സാധാരണക്കാര് നെട്ടോട്ടത്തില്.....വൈദ്യുതിനിരക്ക് കൂടിയതോടെ ഇടത്തരം വീടുകളില് രണ്ടുമാസത്തെ ബില്ലില് 150 രൂപവരെ അധികബാധ്യതയുണ്ടാവും, യൂണിറ്റിന് 20 മുതല് 60 വരെ പൈസ വരെ കൂട്ടി
വൈദ്യുതിനിരക്ക് കൂടിയതോടെ ഇടത്തരം വീടുകളില് രണ്ടുമാസത്തെ ബില്ലില് 150 രൂപവരെ അധികബാധ്യതയുണ്ടാവും. യൂണിറ്റിന് 20 മുതല് 60 വരെ പൈസയാണ് കൂട്ടിയത്.
എ.സി. ഒഴികെയുള്ള വൈദ്യുതോപകരണങ്ങളുള്ള, മൂന്നുമുറികളുള്ള ഒരു വീട്ടില് സാധാരണതോതില് രണ്ടുമാസം 300-350 യൂണിറ്റ് വൈദ്യുതി ഉപയോഗിക്കുന്നുണ്ട്. ഇത് 350 എന്ന് കണക്കാക്കിയാല് ഇപ്പോള് നല്കേണ്ടത് 1900 രൂപയാണ്. ഇതില് 150 രൂപയുടെ വര്ധനയുണ്ടാവുമെന്നാണ് വിലയിരുത്തുന്നത്.
രണ്ടുമാസത്തെ ഉപഭോഗം 250 യൂണിറ്റാണെങ്കില് നിലവില് ഏകദേശം 1300 രൂപയാണ് നല്കുന്നത്. ഇതില് നൂറുരൂപയുടെ വരെ വര്ധനയുണ്ടാവും.
രണ്ടുമാസത്തെ ഉപഭോഗം മുന്നൂറ് യൂണിറ്റില് ഒതുക്കിയാല് (മാസം 150 യൂണിറ്റ്) യൂണിറ്റിന് 25 പൈസ കൂടുതല് നല്കിയാല് മതി. എന്നാല്, മാസം 150ല് കൂടിയാല് വര്ധന യൂണിറ്റൊന്നിന് 40 പൈസയാവും.പുതിയ നിരക്കുകള് അനുസരിച്ച് ബില്ലില്വരുന്ന മാറ്റം കെ.എസ്.ഇ.ബി. ഇതുവരെ ഔദ്യോഗികമായി കണക്കുകൂട്ടിയിട്ടില്ല.
ഇടയ്ക്കുവെച്ച് കൂടിയാല് ബില് കണക്കാക്കുന്നത് ഇങ്ങനെ
ഇത്തവണ ശനിയാഴ്ച അര്ധരാത്രിമുതലാണ് നിരക്ക് കൂടിയത്. 60 ദിവസത്തിലൊരിക്കലാണ് മീറ്റര് റീഡിങ് പ്രകാരം ബില് കണക്കാക്കുന്നത്. ഈ കാലയളവിനുള്ളില് നിരക്ക് ഉയര്ന്നാല് ബില് കണക്കാക്കാന് കെ.എസ്.ഇ.ബി. സ്വീകരിക്കുന്ന രീതി ഇങ്ങനെ-
60 ദിവസത്തില് 40 ദിവസം പുതിയനിരക്കും 20 ദിവസം പഴയനിരക്കുമാണ് ബാധകമെന്നിരിക്കട്ടെ. ഈ ഉപഭോക്താവ് രണ്ടുമാസം 600 യൂണിറ്റും ഉപയോഗിച്ചെന്ന് കരുതുക. മൊത്തം ഉപഭോഗത്തെ 60 കൊണ്ട് ഹരിച്ചാല് ദിവസം 10 യൂണിറ്റ്. ഇതില് 40 ദിവസത്തേത് പഴയനിരക്കിലും 20 ദിവസത്തേത് പുതിയനിരക്കിലും കണക്കാക്കും. ഇത് രണ്ടും ചേര്ത്താണ് ബില്ല്. വന്കിട വ്യവസായ, വാണിജ്യ മേഖലയില് നിരക്ക് കൂടുന്നദിവസംതന്നെ അതുവരെയുള്ള മീറ്റര് റീഡിങ് രേഖപ്പെടുത്തി നിലവിലെ നിരക്കില് ബില് നല്കും. അതിനുശേഷം പുതിയ നിരക്ക് ബാധകമാക്കും.
അതേസമയം ബില്ലിനെ സംബന്ധിച്ച എന്തെങ്കിലും പരാതികളുണ്ടെങ്കില് വൈദ്യുതി റെഗുലേറ്ററി കമ്മിഷനെ അറിയിക്കാമെന്ന് ചെയര്മാന് പ്രേമന് ദിന്രാജ് പറഞ്ഞു. പരാതി പരിശോധനാ സംവിധാനം നിലവിലുണ്ട്. വിലാസം: സെക്രട്ടറി, വൈദ്യുതി റെഗുലേറ്ററി കമ്മിഷന്, കെ.പി.എഫ്.സി. ഭവനം, വെള്ളയമ്പലം, തിരുവനന്തപുരം-695010.
https://www.facebook.com/Malayalivartha