സിഇടിയില്‍ നിന്ന് സിംഗപ്പൂരിലേക്ക്; സിംഗപ്പൂര്‍ ഉപഗ്രഹങ്ങള്‍ക്ക് പിന്നിലെ മലയാളി സാന്നിദ്ധ്യം
ലോകത്തിലെ തന്നെ അഞ്ച് പ്രധാന സ്‌പേസ് ഏജന്‍സികളില്‍ ഒന്നാണ് ഇന്ത്യയുടെ അഭിമാനമായ ഐഎസ്ആര്‍ഒ. മറ്റു സ്‌പേസ് സെന്ററുകളുമായി താരതമ്യം ചെയ്യുമ്പോള്‍ ഏറ്റവും ചെലവ് കുറച്ചുതന്നെ ഉപഗ്രഹ വിക്ഷേപണം നടത്താന്‍ ഐഎസ്ആര്‍ഒയ്ക്ക് സാധിക്കും. നാളെ അത്തരത്തില്‍ സിംഗപ്പൂരിന്റെ മൂന്ന് ഉപഗ്രഹങ്ങള്‍ ശ്രീഹരിക്കോട്ടയില്‍ നിന്ന് വിക്ഷേപണത്തിന് തയ്യാറെടുത്തു കഴിഞ്ഞു. സിംഗപ്പൂരിലെ നന്യാംഗ് ടെക്‌നോളജിക്കല്‍ യൂണിവേഴ്‌സിറ്റിയില്‍ (എന്‍ടിയു) നിര്‍മ്മിക്കപ്പെട്ട ഈ ഉപഗ്രഹത്തിന്റെ മേല്‍നോട്ടചുമതല ഒരു മലയാളിക്കാണ്. തിരുവനന്തപുരം സ്വദേശിയായ ഡോ. അമല്‍ ചന്ദ്രന്.
തിരുവനന്തപുരത്ത് അമ്പലമുക്ക് സ്വദേശിയാണ് അമല്‍ ചന്ദ്രന്. ക്രൈസ്റ്റ് നഗറിലായിരുന്നു സ്‌കൂള്‍ വിദ്യാഭ്യാസം. തുടര്‍ന്ന് തിരുവനന്തപുരം എഞ്ചിനീയറിംഗ് കോളേജില്‍ (സി.ഇ.ടി) നിന്ന് ഇന്‍ഡസ്ട്രിയല്‍ എഞ്ചിനീയറിംഗില്‍ ബിരുദം നേടി. അക്കാലത്ത് കേരളത്തിലെ കോളേജുകളില്‍ ക്യാമ്പസ് റിക്രൂട്ടുമെന്റുകള്‍ അത്ര സജീവമല്ല. തുടര്‍ന്ന് അമേരിക്കയിലെ വെര്‍ജിന ടെക്ക് യൂണിവേഴ്‌സിറ്റിയില്‍ എംഎസിന് അഡ്മിഷന്‍ ലഭിച്ചു. അമേരിക്കയില്‍ ഉന്നതപഠനം ചെയ്യണമെന്ന അമലിന്റെ അഗ്രഹത്തിന് പിന്നിലെ പ്രധാന കാരണം ലോകപരിചയം നേടണമെന്നതായിരുന്നു. എയറോസ്‌പേസ് എഞ്ചിനീയറിംഗിലായിരുന്നു മാസ്‌റ്റേഴ്‌സ് പൂര്‍ത്തിയാക്കിയതെങ്കിലും മനസ് അതിലും ഉറച്ചു നിന്നില്ല. പിന്നീട് ഗവേഷണ മേഖലയിലേക്ക് കടന്നപ്പോഴാണ് ഉപഗ്രഹങ്ങളെ കുറിച്ചുള്ള ചിന്ത കടന്നുവന്നത്. ജീവിതത്തില്‍ പുതിയൊരു അദ്ധ്യായം അവിടെ തുറക്കുകയായിരുന്നു.
സാറ്റലൈറ്റ് ലോഞ്ചിന് മുന്നോടിയായി കഴിഞ്ഞ ദിവസം അദ്ദേഹം ഇന്ത്യയിലെത്തിയിട്ടുണ്ട്. സ്റ്റുഡന്റ് സാറ്റലൈറ്റ് സ്‌കീം അഥവാ എസ് ക്യൂബ് എന്നാണ് മിഷന് പേര് നല്‍കിയിരിക്കുന്നത്. എന്‍ടിയുവിലെ വിദ്യാര്‍ത്ഥികളാണ് രണ്ട് കിലോഗ്രാം മാത്രം ഭാരമുള്ള ഈ സാറ്റലൈറ്റ് നിര്‍മ്മിച്ചിരിക്കുന്നത്. എയറോ സ്‌പേസ് എഞ്ചിനീയറില്‍ നിന്ന് സിംഗപ്പൂരിലെ പ്രശസ്തമായ നന്യാംഗ് യൂണിവേഴ്‌സിറ്റിയിലെ സാറ്റലൈറ്റ് സെന്ററിന്റെ ഡയറക്ടര്‍ പദവിയില്‍ എത്തിനില്‍ക്കുകയാണ് അമല്‍ ചന്ദ്രന് ഇപ്പോള്‍. ആ യാത്രയെ കുറിച്ച് കേരളകൗമുദി ഓണ്‍ലൈനിന് നല്‍കിയ പ്രത്യേക അഭിമുഖത്തില്‍ അമല്‍ ചന്ദ്രന് മനസു തുറക്കുന്നു.
https://www.facebook.com/Malayalivartha
