ഞെട്ടിത്തരിച്ച് ത്രിമെന് ആര്മി... മുസ്ലീം ലീഗ് നേതാക്കളെ കണ്ടതിന് പിന്നാലെ ശശീ തരൂര് കാണുന്നത് കോണ്ഗ്രസ് നേതാക്കള്ക്ക് താങ്ങും തണലുമായി നിന്ന ആര്ച്ച് വിഷപ്പുമാരെ; വിഭാഗീയ പ്രവര്ത്തനമെന്ന സതീശന്റെ വിമര്ശനത്തിനിടെ മലബാര് പര്യടനം കൊഴുപ്പിക്കുന്നു; തലശ്ശേരി ആര്ച്ച് ബിഷപ്പുമായി കൂടിക്കാഴ്ച
രമേശ് ചെന്നിത്തല, വിഡി സതീശന്, കെസി വേണുഗോപാല് എന്നീ മുഖ്യമന്ത്രി പദം സ്വപ്നം കണ്ടു നടക്കുന്ന ത്രിമെന് ആര്മികള്ക്ക് ശക്തമായ പ്രഹരമാണ് ശശി തരൂരിന്റെ മലബാര് പര്യടനം. കോണ്ഗ്രസ് നേതാക്കളുടെ കണ്ണിലെ കൃഷ്ണമണികളാണ് മുസ്ലീം ലീഗ് നേതാക്കള്, ആര്ച്ച് ബിഷപ്പുമാര്, എന്എസ്എസ്, എസ്എന്ഡിപി നേതാക്കള്. അവ ഒന്നൊന്നായി ശശി തരൂര് ഏറ്റെടുക്കുകയാണ്.
മുസ്ലീം ലീഗ് നേതാക്കളെ കണ്ടതിന് പിന്നാലെ ശശിതരൂര് ഇന്ന് കണ്ണൂര് ജില്ലയില് പര്യടനം നടത്തും. രാവിലെ തലശ്ശേരി ആര്ച്ച് ബിഷപ്പ് മാര് പാംപ്ലാനിയുമായി അദ്ദേഹത്തിന്റെ വസതിയില് കൂടിക്കാഴ്ച നടത്തും. ശേഷം 11 മണിയോടെ കണ്ണൂര് ചേംബര് ഹാളില്, ജനാധിപത്യം മതേതരത്വം രാഷ്ട്രീയ സമകാലിക ഇന്ത്യയില്, എന്ന വിഷയത്തില് സെമിനാറില് പങ്കെടുക്കും. ചേംബര് ഹാളില് ജില്ലാ കോണ്ഗ്രസ് കമ്മിറ്റി തീരുമാനിച്ച ഈ പരിപാടി ജവഹര് ലൈബ്രറിയുടെ നേതൃത്വത്തില് ഏറ്റെടുത്ത് നടത്തുമെന്ന് ഡിസിസി അധ്യക്ഷന് അറിയിച്ചത് വിവാദമായിരുന്നു.
ഉച്ചക്ക് ശേഷം മുന് ഡിസിസി അധ്യക്ഷന് അന്തരിച്ച സതീശന് പാച്ചേനിയുടെ വീട് സന്ദര്ശിക്കും. ഇന്നലെ മലപ്പുറത്ത് പര്യടനം നടത്തിയ തരൂര് പാണക്കാട്ടെത്തി ലീഗ് നേതാക്കളുമായും കൂടിക്കാഴ്ച നടത്തിയിരുന്നു.
സംസ്ഥാനത്ത് കോണ്ഗ്രസ് പാര്ട്ടിക്കകത്ത് സമാന്തര പ്രവര്ത്തനത്തിന് ആരെയും അനുവദിക്കില്ലെന്ന് പ്രതിപക്ഷ നേതാവ് വിഡി സതീശന് പറഞ്ഞതിന് പിന്നാലെ ശശി തരൂര് ശക്തമായ മറുപടി നല്കി. കോണ്ഗ്രസില് ഇനി ഒരു ഗ്രൂപ്പുണ്ടാക്കാന് തനിക്ക് ഒരു ലക്ഷ്യവുമില്ലെന്ന് ശശി തരൂര് പറഞ്ഞു. അതിന് താല്പര്യവുമില്ല. എ,ഐ ഗ്രൂപ്പുകള് ഉള്ള പാര്ട്ടിയില് ഇനി ഒരു അക്ഷരം വേണമെങ്കില് അത് യു ആണെന്നും യുണൈറ്റഡ് കോണ്ഗ്രസ് ആണ്. പാര്ട്ടിയെ ഒരുമിപ്പിച്ച് മുന്നോട്ടു കൊണ്ടുപോകാനാണ് ശ്രമിക്കുന്നത്. ഒരു വിഭാഗീയ പ്രവര്ത്തനത്തിനും താനില്ലെന്നും തരൂര് പറഞ്ഞു.
പാണക്കാട്ടെ തന്റെ സന്ദര്ശനത്തില് ഒരു അസാധാരണത്വവും ഇല്ല. മലപ്പുറത്ത് എത്തുമ്പോഴെല്ലാം ഇവിടെ എത്താറുണ്ട്. പൊതു രാഷ്ട്രീയ കാര്യങ്ങള് ലീഗുമായി ചര്ച്ച ചെയ്തു. എന്നാല് കോണ്ഗ്രസിലെ ആഭ്യന്തര കാര്യങ്ങള് ചര്ച്ച ആയില്ലെന്നും തരൂര് പറഞ്ഞു. പാണക്കാട് സന്ദര്ശനത്തിന് ശേഷം തരൂര് മലപ്പുറം ഡിസിസിയിലും എത്തും. 10 മണിക്ക് പെരിന്തല്മണ്ണ ഹൈദരലി ശിഹാബ് തങ്ങള് സിവില് സര്വീസ് അക്കാദമിയില് വിദ്യാര്ഥികളോട് സംവദിച്ച ശേഷം തരൂര് കോഴിക്കോട്ടേക്ക് മടങ്ങി.
ശക്തമായ ഭാഷയിലാണ് പ്രതിപക്ഷ നേതാവ് വിഡി സതീശന് ഇന്നലെ പ്തികരിച്ചത്. ഇനി ഒരു വിഭാഗീയതയ്ക്ക് കോണ്ഗ്രസിന് ബാല്യമില്ല. എല്ലാ നേതാക്കള്ക്കും പാര്ട്ടിയില് സ്പേസുണ്ട്. കോണ്ഗ്രസിനെ തകര്ക്കാനുള്ള അജണ്ട വച്ച് പൊറുപ്പിക്കില്ല. കേരളത്തിലെ കോണ്ഗ്രസ് ഒരു ടീമായാണ് പ്രവര്ത്തിക്കുന്നതെന്നും അദ്ദേഹം പറഞ്ഞു. ശശി തരൂര് മലബാര് ജില്ലകളില് നടത്തുന്ന പര്യടനത്തിന്റെ പശ്ചാത്തലത്തിലായിരുന്നു പ്രതിപക്ഷ നേതാവിന്റെ പ്രസ്താവന.
അതേസമയം ശശി തരൂര് മലബാറില് പര്യടനം നടത്തുകയാണ്. കോണ്ഗ്രസിന്റെ ഉന്നത നേതൃത്വത്തില് നിന്ന് അപ്രഖ്യാപിത വിലക്കുകള് ഉണ്ടെങ്കിലും അതിനെ ലംഘിച്ച് കൊണ്ടാണ് അദ്ദേഹം മുന്നോട്ട് പോകുന്നത്. സംസ്ഥാന കോണ്ഗ്രസില് ഒരു വിഭാഗം അദ്ദേഹത്തോടൊപ്പമുണ്ട്. മുസ്ലിം ലീഗ് നേതൃത്വത്തിന്റെ ഉറച്ച പിന്തുണയും അദ്ദേഹത്തിനുണ്ട്. ഇന്നലെ പാണക്കാട് തറവാട്ടിലെത്തി മുതിര്ന്ന മുസ്ലിം ലീഗ് നേതാക്കളുമായി അദ്ദേഹം രാഷ്ട്രീയ വിഷയങ്ങള് സംസാരിച്ചു.
ശശി തരൂരിന്റെ സന്ദര്ശനത്തെ നല്ല രീതിയിലാണ് മുസ്ലിം ലീഗ് നേതൃത്വം സ്വീകരിച്ചത്. ഇതിന് ശേഷം മലപ്പുറം ഡിസിസിയില് എത്തിയ ശശി തരൂരിനെ സ്വീകരിക്കാന് കെപിസിസി ജനറല് സെക്രട്ടറി ആര്യാടന് മുഹമ്മദ്, ജില്ലയിലെ ഏക കോണ്ഗ്രസ് എംഎല്എ എപി അനില്കുമാര് തുടങ്ങി പ്രമുഖ നേതാക്കളാരും എത്തിയില്ലെന്നത് സംസ്ഥാനത്തെ കോണ്ഗ്രസില് ശശി തരൂരിനെതിരായ ഒരു വിഭാഗത്തിന്റെ നിലപാട് അടിവരയിട്ട് തെളിയിക്കുന്നതായി. എന്നാല് ശശി തരൂരിന് വലിയ സ്വീകാര്യതയാണ് ലഭിക്കുന്നത്.
https://www.facebook.com/Malayalivartha
