പ്രധാനമന്ത്രി നരേന്ദ്ര മോദി കേരളത്തിലെത്തുമ്പോള്‍ സംസ്ഥാന ചരിത്രവും മാറുമോയെന്നറിയാം. ബിജെപിയ്ക്ക് വേരുറയ്ക്കാന്‍ കഴിയാത്ത മണ്ണാണിത്. എന്നാല്‍ അടുത്ത കാലത്ത് ക്രൈസ്തവ വിഭാഗങ്ങളുടെ പിന്തുണ ലഭിച്ചത് വലിയ ആവേശമാണ്. ന്യൂനപക്ഷങ്ങളെ ഒപ്പം ചേര്‍ത്തുനിറുത്തുകയെന്ന ബി.ജെ.പിയുടെ രാഷ്ട്രീയലക്ഷ്യത്തിന് വഴിതെളിക്കാന്‍ എട്ട് ക്രൈസ്തവ മേലദ്ധ്യക്ഷന്മാരുമായി പ്രധാനമന്ത്രി നരേന്ദ്രമോദി ഇന്ന് കൊച്ചിയില്‍ കൂടിക്കാഴ്ച നടത്തും.

കര്‍ദ്ദിനാള്‍ ഉള്‍പ്പെടെ ബി.ജെ.പി അനുകൂല നിലപാട് പരസ്യമായി പ്രഖ്യാപിച്ച സാഹചര്യത്തില്‍ കൂടിക്കാഴ്ചയെ അതീവപ്രാധാന്യത്തോടെയാണ് രാഷ്ട്രീയ, സാമൂഹിക നിരീക്ഷകര്‍ കാണുന്നത്. ഏറ്റവും പ്രബല ക്രൈസ്തവ വിഭാഗമായ സിറോമലബാര്‍ സഭയുടെ തലവന്‍ മേജര്‍ ആര്‍ച്ച് ബിഷപ്പ് കര്‍ദ്ദിനാള്‍ ജോര്‍ജ് ആലഞ്ചേരി ഉള്‍പ്പെടെ വിവിധ സഭകളുടെ മേലദ്ധ്യക്ഷന്മാരാണ് നരേന്ദ്രമോദിയുമായി കൂടിക്കാഴ്ച നടത്തുന്നത്.

2024ലെ ലോക്സഭ തിരഞ്ഞെടുപ്പിന്റെ പശ്ചാത്തലത്തില്‍ സഭാമേധാവിമാരുടെ പിന്തുണ ഉറപ്പാക്കുകയെന്ന ലക്ഷ്യത്തിലാണ് ബി.ജെ.പിയുടെ കേന്ദ്ര, സംസ്ഥാന നേതൃത്വം കൂടിക്കാഴ്ചയ്ക്ക് വഴിയൊരുക്കിയത്. ക്രൈസ്തവരിലെ ഒരുവിഭാഗത്തിന്റെ പിന്തുണകൂടി ലഭിച്ചാല്‍ ലോക്സഭാ, നിയമസഭാ തിരഞ്ഞെടുപ്പുകളില്‍ ഏതാനും സീറ്റില്‍ വിജയിക്കാമെന്നാണ് സംസ്ഥാന നേതൃത്വത്തിന്റെ പ്രതീക്ഷ.

റബറിന് കിലോയ്ക്ക് 300രൂപ ലഭിച്ചാല്‍ ബി.ജെ.പിക്ക് എം.പിയെ നല്‍കാമെന്ന തലശേരി ആര്‍ച്ച് ബിഷപ്പ് ജോസഫ് പാംപ്‌ളാനിയുടെയും ബി.ജെ.പി ഭരണത്തില്‍ ക്രൈസ്തവര്‍ അരക്ഷിതരല്ലെന്ന കര്‍ദ്ദിനാള്‍ ജോര്‍ജ് ആലഞ്ചേരിയുടെയും പ്രസ്താവനകള്‍, ചില മെത്രാന്മാരുടെ ആശിര്‍വാദത്തോടെ രൂപീകരിച്ച നാഷണല്‍ പ്രോഗ്രസീവ് പാര്‍ട്ടിയുടെ അനുകൂല നിലപാട് എന്നിവ ബി.ജെ.പിക്ക് പ്രതീക്ഷ നല്‍കുന്നുണ്ട്.

പ്രധാനമന്ത്രിയുമായി വിവിധ സഭാതലവന്മാര്‍ ഒരുമിച്ച് കൂടിക്കാഴ്ച നടത്തുന്നത് നിലവിലുള്ള പരിഭവങ്ങളുടെ മഞ്ഞുരുക്കുമെന്നാണ് പ്രതീക്ഷ. ഇത് അനുകൂലമാകുമെന്ന് ബി.ജെ.പിയും കരുതുന്നു. വടക്കേഇന്ത്യയില്‍ ക്രൈസ്തവര്‍ നിരന്തരം ആക്രമിക്കപ്പെടുന്നുവെന്നത് ഉള്‍പ്പെടെ പ്രശ്‌നങ്ങള്‍ അവതരിപ്പിക്കാന്‍ മതമേലദ്ധ്യക്ഷന്മാര്‍ക്കും അവസരം ലഭിക്കും.

കാര്‍ഷികവിളകളുടെ വിലയിടിവ് ഉള്‍പ്പെടെ പ്രശ്‌നങ്ങളില്‍ പ്രധാനമന്ത്രിയുടെ ഇടപെടലിനും മേലദ്ധ്യക്ഷന്മാരുടെ കൂടിക്കാഴ്ച അവസരമാക്കുമെന്ന് സഭാവൃത്തങ്ങള്‍ പറഞ്ഞു.

എല്ലാ മതവിഭാഗങ്ങളുമായും പ്രധാനമന്ത്രി നരേന്ദ്രമോദി ആശയവിനിമയം നടത്തുന്നത് പതിവാണെന്ന് ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍ പറഞ്ഞുയ പ്രധാനമന്ത്രിയെ കാണാന്‍ അവസരം ചോദിച്ച ക്രൈസ്തവ മേലദ്ധ്യക്ഷന്മാര്‍ക്ക് കൊച്ചിയിലെത്തുമ്പോള്‍ കാണാനുള്ള അവസരം പ്രധാനമന്ത്രിയുടെ ഓഫീസാണ് ഒരുക്കുന്നതെന്നും സുരേന്ദ്രന്‍ പറഞ്ഞു.

ഇന്നും നാളെയുമായി നടക്കുന്ന പ്രധാനമന്ത്രി നരേന്ദ്രമോദിയുടെ കേരള സന്ദര്‍ശനത്തിന് അഭിവാദ്യം അര്‍പ്പിച്ച് സാമൂഹ്യമാദ്ധ്യമങ്ങള്‍. ട്വിറ്ററില്‍ ഹാഷ്ടാഗില്‍ നിരവധി ട്വീറ്റുകളാണ് കഴിഞ്ഞ ദിവസങ്ങളില്‍ പോസ്റ്റ് ചെയ്തത്.

കൊച്ചിയില്‍ റോഡ് ഷോ, യുവാക്കളുടെ സംഗമം, തിരുവനന്തപുരത്ത് വന്ദേ ഭാരത് ട്രെയിന്‍ ഫ്‌ളാഗ് ഓഫ്, വിവിധ കേന്ദ്ര പദ്ധതികളുടെ ഉദ്ഘാടനം എന്നിവയാണ് പൊതുപരിപാടികള്‍. ക്രൈസ്തവ നേതാക്കളുമായും മോദി കൂടിക്കാഴ്ച നടത്തുന്നുണ്ട്. വലിയ രാഷ്ട്രീയ പ്രാധാന്യമുള്ളതാണ് പ്രധാനമന്ത്രിയുടെ കേരള സന്ദര്‍ശനം എന്നാണ് വിലയിരുത്തല്‍.

പ്രധാനമന്ത്രി നരേന്ദ്ര മോദി രണ്ട് ദിവസം നീണ്ടുനില്‍ക്കുന്ന ഔദ്യോഗിക സന്ദര്‍ശനത്തിനായി ഇന്ന് കേരളത്തിലെത്തും. മദ്ധ്യപ്രദേശില്‍ നിന്നും വ്യോമസേനയുടെ പ്രത്യേക വിമാനത്തില്‍ വെല്ലിംഗ്ടണ്‍ ദ്വീപിലെ നാവികസേനാ വിമാനത്താവളത്തില്‍ വൈകിട്ട് അഞ്ചോടെ പ്രധാനമന്ത്രി എത്തിച്ചേരും. തുടര്‍ന്ന് തേവര ജംഗ്ഷന്‍ മുതല്‍ 'യുവം 2023' പരിപാടി നടക്കുന്ന തേവര സേക്രട്ട് ഹാര്‍ട്ട് കോളേജ് മൈതാനം വരെ നീളുന്ന 1.8 കിലോമീറ്റര്‍ ദൂരമുള്ള റോഡ് ഷോ 5.30ന് നടക്കും. ആറ് മണിയ്ക്ക് യുവം പരിപാടിയില്‍ പങ്കെടുക്കും.