പരുന്ത് തേനീച്ചക്കൂട് ഇളക്കി... കവുങ്ങില്‍ കയറി പറിച്ചെടുത്ത അടയ്ക്ക ചാക്കിലാക്കുന്നതിനിടെ തേനീച്ചയുടെ കൂട്ടമായെത്തിയുള്ള ആക്രമണത്തില്‍ ഒരു മരണം.... രണ്ടുപേര്‍ക്ക് പരിക്കേറ്റു.

പെരുമണ്ണ പാറമ്മല്‍ പൂവ്വത്തുംകണ്ടി നടക്കാവില്‍ ചന്ദ്രന്‍(68) ആണ് മരിച്ചത്. പെരുവയല്‍ കായലം പള്ളിത്താഴം മൂസ്സ(67), വാഴക്കാട് അനന്തായൂര്‍ നടയംകുന്നത്ത് അഭിലാഷ്(38) എന്നിവര്‍ക്കാണ് പരുക്കേറ്റത്. ഇന്നലെ രാവിലെ 11.30-ന് പെരുമണ്‍പുറയിലാണ് സംഭവം. പെരുമണ്‍പുറ പിലാക്കാട്ടുതാഴം പൊറ്റപറമ്പില്‍ അടയ്ക്ക പറിക്കാനെത്തിയതായിരുന്നു മൂവരും.

കവുങ്ങില്‍ കയറി പറിച്ചെടുത്ത അടയ്ക്ക ചാക്കിലേക്ക് മാറ്റുന്നതിനിടെ ചന്ദ്രനെയാണ് കൂട്ടമായെത്തിയ തേനീച്ച ആദ്യം ആക്രമിക്കുന്നത്.
ശരീരം മുഴുവന്‍ തേനീച്ച പൊതിഞ്ഞ ചന്ദ്രനെ രക്ഷിക്കാനായി ശ്രമിക്കുന്നതിനിടെയാണ് മൂസ്സയുടെയും അഭിലാഷിന്റെയും നേര്‍ക്ക് തേനീച്ചകൂട്ടം പറന്നെത്തിയത്.

കൂട്ടത്തോടെയുള്ള തേനീച്ചയുടെ ആക്രമണത്തില്‍ ഇവര്‍ നിലവിളിച്ചു. ഇതു കേട്ടെത്തിയ സമീപവാസികളാണ് വെള്ളം കോരിയൊഴിച്ചും മറ്റും മൂവരെയും രക്ഷപ്പെടുത്തി കോഴിക്കോട് മെഡിക്കല്‍ കോളേജ് ആശുപത്രിയിലെത്തിക്കുന്നത്. എന്നാല്‍, ആശുപത്രിയിലെത്തുമ്പോഴേക്കും ചന്ദ്രന്‍ മരിച്ചിരുന്നു. ഭാര്യ: രമണി(കോഴിക്കോട് കോര്‍പ്പറേഷന്‍). മക്കള്‍: രതീഷ്(ഫ്‌ളിപ്പ് കാര്‍ട്ട്), രമ്യ(സിവില്‍ പോലീസ് ഓഫീസര്‍, മാവൂര്‍ സ്റ്റേഷന്‍), രഞ്ജിത്ത്(ജെ.ബി. ഫാര്‍മ, റീജണല്‍ മാനേജര്‍). മരുമക്കള്‍: നീമ, രാജേഷ്, അശ്വതി. സംസ്‌കാരം ഇന്ന് ഉച്ചയ്ക്ക് 12 മണിക്ക് മാങ്കാവ് ശ്മശാനത്തില്‍ നടക്കും


അതേസമയം പറന്നെത്തിയ പരുന്ത് തേനീച്ചക്കൂട് ഇളക്കിവിട്ടതാണ് പെരുമണ്‍പുറയില്‍ ഒരാളുടെ ദാരുണമരണത്തിനിടയാക്കിയത്.ഇന്നലെ രാവിലെ 11.30-ഓടെയാണ് പിലാക്കാട്ട് പറമ്പിലുള്ള, വലിയ പ്ലാവിന്റെ കൊമ്പിന്‍ മുകളില്‍ നാലടിയോളം നീളവും വീതിയുമുള്ള തേനീച്ചക്കൂട്ടില്‍ പരുന്ത് തേന്‍കുടിക്കാനെത്തിയത്. തേനീച്ചക്കൂട് ഇളകിയതോടെ തേനീച്ചകളൊന്നാകെ പരുന്തിന് പിറകെ പാഞ്ഞു. ഇതില്‍നിന്നും രക്ഷപ്പെടാനായി 40 മീറ്ററോളം അകലെയുള്ള തൊട്ടടുത്ത പിലാക്കാട്ടുതാഴം പറമ്പിലെ കവുങ്ങിന്‍ മുകളിലേക്കാണ് പരുന്ത് പറന്നെത്തിയത്.

ഈ സമയം, കവുങ്ങില്‍നിന്ന് പറിച്ചെടുത്ത അടയ്ക്ക ചാക്കില്‍ കെട്ടിക്കൊണ്ടിരിക്കുകയായിരുന്നു പാറമ്മല്‍ പൂവത്തുംകണ്ടി നടക്കാവില്‍ ചന്ദ്രനും പെരുവയല്‍ കായലം പള്ളിത്താഴം മൂസ്സ, വാഴക്കാട് അനന്തായൂര്‍ നടയംകുന്നത്ത് അഭിലാഷ് എന്നിവരും.കുവുങ്ങിന്‍ മുകളിലെത്തിയ പരുന്ത് പറന്നുമാറിയതോടെ ചുവടെയുണ്ടായിരുന്ന ചന്ദ്രന് നേരെയാണ് തേനീച്ചക്കൂട്ടം ആദ്യം പറന്നെത്തുന്നത്. ശരീരമാകെ തേനീച്ച പൊതിഞ്ഞ ചന്ദ്രന്‍ നിലത്തുകിടന്ന് ഉരുണ്ടെങ്കിലും ഇവ ഒഴിഞ്ഞുപോയില്ല. കൂടെ ജോലിചെയ്തിരുന്നവര്‍ രക്ഷപ്പെടുത്താന്‍ ശ്രമിച്ചെങ്കിലും ഇവരെയും തേനീച്ചക്കൂട്ടം ആക്രമിച്ചു.