വന്ദേഭാരതിന് ലഭിച്ച സ്വീകര്യത ഇല്ലാതാക്കാന്‍ നിലവിലില്ലാത്ത കെ റെയിലിനെ പുകഴ്ത്തിയ മഹാന്‍മാര്‍ തന്നെ വന്ദേ ഭാരതിന്റെ ടിക്കറ്റിനായി ക്യൂവിലാണ്. പ്രധാനമന്ത്രി നരേന്ദ്രമോദി ചൊവ്വാഴ്ച ഉദ്ഘാടനം ചെയ്യുന്ന വന്ദേഭാരതിലേക്കുള്ള ടിക്കറ്റ് റിസര്‍വേഷന് മികച്ച പ്രതികരണം.

ഞായര്‍ രാവിലെ ബുക്കിംഗ് തുടങ്ങി മണിക്കൂറുകള്‍ക്കുള്ളില്‍ ആദ്യ ദിനങ്ങളിലെ ടിക്കറ്റുകള്‍ തീര്‍ന്നു. രണ്ടു ദിവസത്തെ എക്‌സിക്യുട്ടീവ് ക്ലാസ് ടിക്കറ്റുകള്‍ വെയിറ്റിംഗ് ലിസ്റ്റിലേക്കു നീങ്ങി. ചെയര്‍ കാര്‍ ടിക്കറ്റുകള്‍ മൂന്നില്‍ രണ്ടും റിസര്‍വേഷനായി. റഗുലര്‍ സര്‍വീസ് ആരംഭിക്കുന്ന ഏപ്രില്‍ 28 മുതല്‍ അഞ്ചു ദിവസത്തേക്ക് എക്‌സിക്യുട്ടിവ് ചെയര്‍കാര്‍ ടിക്കറ്റുകള്‍ ലഭ്യമല്ല. ചെയര്‍ കാറില്‍ 914 സീറ്റും എക്‌സിക്യുട്ടീവില്‍ 84 സീറ്റും ഉള്‍പ്പെടെ 1000 സീറ്റാണ് വന്ദേഭാരതിലുള്ളത്.

ഏപ്രില്‍ 28 മുതലാണ് റഗുലര്‍ സര്‍വീസ്. മറ്റു ട്രെയിനുകളിലെപ്പോലെ റയില്‍വേ ബുക്കിംഗ് സെന്ററുകളില്‍ നിന്നും വെബ്സൈറ്റ്, മൊബൈല്‍ ആപ്പുകള്‍ വഴിയും ടിക്കറ്റ് ബുക്ക് ചെയ്യാം. തിരുവനന്തപുരത്തു നിന്ന് കാസര്‍കോട്ടേക്ക് ചെയര്‍കാറില്‍ 1590 രൂപയും എക്‌സിക്യുട്ടീവില്‍ 2880 രൂപയുമാണ്. ഭക്ഷണത്തിന്റെ വിലയടക്കമുള്ള നിരക്കാണിത്. തിരികെയുള്ള യാത്രയില്‍ നിരക്കിന് ഇളവുണ്ട്.

ചെയര്‍കാറില്‍ 1520 രൂപയും എക്‌സിക്യുട്ടീവില്‍ 2815 രൂപയും മതി. ഭക്ഷണത്തിന്റെ നിരക്കിലെ വ്യത്യാസമാണ് ടിക്കറ്റ് ചാര്‍ജ് കുറയാന്‍ കാരണം. കാസര്‍കോട്ടേക്ക് പോകുമ്പോള്‍ രാവിലെ കാപ്പിയും ഉച്ചഭക്ഷണവും ലഘു ഭക്ഷണവും നല്‍കേണ്ടിവരും. തിരികെ വൈകിട്ട് ലഘുഭക്ഷണവും അത്താഴവും മാത്രം നല്‍കിയാല്‍ മതിയാവും. എട്ടു മണിക്കൂറും അഞ്ചു മിനിട്ടുമാണ് തിരുവനന്തപുരത്തു നിന്ന് കാസര്‍കോട്ടേക്കുള്ള യാത്രാസമയം.

തിരുവനന്തപുരത്തു നിന്ന് കോഴിക്കോടിന് ചെയര്‍ കാറില്‍ 1090 രൂപയാണ് നിരക്ക്. ഇതില്‍ അടിസ്ഥാന ടിക്കറ്റ് നിരക്ക് 803 രൂപ, റിസര്‍വേഷന്‍ ചാര്‍ജ് 40, സൂപ്പര്‍ ഫാസ്റ്റ് ചാര്‍ജ് 45, ചരക്കു സേവന നികുതി 45, കാറ്ററിംഗ് ചാര്‍ജ് 157 രൂപ എന്നിവ ഉള്‍പ്പെടും. വ്യാഴം ഒഴികെയുള്ള ആഴ്ചയിലെ ആറു ദിവസവും സര്‍വീസ് നടത്തും. രാവിലെ 5.20നു തിരുവനന്തപുരം സെന്‍ട്രല്‍ റെയില്‍വേ സ്റ്റേഷനില്‍ നിന്നു പുറപ്പെടുന്ന ട്രെയിന്‍ ഉച്ചയ്ക്ക് 1.25ന് കാസര്‍കോട്ടെത്തും. ഉച്ചകഴിഞ്ഞു 2.30നു തിരിച്ച് രാത്രി 10.35ന് തിരുവനന്തപുരത്തെത്തും.

അതേസമയം രണ്ടാം ഘട്ട ട്രയലില്‍ സമയം മെച്ചപ്പെടുത്തി കേരളത്തിന് പുതുതായി അനുവദിച്ച വന്ദേഭാരത് എക്സ്പ്രസ്. തിരുവനന്തപുരത്ത് നിന്ന് കണ്ണൂരില്‍ എത്തിയത് ആറ് മണിക്കൂര്‍ 53 മിനിറ്റ് കൊണ്ട്. ആദ്യയാത്രയില്‍ ഏഴുമണിക്കൂര്‍ പത്തുമിനിറ്റ് കൊണ്ടാണ് ഈ ദൂരം പിന്നിട്ടത്.

കഴിഞ്ഞ ദിവസം പുലര്‍ച്ചെ 5.20-ന് തിരുവനന്തപുരത്ത് നിന്ന് വിട്ട ട്രെയിന്‍ 1.10-നാണ് കാസര്‍കോടെത്തിയത്. 7 മണിക്കൂര്‍ 50 മിനിറ്റാണ് ട്രെയിന്‍ കാസര്‍കോട് എത്താന്‍ എടുത്ത സമയം. തിങ്കളാഴ്ചത്തെ പരീക്ഷണയാത്രയില്‍ തിരുവനന്തപുരത്തുനിന്ന് 7 മണിക്കൂര്‍ 10 മിനിറ്റുകൊണ്ടാണ് കണ്ണൂരിലെത്തിയത്. കഴിഞ്ഞ തവണത്തേക്കാള്‍ 17 മിനിറ്റ് നേരത്തേ ആയിരുന്നു ഇത്തവണ കണ്ണൂരെത്തിയ

തിരുവനന്തപുരം തമ്പാനൂര്‍ റെയില്‍വേ സ്റ്റേഷനില്‍ നിന്ന് കാസര്‍കോട് വരെയാണ് രണ്ടാം ഘട്ട ട്രയല്‍ റണ്‍ നടത്തിയത്. ട്രെയിന്‍ സര്‍വ്വീസ് കാസര്‍കോട് വരെ നീട്ടിയ പശ്ചാത്തലത്തിലാണ് കാസര്‍കോട് വരെയുളള രണ്ടാം ഘട്ട ട്രയല്‍ റണ്‍. തമ്പാനൂര്‍ റെയില്‍വേ സ്റ്റേഷനില്‍ നിന്ന് പുലര്‍ച്ചെ 5.20ന് പുറപ്പെട്ട ട്രെയിന്‍ കാസര്‍ഗോഡ് നിന്ന് ഇന്ന് ഉച്ചയോടെ തിരിച്ച് രാത്രിയോടെ തിരുവനന്തപുരത്ത് മടങ്ങിയെത്തും. കണ്ണൂര്‍ വരെ ഏഴുമണിക്കൂറിനുള്ളില്‍ ട്രെയിന്‍ എത്തിക്കാനാണ് ശ്രമം. ട്രെയില്‍ 50 മിനിറ്റില്‍ കൊല്ലത്തെത്തി. നേരത്തെ കണ്ണൂര്‍ വരെ എന്ന് പ്രഖ്യാപിച്ച വന്ദേഭാരത് സര്‍വീസ് കാസര്‍കോട് വരെ നീട്ടിയതായി റെയില്‍വേ മന്ത്രിയാണ് അറിയിച്ചത്. എന്തായാലും മലയാളികള്‍ വന്ദേ ഭാരത് ഏറ്റെടുത്തതോടെ ശുഭപ്രതീക്ഷയാണുള്ളത്.