ആലപ്പുഴ കലക്ടർ വി ആർ കൃഷ്ണ തേജ കുട്ടികൾക്കായി നിരവധി പോസ്റ്റുകൾ പങ്കുവയ്ക്കാറുണ്ട്. ഇദ്ദേഹം കുട്ടികൾക്കിടയിൽ അറിയപ്പെടുന്നത് 'കലക്ടർ മാമ'നെന്നാണ്. കഴിഞ്ഞ ദിവസം തന്റെ ഒഫീഷ്യൽ പേജിൽ പങ്കുവച്ച ഒരു മൂന്നാം ക്ലാസുകാരന്റെ വീഡിയോ വൈറലായി. കലക്ടർ മാമന്റെ കൈയ്യിൽ ഓണവും വിഷുവും ഒക്കെ അടിച്ച് പൊളിക്കാനായി അവൻ സൂക്ഷിച്ച് വച്ച പണം കൊണ്ട് കൊടുക്കുന്നതാണ്. സംസ്ഥാന സര്‍ക്കാരിന്റെ ബാലനിധി പദ്ധതിയിലേക്ക് സംഭാവനയായി ആണ് അവൻ അത് നൽകിയത്. നിർധനരായ കുട്ടികൾക്ക് പുസ്തകവും കളിപ്പാട്ടവുമൊക്കെ വാങ്ങാനായി ഉള്ള സർക്കാരിന്റെ പദ്ധതിയാണ് ബാലനിധി.

പോസ്റ്റിന്റെ പൂർണ രൂപം

കഴിഞ്ഞ ദിവസം ഓഫീസിൽ വെച്ച് പൊതുജനങ്ങളെ കാണുന്നതിനിടയിലാണ് കയ്യിലൊരു കവറുമായി ഒരു മോന്‍ എന്റെ അടുത്തേക്ക് വന്നത്. എന്തെങ്കിലും അപേക്ഷയാണെന്ന് കരുതിയാണ് ഞാനത് തുറന്നത്. എന്നാല്‍ ആ കവറില്‍ കുറച്ച് പണമായിരുന്നു ഉണ്ടായിരുന്നത്. ഇത് എന്നെ വല്ലാതെ ആശ്ചര്യപ്പെടുത്തി. ഇതെന്താണെന്ന് ഞാൻ ചോദിച്ചപ്പോൾ ആ മോൻ എന്നോട് പറഞ്ഞത് ഓണവും വിഷുവും ഒക്കെ അടിച്ച് പൊളിക്കാനായി സൂക്ഷിച്ച് വെച്ച പൈസയാണെന്നാണ്.

നിർധനരായ കുഞ്ഞു മക്കൾക്ക് ബുക്കും പുസ്തകവും കളിപ്പാട്ടവുമൊക്കെ വാങ്ങി നൽകാനായി സംസ്ഥാന സര്‍ക്കാരിന്റെ ബാലനിധി പദ്ധതിയിലേക്ക് സംഭാവന നൽകാനായാണ് മൂന്നാം ക്ലാസുകാരനായ ഈ മോന്‍ പണവുമായി എന്റെ അടുത്തേക്ക് വന്നത്.

ചില അനുഭവങ്ങൾ നമുക്ക് ഒരിക്കലും മറക്കാനാവില്ല. ഇത്തരത്തിൽ എന്റെ മനസ്സിൽ നിന്നും ഒരിക്കലും മറക്കാനാവാത്ത ഒരു അനുഭവമാണിത്. നിധിന്‍ മോനും മാതാപിതാക്കള്‍ക്കും എന്റെ സ്‌നേഹാഭിനന്ദനങ്ങള്‍.