പൊതു അവധി ദിവസങ്ങളില്‍ രാവിലെ 6 മുതല്‍ ഉച്ചയ്ക്ക് 2 വരെ സ്‌പെഷ്യല്‍ ദര്‍ശനം നിര്‍ത്തിവയ്ക്കാന്‍ ഗുരുവായൂര്‍ ദേവസ്വം ബോര്‍ഡ് തീരുമാനം.വിശ്വാസികളുടെ ഏറെ നാളത്തെ ആവശ്യത്തിനാണ് പരിഹാരമായത്.

പൊതു അവധി ദിവസങ്ങളില്‍ വലിയ തിരക്കാണ് ഗുരുവായൂര്‍ ക്ഷേത്രത്തില്‍ അനുഭവപ്പെടുന്നത്. അതിനിടെ സ്‌പെഷ്യല്‍ ദര്‍ശനം അനുവദിക്കുന്നത് ക്യൂ നില്‍ക്കുന്നവര്‍ക്ക് കൂടുതല്‍ പ്രയാസം സൃഷ്ടിക്കുന്നുണ്ട്. ഇത് കണക്കിലെടുത്താണ് തീരുമാനം.ഇന്നലെ ദര്‍ശനത്തിന് വന്‍ തിരക്ക് ഉണ്ടായിരുന്നെങ്കിലും ഉച്ചയ്ക്ക് 1.45ഓടെ ക്യൂ നിന്ന മുഴുവന്‍ പേര്‍ക്കും ദര്‍ശനം ലഭിച്ചു. പിന്നീട് എത്തിയവര്‍ക്കും ജീവനക്കാര്‍ക്കും ദര്‍ശനം നല്‍കി രണ്ടരയോടെയാണ് നടയടച്ചത്.

വൈശാഖം പിറന്നതോടെ ദര്‍ശനത്തിന് വന്‍ തിരക്കാണ് അനുഭവപ്പെടുന്നത്. ക്ഷേത്രം ഗോപുരത്തില്‍ നിന്ന് ടോക്കണ്‍ വാങ്ങി ദര്‍ശനം നടത്തുന്നവരുടെ എണ്ണം വര്‍ധിച്ചതോടെ ഭക്തര്‍ക്ക് അഞ്ചും ആറും മണിക്കൂര്‍ ക്യൂ നില്‍ക്കേണ്ട സാഹചര്യമായിരുന്നു ഉണ്ടായിരുന്നത്. പുതിയ തീരുമാനത്തോടെ ഇതൊഴിവായി.