കോവളം ബീച്ചിൽ ജെല്ലിഫിഷുകൾ നിറഞ്ഞുകൂടുന്നു. അസഹ്യമായ ദുർഗന്ധമായതിനാൽ പ്രദേശവാസികൾക്കും സഞ്ചാരികൾക്കും തലവേദന ആയിരിക്കുകയാണ്. ഒരാഴ്ചയായി തിരമാലകളുടെ ശക്തിയില്‍ കരയിലേക്ക് നൂറുകണക്കിന് ജെലി ഫിഷുകളാണ് വന്നടിയുന്നത്.

കടൽ ചൊറികൾ എന്നറിയപ്പെടുന്ന ഇവയെ കുഴിച്ച്‌ മൂടാനുള്ള ശുചികരണ തൊഴിലാളികളുടെ ശ്രമങ്ങൾക്കും കാര്യമായ രീതിയിൽ ഫലം കാണാൻ ഇതുവരെയും കഴിഞ്ഞില്ല.

സാധാരണ ആഗസ്റ്റ് മാസത്തിലാണ് ജെല്ലിഫിഷുകൾ കടൽ തീരത്തേക്ക് അടിയുന്നത്. എന്നാല്‍ ഇത്തവണ ഇവയുടെ എണ്ണം കൂടുതലാണെന്ന് തൊഴിലാളികള്‍ പറയുന്നു. കടല്‍ത്തിരകള്‍ക്കൊപ്പം കാലം തെറ്റിയുള്ള ചൊറിയുടെ വരവ് ദിവസങ്ങള്‍ കഴിഞ്ഞിട്ടും ഇത് അവസാനിക്കാതെ തുടരുകയാണ്.

ഇതിനോടകം തന്നെ ടണ്‍ കണക്കിന് കടല്‍ ചൊറികളെയാണ് ശുചീകരണ തൊഴിലാളികള്‍ കടൽ തീരത്തിന് സമീപത്ത് കുഴിച്ചുമൂടിയത്. എങ്കിലും ഉള്‍ക്കടലില്‍ നിന്നുള്ള വരവ് മാറ്റമില്ലാതെ തുടരുകയാണ്. മണലില്‍ പറ്റിപ്പിടിച്ചിരുന്ന് അലിയുന്ന ഇവ രൂക്ഷഗന്ധം പരത്തുന്നതോടൊപ്പം ബീചിനെ വൃത്തിഹീനമാക്കുകയും ചെയ്യുന്നതായി നാട്ടുകാര്‍ പറഞ്ഞു.