ജയില്‍ മോചിതനാകുന്ന ബിനീഷ് കോടിയേരിയെ ഇനി നമ്മളറിയുക പുതിയൊരാളായി. ഇന്നലെ വരെ ബിനീഷിനെ കണ്ടവര്‍, പരിചയപ്പെട്ടവര്‍ നാളെ മുതല്‍ ബിനീഷിനെ കാണുന്നത് പുതിയൊരു രൂപത്തിലും ഭാവത്തിലുമായിരിക്കും. കാരണം ഒരു കൊല്ലത്തെ ജയില്‍വാസം ബിനീഷിനെ മാനസാന്തരപ്പെടുത്തിയിരിക്കുന്നു.

ഒരു മനുഷ്യന്‍ സ്വജീവിതത്തില്‍ അനുഭവിക്കുന്നതെല്ലാം ഒരു വര്‍ഷം കൊണ്ട് അനുഭവിച്ചു. തീര്‍ത്തും നിന്ദ്യമായ ഒരു സാഹചര്യമാണ് ജയിലില്‍ ഉണ്ടായിരുന്നത്. എത്ര വലിയവനാണെങ്കിലും താഴെ പോകാന്‍ ഒരു നിമിഷം മതിയെന്ന് ബിനീഷ് പഠിച്ചു. സ്വാധീനത്തിനും പണത്തിനും ജീവിതത്തില്‍ ഒരു സ്ഥാനവുമില്ലെന്ന് ബിനീഷ് മനസിലാക്കി.

കേരളത്തിനകത്തും പുറത്തുമായി കോടിയേരിയുടെ ഭാര്യ നടത്തിയ നിരവധി അനവധി പൂജകളുടെയും വഴിപാടുകളുടെയും ഫലമായിട്ടാണ് ബിനീഷ് പുറത്തിറങ്ങുന്നത്. ബിനീഷിന്റെ ഭാര്യ ക്രൈസ്തവ ആചാരപ്രകാരമുള്ള പൂജകളും നടത്തി. ഇതിന്റെയെല്ലാം ഫലമായാണ് മകന്‍ പുറത്തിറങ്ങിയതെന്ന് ഇവര്‍ വിശ്വസിക്കുന്നു.

ലഹരി ഇടപാടുമായി ബന്ധപ്പെട്ട കള്ളപ്പണം വെളുപ്പില്‍ കേസില്‍ ജാമ്യം ലഭിച്ച ബിനീഷ് കോടിയേരി ഇന്ന് ജയില്‍ മോചിതനാകും. ഒരു വര്‍ഷത്തെ ജയില്‍വാസത്തിന് ശേഷമാണ് പുറത്തിറങ്ങുന്നത്.



കോടതിയുടെ അനുമതിയില്ലാതെ രാജ്യം വിടരുത്, വിചാരണക്കോടതി എപ്പോള്‍ വിളിച്ചാലും ഹാജരാകണം, സമാന കുറ്റകൃത്യങ്ങളില്‍ ഏര്‍പ്പെടരുത്, അഞ്ച് ലക്ഷം രൂപയുടെ രണ്ട് ആള്‍ജാമ്യം നല്‍കണം തുടങ്ങിയ കര്‍ശന ഉപാധികളോടെയാണ് കര്‍ണാടക ഹൈക്കോടതി ബിനീഷിന് ജാമ്യം അനുവദിച്ചത്.

വിചാരണ കോടതിയിലെ നടപടി ക്രമങ്ങള്‍ പൂര്‍ത്തിയാകുന്ന മുറക്ക് മോചന ഉത്തരവ് ജയില്‍ വകുപ്പിന് ലഭിക്കും.സഹോദരന്‍ ബിനോയ് കോടിയേരിക്കൊപ്പം ബിനീഷ് റോഡ് മാര്‍ഗം തിരുവനന്തപുരത്തേക്ക് തിരിക്കുമെന്നാണ് സൂചന.കഴിഞ്ഞ ഡിസംബറിലും ഫെബ്രുവരിയിലും വിചാരണക്കോടതി ജാമ്യഹര്‍ജി തള്ളിയതിനെത്തുടര്‍ന്ന് ഏപ്രിലില്‍ ബിനീഷ് കര്‍ണാടക ഹൈക്കോടതിയെ സമീപിക്കുകയായിരുന്നു.

കോടിയേരിയുടെ വീട്ടില്‍ ഇന്ന് ആഹ്ലദത്തിന്റെ ദീപാവലിയാണ്. ബിനീഷ് എത്തിയാലുടന്‍ ക്ഷേത്ര ദര്‍ശനമാണ് അമ്മ ആസൂത്രണം ചെയ്തിരിക്കുന്നത്. വഴിപാട് നേര്‍ന്ന ക്ഷേത്രങ്ങളിലൊക്കെ ബിനീഷ് സന്ദര്‍ശിക്കും. മുമ്പും അദ്ദേഹം ക്ഷേത്ര ദര്‍ശനങ്ങള്‍ നടത്താറുണ്ടായിരുന്നു.

ജാതക പ്രകാരം ബിനീഷിന് തീര്‍ത്തും മോശപ്പെട്ട സമയമാണ്. കാരാഗ്രഹ വാസമോ അതിന് സമാനമായ അനുഭവങ്ങളോ ഉണ്ടാകുമെന്ന് അദ്ദേഹത്തിന്റെ ജാതകം പരിശോധിച്ച ജ്യോതിഷികള്‍ പ്രവചിച്ചിരുന്നു. മുന്‍കരുതലെടുക്കാന്‍ ബിനീഷിന് മാതാപിതാക്കള്‍ മുന്നറിയിപ്പ് നല്‍കിയിരുന്നെങ്കിലും അദ്ദേഹം അനുസരിച്ചില്ല. അതിന്റെ ഫലമാണ് ഇപ്പോള്‍ അനുഭവിക്കുന്നത് .

ബിനീഷിന് ശത്രുദോഷം ഭയങ്കരമാണ്. സമയദോഷം വന്നതോടെ ശത്രുക്കളുടെ ബലം വര്‍ധിച്ചു. എന്നാല്‍ തന്നെ ജയിലില്‍ അടയ്ക്കു മെന്ന് ഒരിക്കലും ബിനീഷ് വിശ്വസിച്ചില്ല.ശത്രുക്കളെല്ലാം ബിസിനസ് വഴി ഉണ്ടായതാണ്.അതില്‍ രാഷ്ട്രീയമില്ല.എന്നാല്‍ ബി ജെ പി ക്കെതിരെ കോടിയേരി സ്വീകരിക്കുന്ന വിട്ടുവീഴ്ചയില്ലായ്മ തന്റെ മേല്‍ ഇടിത്തീയായി വീണെന്ന് ബിനീഷ് വിശ്വസിക്കുന്നു. തന്റെ അനുഭവം തന്നെയാണ് ആര്യന്‍ഖാ നുണ്ടായതെന്നും ബിനീഷ് കരുതുന്നു.

ശബരിമല വിഷയത്തില്‍ കോടിയേരി എടുത്ത നിലപാടുകള്‍ കുടുംബത്തിന് ദോഷമുണ്ടാക്കിയതായി ബിനീഷും അമ്മയും വിശ്വസിക്കുന്നു. ഇതിനുള്ള പരിഹാരമാര്‍ഗ്ഗങ്ങള്‍ നടത്തേണ്ടതുണ്ട്. ബിനീഷിന് ശബരിമലയില്‍ പോകാന്‍ ആഗ്രഹമുണ്ട്.അടുത്ത മണ്ഡലകാലത്ത് അദ്ദേഹം ശബരിമലയില്‍ ദര്‍ശനം നടത്താന്‍ സാധ്യതയുണ്ട്.

കോടിയേരിക്ക് രോഗം സ്ഥിരീകരിച്ചത് ശബരിമല വിവാദത്തിന് ശേഷമാണ്. ശബരിമലയില്‍ ഇടപെടരുതെന്ന് പലരും കോടിയേരിയോട് നിര്‍ദ്ദേശിച്ചതാണ്. എന്നാല്‍ അദ്ദേഹം അതിന് തയ്യാറായില്ല. പാര്‍ട്ടി നിലപാടിന് മറിച്ച് ചിന്തിക്കാന്‍ കോടിയേരിക്ക് കഴിയാത്തതായിരുന്നു കാരണം. ഏതായാലും ഇപ്പോഴത്തെ അനുഭവങ്ങള്‍ കോടിയേരിക്ക് നല്‍കുന്നതും പുതിയ പാഠങ്ങളാണ്.