തൃശൂര് പൂരത്തിന് ഇന്ന് തുടക്കം.... പാറമേക്കാവിലും തിരുവമ്പാടിയിലും എട്ട് ഘടക ക്ഷേത്രങ്ങളിലും പൂരപ്പതാകകള് ഉയരുന്നതോടെ ശക്തന്റെ തട്ടകം പൂരാവേശത്തിലേക്ക് ...
ഇന്ന് രാവിലെ പാറമേക്കാവിലും തിരുവമ്പാടിയിലും എട്ട് ഘടക ക്ഷേത്രങ്ങളിലും പൂരപ്പതാകകള് ഉയരുന്നതോടെ ശക്തന്റെ തട്ടകം പൂരാവേശത്തിലേക്ക് കടക്കും. ലാലൂര്, അയ്യന്തോള്, ചെമ്പുക്കാവ്, പനമുക്കുംപിള്ളി, പൂക്കാട്ടിക്കര കാരമുക്ക്, കണിമംഗലം, ചൂരക്കാട്ടുക്കാവ്, നെയ്തലക്കാവ് എന്നീ ഘടക ക്ഷേത്രങ്ങളിലാണ് പൂരം കൊടിയേറുക.
തിരുവമ്പാടി ക്ഷേത്രത്തില് രാവിലെ 11നും 11.30നും മദ്ധ്യേയാണ് കൊടിയേറ്റം നടക്കുക. പൂജിച്ച കൊടിക്കൂറ കൊടിമരത്തില് ചാര്ത്തി, ദേശക്കാര് ഉപചാരപൂര്വം കൊടിമരം നാട്ടി കൂറ ഉയര്ത്തും. വൈകുന്നേരം മൂന്നിനാണ് പൂരം പുറപ്പാട്.
നായ്ക്കനാലിലും നടുവിലാലിലും നീല, മഞ്ഞ നിറങ്ങളില് പൂരപ്പതാകകള് ഉയര്ത്തും. മഞ്ഞയും നീലയും നിറത്തിലുള്ള കൊടികളാണ് ഉയര്ത്തുക.
ശ്രീമൂലസ്ഥാനത്ത് മേളം കലാശിച്ച ശേഷം നടുവില് മഠത്തില് ആറാട്ടും കഴിഞ്ഞാണ് ഭഗവതി തിരുവമ്പാടി ക്ഷേത്രത്തില് തിരിച്ചെത്തുക. തുടര്ന്നുള്ള ദിവസങ്ങളില് ഭഗവതി വിവിധ സ്ഥലങ്ങളില് പറയെടുപ്പിനും ആറാട്ടിനും എത്തും. പാറമേക്കാവിലെ 11.30നും 12നും ഇടയിലാകും പാറമേക്കാവിന്റെ കൊടിയേറ്റം നടക്കുക. വലിയ പാണിക്ക് ശേഷം പുറത്തേക്കെഴുന്നള്ളുന്ന ഭഗവതിയെ സാക്ഷിയാക്കി ദേശക്കാര് കൊടി ഉയര്ത്തും. ചെമ്പില് കുട്ടനാശാരി കവുങ്ങില് ആല്, മാവ്, ദര്ഭ എന്നിവ കൊണ്ട് അലങ്കരിക്കും. സിംഹമുദ്രയുള്ള കൊടികളാണ് ഉയര്ത്തുക.
തുടര്ന്ന് പാറമേക്കാവ് കാശിനാഥന് ഭഗവതിയുടെ തിടമ്പേറ്റി പുറത്തേക്ക് മേളത്തിന്റെ അകമ്പടിയോടെ എഴുന്നള്ളിപ്പും ഉണ്ടാകും. പിന്നീട് വടക്കുന്നാഥ ക്ഷേത്രം ചന്ദ്രപുഷ്കര്ണിയില് ആറാട്ട് നടക്കും. ഘടകക്ഷേത്രങ്ങളില് രണ്ടിടത്ത് രാവിലെയും ആറിടങ്ങളില് വൈകുന്നേരവുമാണ് കൊടിയേറ്റം.
"
https://www.facebook.com/Malayalivartha
