സിബി മലയില്‍ സംവിധാനം ചെയ്ത മോഹന്‍ ലാല്‍ ചിത്രമാണ് കിരീടം. 'കിരീടത്തില്‍ ' സേതുമാധവന്‍ പിന്തിരിഞ്ഞു നടക്കുന്ന രംഗത്തിലും സേതുമാധവന്റെയും ദേവിയുടെയും പ്രണയരംഗങ്ങളിലും നിറഞ്ഞു നില്‍ക്കുന്ന ഒരു പാലമുണ്ട് ഈ പാലം സ്ഥിതി ചെയ്യുന്നത് വെള്ളയാണി കായലിനടുത്താണ്. കിരീടം സിനിമ റിലീസ് ചെയ്തതിനു ശേഷം 'കിരീടം പാലം'എന്നറിയപ്പെട്ടിരുന്ന പാലത്തിനെ സംസ്ഥാന ടൂറിസം പദ്ധതിയില്‍ ഉള്‍പ്പെടുത്തിയിരിക്കുകയാണ് കേരള സര്‍ക്കാര്‍.

ഈ പ്രദേശത്തെ മാതൃക ടൂറിസം കേന്ദ്രമാക്കി ഉയര്‍ത്താനാണ് തീരുമാനമെന്ന് സ്ഥലത്തെ എം.എല്‍.എ യും വിദ്യാഭ്യാസ മന്ത്രിയുമായ വി.ശിവന്‍കുട്ടി അറിയിച്ചു. ഫേയ്‌സ് ബുക്കിലൂടെയാണ് മന്ത്രി പ്രഖ്യാപനം നടത്തിയത്. ലോക ടൂറിസം ദിനമായ ഇന്നായിരുന്നു 'കിരീടം പാലം' ടൂറിസം പദ്ധതി മന്ത്രി പ്രഖ്യാപിച്ചത്.കായലിനോട് ചേര്‍ന്ന് കുട്ടികള്‍ക്കു വേണ്ടി പാര്‍ക്ക്, കായല്‍ ഭംഗി ആസ്വദിക്കാനായുള്ള വിശ്രമ കേന്ദ്രം, കായലിലൂടെയുള്ള ബോട്ടിങ് സൗകര്യം, കായല്‍ വിഭവങ്ങള്‍ രുചിക്കാനുള്ള അവസരം തുടങ്ങിയവയാണ് പദ്ധതിയിലുണ്ടാകുന്നത്.

മന്ത്രി വി.ശിവന്‍കുട്ടിയുടെ ഫേയ്‌സ് ബുക്ക് പോസ്റ്റിന്റെ പൂര്‍ണരൂപം വായിക്കാം

'മൂന്നു പതിറ്റാണ്ട് മുമ്ബാണ് സിബി മലയില്‍ സംവിധാനം ചെയ്ത കിരീടം എന്ന ചിത്രം തിയ്യേറ്ററുകളെ കരയിച്ചത്. സേതുമാധവന്‍ പിന്തിരിഞ്ഞു നടക്കുന്ന രംഗവും സേതുമാധവന്റെയും ദേവിയുടെയും പ്രണയ രംഗങ്ങളും അടുത്ത കൂട്ടുകാരന്‍ ആയ കേശുവുമായി സംസാരിക്കുമ്‌ബോഴും ഒരു പാലം ഒരു മുഖ്യകഥാപാത്രം പോലെ സിനിമയോട് ചേര്‍ന്ന് നില്‍ക്കുന്നു.
കിരീടം പാലം എന്നും തിലകന്‍ പാലം എന്നുമൊക്കെ പ്രദേശവാസികള്‍ വിളിക്കുന്ന ഈ പാലം നില്‍ക്കുന്നത് നേമം മണ്ഡലത്തില്‍ ആണ്. നേമം മണ്ഡലത്തിലെ ജനപ്രതിനിധി എന്ന നിലയില്‍ ഈ പാലം സ്ഥിതി ചെയ്യുന്ന വെള്ളായണി തടാക പ്രദേശം ഒരു മാതൃകാ ടൂറിസ്റ്റ് കേന്ദ്രമായി ഉയര്‍ത്താന്‍ പദ്ധതി കൊണ്ടു വരുമെന്ന് അറിയിക്കുകയാണ്. പ്രകൃതിരമണീയമാണ് ഈ ഭൂപ്രദേശം. വിവിധ ഇനം പക്ഷികള്‍ ഈ പ്രദേശത്ത് കണ്ടുവരുന്നു. കായലിനോട് ചേര്‍ന്ന് കുടുംബത്തോടെ വന്നിരിക്കാനുള്ള കേന്ദ്രങ്ങള്‍, കായലില്‍ ബോട്ടിങ്, കായല്‍ വിഭവങ്ങള്‍ രുചിക്കാനുള്ള സൗകര്യം എന്നിവയൊക്കെ ഒരുക്കി സഞ്ചരികള്‍ക്ക് മികച്ച ആസ്വാദനം ഉറപ്പുവരുത്തുന്ന പദ്ധതി ആകുമിത്. ലോക ടൂറിസം ദിനത്തില്‍ തന്നെ ഇങ്ങനെ ഒരു പ്രഖ്യാപനം നടത്തുന്നതില്‍ അതിയായ സന്തോഷമുണ്ട്.'