ലൈഫ് മിഷനിലുൾപ്പെട്ട ഒരു കുടുംബത്തിന് കൂര പണിയാൻ നല്കുന്നത് നാല് ലക്ഷം രൂപ അതും ഘട്ടം ഘട്ടമായി. ! പലർക്കും ഘട്ടം ഘട്ടമായി കിട്ടുന്ന തുക ആയതിനാൽ തന്നെ പലപ്പോഴും വീടു പണിയെന്നത് കടമ്പയായി മാറുന്നുമുണ്ട്. ബിൽഡിംഗ് മെറ്റീരിയൽസിന് നിലവിലുള്ള ഉയർന്ന വില കാരണം കിട്ടുന്ന നാല് ലക്ഷം കൊണ്ട് ഒരു മുറി പോലും നേരെ ചൊവ്വേ വയ്ക്കുവാൻ കഴിയുന്നില്ലെന്നത് പച്ചയായ നേരാണ്. എന്നാൽ പോലും പി.ആർ വർക്കുകാർ നിറുത്താതെ പണിയെടുക്കുന്നത് കൊണ്ട് ലൈഫ് മിഷൻ പദ്ധതിക്ക്, ( PMYJ എന്ന കേന്ദ്ര പദ്ധതിയുടെ ഭാഗമാണെങ്കിലും) പിണറായി സർക്കാർ വീട് നല്കുന്നേ എന്ന വമ്പിച്ച ഹൈപ്പാണ് ഇവിടെ.

ജീവിത പ്രാരാബ്ദങ്ങളുടെ ഭാരം ചുമന്ന് ചുമന്ന് വേച്ചു വീണു പോകുന്ന മനുഷ്യർക്ക് ജീവിത സായാഹ്നത്തിലെങ്കിലും കയറി കിടക്കാനൊരു നാലു കാൽ പുരയെന്ന സ്വപ്നത്തിന് സർക്കാർ നാല് ലക്ഷം രൂപ നാലായിരം ഉപാധികളോടെ വിലയിടുന്ന നാട്ടിലാണ് അതേ ജനങ്ങളുടെ നികുതിപ്പണമെടുത്ത് സഖാവ് പി.ജയരാജന് 35 ലക്ഷത്തിൻ്റെ ഗതാഗത സൗകര്യം നല്കുന്നത്. അതിന് പറയുന്ന ന്യായീകരണമാണ് അന്യായം. RSS കാരുടെ ആക്രമണം കാരണം ശാരീരികമായ ബുദ്ധിമുട്ട് അനുഭവിക്കുന്ന സഖാവിൻ്റെ ശാരീരിക അസ്വസ്ഥകൾ കണക്കിലെടുത്ത് ജോലിക്ക് പോകാനാണത്രേ ഈ 35 ലക്ഷം രൂപയുടെ വാഹനമെന്ന്.

അപ്പോൾ ന്യായമായും കോമൺസെൻസ് ഉള്ള മനുഷ്യർക്ക് മനസ്സിൽ വരുന്ന ഒരു ചോദ്യമുണ്ട് - ഈ ശാരീരിക അസ്വസ്ഥതയുള്ള സഖാവിന് വിശ്രമജീവിതം നല്ക്കുന്നതിന് പകരം എന്തിനാണ് ഖാദി ബോർഡ് ചെയർമാൻ എന്ന കസേര? ആ കസേരയില്ലെങ്കിൽ വീട്ടിലിരുന്ന് യഥേഷ്ടം വിശ്രമിക്കാമല്ലോ! അപ്പോൾ 35 ലക്ഷം രൂപയുടെ ലക്ഷ്യറി കാറും വേണ്ടല്ലോ! അങ്ങനെങ്കിൽ പൂച്ച പെറ്റു കിടക്കുന്നു എന്ന് ബാലഗോപാൽ സഖാവ് പറഞ്ഞ ഖജനാവിൽ നിന്ന് 35 ലക്ഷം പോവില്ലല്ലോ! ശാരീരിക അസ്വസ്ഥതയുള്ള ഒരു സഖാവിനെ ആ തസ്തികയിൽ ഇരുത്തിയാൽ അതു കൊണ്ട് ആ സ്ഥാപനത്തിന് എന്ത് ഗുണം? ചോദ്യങ്ങൾ ഒരുപാട് ഉണ്ട്! പക്ഷേ ഉത്തരം മെഴുകൽസ് മാത്രം!

പ്രബുദ്ധ കേരളത്തിൽ, പട്ടിണിപ്പാവങ്ങളുടെ രക്ഷകരെന്ന വ്യാജേന അധികാരത്തിൽ കയറി , അവരെ വഞ്ചിച്ച്, അവർക്ക് കിട്ടേണ്ടുന്ന ആനുകൂല്യങ്ങൾ അപഹരിച്ച്, സുഖഭോഗങ്ങൾ മാത്രം ഞെക്കിപ്പിഴിഞ്ഞെടുത്തു നുണയുന്ന മനുഷ്യർക്കും അവരുടെ സ്തുതിപാഠകർക്കും ലേശമെങ്കിലും ഉളുപ്പ് ഉണ്ടോ? ങ്ങേ ഹേ എവിടെ?!!