രാജ്യവിരുദ്ധ പ്രവര്‍ത്തനങ്ങള്‍ നടത്തിയ പോപ്പുലര്‍ ഫ്രണ്ടിനും അനുബന്ധ സംഘടനയ്ക്കും നിരോധനമേര്‍പ്പെടുത്തിയിരിക്കുകയാണ് കേന്ദ്രസര്‍ക്കാര്‍. ഭീകരതയുടെ നീരാളി കൈകളറുക്കാന്‍ കേന്ദ്ര സര്‍ക്കാര്‍ കിണഞ്ഞ് പരിശ്രമിക്കുമ്പോഴും ഒളിഞ്ഞും തെളിഞ്ഞും ഭീകരസംഘടനകളുടെ സഹായം പറ്റി ഭരണം പിടിക്കുകയാണ് സിപിഎം.

പോപ്പുലര്‍ ഫ്രണ്ടിന് നിരോധനം ഏര്‍പ്പെടുത്തിയതോടെ എസ്ഡിപിഐയുടെ അകമഴിഞ്ഞ പിന്തുണയോടെ പാര്‍ട്ടി ഭരിക്കുന്ന പഞ്ചായത്തിന്റെയും നഗരസഭയുടെയും കാര്യത്തില്‍ എന്ത് തീരുമാനമെടുക്കുമെന്നാണ് ജനം ഉറ്റ് നോക്കുന്നത്. തീവ്രവാദ വിരുദ്ധനിലപാടുകള്‍ പ്രഖ്യാപിക്കുമ്പോഴും പത്തനംതിട്ട മല്ലപ്പള്ളി കോട്ടാങ്ങല്‍ പഞ്ചായത്ത് പ്രസിഡന്റ് പദത്തിലെത്താന്‍ എ്‌സ്ഡിപിഐ വോട്ട് സ്വീകരിച്ച സിപിഎം ഇനി അധികാരം കൈവിടാന്‍ തയ്യാറാകുമോ എന്നാണ് അണികള്‍ക്കിടയില്‍ നിന്നു പോലും ഉയരുന്ന വിമര്‍ശനം.

പത്തനംതിട്ടയില്‍ സ്‌കൂളില്‍ പോയ കുട്ടികളെ ഐ ആം ബാബ്‌റി ബാഡ്ജ് ധരിപ്പിച്ച് ഏറെ വിവാദത്തിലായ പഞ്ചായത്താണ് കോട്ടാങ്ങല്‍. അഭിമന്യു വധക്കേസിലെ പ്രതികളിലൊരാള്‍ കോട്ടാങ്ങലിലെ എസ്ഡിപിഐ പ്രവര്‍ത്തകനായിരുന്നിട്ടും ബന്ധം തുടരുന്നതില്‍ സാധാരണ പാര്‍ട്ടി പ്രവര്‍ത്തകര്‍ക്കും അമര്‍ഷം ഉണ്ട്.

പാര്‍ട്ടിയുടെ പരസ്യനിലപാടിലെ വെള്ളം ചേര്‍ക്കലിന്റെ ഏറ്റവും വലിയ ഉദാഹരണമായിട്ടാണ് ഇത് ചൂണ്ടിക്കാണിക്കപ്പെടുന്നത്. കോടതി വിധിയെ തുടര്‍ന്നാണ് ഭരണം നടത്തുന്നതെന്നാണ് കോട്ടാങ്ങല്‍ ഗ്രാമപഞ്ചായത്ത് ഭരണസമിതി അംഗങ്ങളുടെ വാദം. കോട്ടാങ്ങലില്‍ എസ്ഡിപിഐ പിന്തുണയോടെ അധികാരത്തിലേറിയ ഭരണസമിതി രാജി വെച്ചിരുന്നു.എന്നാല്‍ നിയമസഭ തിരഞ്ഞെടുപ്പിനു ശേഷം നടന്ന പഞ്ചായത്ത് പ്രസിഡന്റ് തിരഞ്ഞെടുപ്പില്‍ സിപിഎം എസ്ഡിപിഐയുടെ പിന്തുണ സ്വീകരിക്കുകയായിരുന്നു. ആവണിശ്ശേരി പഞ്ചായത്തിലെ പ്രസിഡന്റ് തിരഞ്ഞെടുപ്പുമായി ബന്ധപ്പെട്ടുള്ള ഹൈക്കോടതി വിധിയുടെ അടിസ്ഥാനത്തില്‍ എസ്ഡിപിഐ പിന്തുണ തങ്ങള്‍ സ്വീകരിക്കുകയായിരുന്നു എന്നാണ് കോട്ടാങ്ങല്‍ ഗ്രാമപഞ്ചായത്ത് പ്രസിഡന്റ് പറയുന്നത്.

പത്തംതിട്ട നഗരസഭയിലും എസ്ഡിപിഐയുമായുള്ള രഹസ്യ കൂട്ടു കെട്ടിലാണ് ഭരണം മുന്നോട്ട് കൊണ്ടുപോകുന്നത്. ഇരാറ്റുപേട്ട മുന്‍സിപ്പാലിറ്റിയില്‍ അവിശ്വാസ പ്രമേയത്തില്‍ എസ്ഡിപിഐയുടെ പിന്തുണയോടെ യുഡിഎഫിന്റെ ഭരണ സമിതിയെ താഴയിറക്കിയ ചരിത്രമുണ്ട് സിപിഎമ്മിന്. മുന്‍പ് മലപ്പുറം വേങ്ങര പറപ്പൂര്‍ പഞ്ചായത്തില്‍ സിപിഎമ്മും ഒരു വിഭാഗം കോണ്‍ഗ്രസും എസ്ഡിപഐ വെല്‍ഫയര്‍ പാര്‍ട്ടിയും ചേര്‍ന്ന് ജനകീയമുന്നണിയുണ്ടാക്കി ഭരണം പിടിച്ചെടുത്തതും. പാര്‍ട്ടികളുടെ ഇരട്ടത്താപ്പിന് ഉദാഹരണങ്ങളാണ്.