കേരളത്തിലെത്തുന്ന പ്രധാനമന്ത്രി നരേന്ദ്രമോദിയെ ഔദ്യോഗികമായി സ്വീകരിക്കുന്നവരുടെ പട്ടികയില്‍നിന്ന് ഗവര്‍ണര്‍ ആരിഫ് മുഹമ്മദ് ഖാനെ ഒഴിവാക്കി. ഇന്ന് വൈകുന്നേരമെത്തുന്ന പ്രധാനമന്ത്രിയെ സ്വീകരിക്കാനായി ഗവര്‍ണര്‍ ഇന്നലെ കൊച്ചിയിലെത്തിയിരുന്നു. പട്ടികയിലില്ലാത്തതിനാല്‍ അദ്ദേഹം ഇന്ന് രാവിലെ മടങ്ങും.

സംസ്ഥാന സര്‍ക്കാരിന്റെ പ്രതിനിധിയായി മന്ത്രി പി. രാജീവ് പ്രധാനമന്ത്രിയെ സ്വീകരിക്കാനെത്തും. സാധാരണയായി പ്രധാനമന്ത്രിയെ സ്വീകരിക്കാനുള്ളവരുടെ പട്ടികയില്‍ ഗവര്‍ണറെ ഉള്‍പ്പെടുത്താറുണ്ട്. എന്നാല്‍, പ്രധാനമന്ത്രിയുടേത് രാഷ്ട്രീയസ്വഭാവമുള്ള പരിപാടിയായതിനാലാണ് സ്വീകരണപ്പട്ടികയില്‍ നിന്ന് ഗവര്‍ണറെ ഒഴിവാക്കിയതെന്നാണ് വിശദീകരണമുള്ളത്.


അതേസമയം രണ്ട് ദിവസത്തെ സന്ദര്‍ശനത്തിനായി ഇന്ന് പ്രധാനമന്ത്രി കൊച്ചിയില്‍ എത്തും. വൈകിട്ട് 5ന് കൊച്ചി നാവികവിമാനത്താവളത്തിലിറങ്ങുന്ന പ്രധാനമന്ത്രി തന്റെ ഔദ്യോഗിക വാഹനത്തില്‍ വെണ്ടുരിത്തി പാലത്തിലെത്തും. തേവര ഭാഗത്തേക്ക് വരുമ്പോള്‍ പാലം അവസാനിക്കുന്നിടത്തുനിന്നാകും റോഡ് ഷോ തുടങ്ങുക.

നേരത്തെ തേവര ജംങ്ഷന്‍ മുതല്‍ 1.2കിലോമീറ്ററായി നിശ്ചയിച്ച റോഡ് ഷോയാണ് 1.8 ആക്കി കൂട്ടിയത്. 25നാണ് പ്രധാനമന്ത്രി തിരുവനന്തപുരത്ത് വന്ദേഭാരത് ഫ്ളാഗ് ഓഫ് ചെയ്യുന്നത്.