പുസ്തകങ്ങള്ക്കും സാഹിത്യ സൃഷ്ടികള്ക്കും പ്രസക്തിയേറുന്നു : മന്ത്രി കെ എന് ബാലഗോപാല്
സമൂഹത്തില് പുസ്തകങ്ങള്ക്കും സാഹിത്യ സൃഷ്ടികള്ക്കും പ്രസക്തി വര്ധിക്കുന്നുവെന്ന് ധനമന്ത്രി കെ എന് ബാലഗോപാല്. ദേശീയ വായന മാസാചരണത്തിന്റെ ഭാഗമായി പി എന് പണിക്കര് ഫൗണ്ടേഷന്റെയും ഒ എന് വി മലയാളം പഠന കേന്ദ്രത്തിന്റെയും ആഭിമുഖ്യത്തില് ഈ വര്ഷത്തെ മഹാകവി ഉള്ളൂര് പുരസ്കാരം നേടിയ ചീഫ് സെക്രട്ടറി വി പി ജോയിക്ക് ആദരവും അദ്ദേഹം രചിച്ച ഹരിത കാവ്യങ്ങളുടെ സംഗീതാവിഷ്കാര അവതരണത്തിന്റെയും ഉദ്ഘാടനവും നിര്വഹിക്കുകയായിരുന്നു മന്ത്രി.
ജനാധിപത്യ ആശയങ്ങള്ക്ക് കരുത്ത് പകരേണ്ടത്ത് അര്ഥവത്തായ അക്ഷര സൃഷ്ടികളിലൂടെയാണെന്നും ഡിജിറ്റല് വത്ക്കരണത്തിന്റെ കാലത്തും വായനയ്ക്ക് പ്രാധാന്യം നല്കണമെന്നും മന്ത്രി പറഞ്ഞു. ഒ എന് വി മലയാളം പഠന ഗവേഷണ കേന്ദ്രം പ്രസിഡന്റ് എക്സ് ഏണസ്റ്റ് അധ്യക്ഷനായി.
മേയര് പ്രസന്ന ഏണസ്റ്റ്, എം നൗഷാദ് എം എല് എ, ജില്ലാ ലൈബ്രറി കൗണ്സില് പ്രസിഡന്റ് കെ ബി മുരളീകൃഷ്ണന്, ജില്ലാ ഇന്ഫര്മേഷന് ഓഫീസര് പി ആര് സാബു, ജില്ലാ വിദ്യാഭ്യാസ ഉപഡയറക്ടര് ഡി ഷാജിമോന്, സുരക്ഷാ കെയര് ജില്ലാ ചെയര്മാന് നെടുങ്ങോലം രഘു, ഗാന്ധി പീസ് ഫൗണ്ടേഷന് പ്രതിനിധി ജി ആര് കൃഷ്ണകുമാര്, സാമൂഹിക, രാഷ്ട്രീയ, സാഹിത്യ രംഗത്ത് പ്രവര്ത്തിക്കുന്നവര്, വിദ്യാര്ഥികള് തുടങ്ങിയവര് പങ്കെടുത്തു. പബ്ലിക് ലൈബ്രറി ഹാളില് ഡോക്ടര് മണക്കാല ഗോപാലകൃഷ്ണനാണ് ഹരിത കാവ്യങ്ങളുടെ സംഗീതാവിഷ്കാരം അവതരിപ്പിച്ചത്.
https://www.facebook.com/Malayalivartha
