കണ്ടുകിട്ടുന്നവര് അടുത്തുള്ള പോലീസ് സ്റ്റേഷനില് അറിയിക്കുക... ജംബര് ശബരിക്ക് ലുക്ക്ഔട്ട് പോലും!
ലുക്ക് ഔട്ട് നോട്ടീസ് കാണാനിടയായാല് ടോട്ടല് ഫോര് യു തട്ടിപ്പ് കേസിലെ പ്രതി ശബരീനാഥ് പൊട്ടിചിരിക്കും; ലുക്ക് ഔട്ട് പോലും....
പോലീസ് ലുക്ക് ഔട്ട് പുറപ്പെടുവിക്കുന്ന അവസരങ്ങളിലെല്ലാം പോലീസിന്റെ മൂക്കിന് തുമ്പില് ശബരി ഉണ്ടായിരുന്നു. നഗരഹൃദയത്തിലെ ചില ഫ്ളാറ്റുകളും വീടുകളും കേന്ദ്രീകരിച്ചാണ് ശബരി കരുക്കള് നീക്കുന്നത്. ഇതിനിടയില് ശബരി ആല്ബം നിര്മ്മാണത്തില് സജീവമാകുന്നതായും വാര്ത്തയുണ്ടായിരുന്നു.
പോലീസിന്റെ കണക്കില് ശബരിയെ കാണാതായിട്ട് രണ്ടരവര്ഷം കഴിഞ്ഞു. ഇയാള്ക്കെതിരെ 33 കേസുകളാണ് പോലീസ് രജിസ്റ്റര് ചെയ്തിട്ടുളളത്. കേസുകളെല്ലാം വിവിധ കോടതികളുടെ പരിഗണനയിലാണ്. ജയിലില് കഴിയുന്നതിനിടയിലാണ് ശബരി ജാമ്യത്തിലിറങ്ങി മുങ്ങിയത്. നെയ്യാറ്റിന്കര കൊടങ്ങാവിള സ്വദേശിയാണ് ശബരി. ക്രൈംബ്രാഞ്ചാണ് ആദ്യം നോട്ടീസിറക്കിയത്.
ആദ്യ ലുക്ക് ഔട്ട് നോട്ടീസ് നിലനില്ക്കെയാണ് 'ജംബര്'എന്ന സംഗീത ആല്ബം ശബരി നിര്മ്മിച്ചത്. ആല്ബം നിര്മ്മിക്കുക മാത്രമല്ല മാധ്യമപ്രവര്ത്തകര്ക്ക് മുമ്പില് അത് അവതരിപ്പിക്കുകയും ചെയ്തു. ലുക്ക് ഔട്ട് നോട്ടീസ് നിലനില്ക്കെ നടത്തിയ പ്രകടനം പോലീസ് അറിഞ്ഞതേയില്ല, ഇല്ലെങ്കില് അറിഞ്ഞില്ലെന്ന് ഭാവിച്ചു.
2006 ഓഗസ്റ്റിലാണ് ടോട്ടല് ഫോര് യു തട്ടിപ്പ് പുറത്തു വന്നത്. മൂന്നുമാസം കൊണ്ട് 60 ഇരട്ടി എന്നായിരുന്നു വാഗ്ദാനം. തിരുവനന്തപുരം മെഡിക്കല് കോളേജിന് സമീപമായിരുന്നു ശബരിയുടെ സ്ഥാപനം. സംസ്ഥാനത്തിന്റെ വിവിധ ഭാഗങ്ങളില് നിന്നും ആയിരക്കണക്കിനാളുകള് ശബരിയുടെ സ്ഥാപനത്തില് നിക്ഷേപം നടത്തിയിരുന്നു. കൂടുതലും ബ്ലാക്ക് മണിയായിരുന്നു. സോളാറിലെന്ന പോലെ ബ്ലാക്ക് മണിയായതിനാല് ആരും മിണ്ടിയില്ല!
https://www.facebook.com/Malayalivartha