെയ്യുന്ന നടപടി ഒരു കാരണവശാലും പാര്‍ട്ടിയുടെ ഭാഗത്തുനിന്ന് ഉണ്ടാകില്ല. പൊലീസ് അന്വേഷണം കൃത്യമായി നടക്കണമെന്ന് അഭിപ്രായമാണ് ഉള്ളത്. നീതിപൂര്‍വമായ അന്വേഷണം ഉണ്ടാകുമെന്ന് കരുതുന്നു. അതിനുശേഷം തുടര്‍ നടപടികളെക്കുറിച്ച് ആലോചിക്കാമെന്നും ചാക്കോ വ്യക്തമാക്കി.

അതേസമയം, പെണ്‍കുട്ടിയുടെ പിതാവ് പീഡന ശ്രമത്തെ കുറിച്ച് പറഞ്ഞിട്ടും ശശീന്ദ്രന്‍ എന്തുകൊണ്ടാണ് ഈ കാര്യം പൊലീസിനെ അറിയിക്കാതിരുന്നത് എന്ന ചോദ്യത്തില്‍ നിന്നും ചാക്കോ തെന്നിമാറി. എന്‍.സി.പി സംസ്ഥാന നേതൃത്വത്തിനും ശശീന്ദ്രനും ഈ വിവാദത്തെ കുറിച്ച് അറിയില്ലായിരുന്നു എന്നാണ് അദ്ദേഹവും പറയുന്നത്.

പാര്‍ട്ടിയിലെ അഭിപ്രായവ്യത്യാസം പരിഹരിക്കാനാണ് ശശീന്ദ്രന്‍ വിളിച്ചത്. കേസ് ഒത്തുതീര്‍ക്കണമെന്ന് പറഞ്ഞിട്ടില്ല. ശശീന്ദ്രന്‍ ഇടപെട്ടാല്‍ പ്രശ്‌നം തീരുമെന്ന് പ്രാദേശിക നേതാക്കള്‍ പറഞ്ഞതുകൊണ്ടാണ് വിളിച്ചതെന്നും ചാക്കോ കഴിഞ്ഞ ദിവസം പറഞ്ഞിരുന്നു.