നടന്‍ സുരേഷ് ഗോപി കേന്ദ്രമന്ത്രിസഭയില്‍ എത്തിയേക്കുമെന്ന് റിപ്പോര്‍ട്ടുകള്‍ ശക്തമാണ്. മെട്രോമാന്‍ ഇ ശ്രീധരനും സാധ്യതയേറെയാണ്. അങ്ങനെ വന്നാല്‍ ഒരു എംപി പോലും നല്‍കാത്ത കേരളത്തിന് രണ്ട് മന്ത്രി സ്ഥാനം നല്‍കുമോയെന്ന ചോദ്യം ബാക്കിയാകുന്നു. അവിടെയാണ് കേരളത്തിലെ ബിജെപിയുടെ ശക്തികേന്ദ്രമായ വി മുരളീധരന്റെ കാര്യം വരുന്നത്. സുരേഷ് ഗോപി മന്ത്രിയായാല്‍ മുരളീധരനെ തഴയുമോയെന്ന് കണ്ടറിയാം. എങ്കില്‍ തെരഞ്ഞെടുപ്പ് വരുന്ന സമയത്ത് മുരളീധരന് വലിയ തിരിച്ചടിയായി മാറും.

2024-ലെ തിരഞ്ഞെടുപ്പിന് മുന്നോടിയായി നടത്തുന്ന മന്ത്രിസഭാ പുനഃസംഘടനയില്‍ സുരേഷ് ഗോപിക്ക് മന്ത്രിസ്ഥാനം ലഭിച്ചേക്കുമെന്ന് ഐഎഎന്‍എസ് വാര്‍ത്താ ഏജന്‍സിയാണ് റിപ്പോര്‍ട്ടുചെയ്തത്. പ്രധാനമന്ത്രി നരേന്ദ്ര മോദിയുമായി കേന്ദ്ര ആഭ്യന്തരമന്ത്രി അമിത് ഷാ, പാര്‍ട്ടി അധ്യക്ഷന്‍ ജെ.പി നഡ്ഡ എന്നിവര്‍ കൂടിക്കാഴ്ച നടത്തിയതോടെയാണ് പുനഃസംഘടന ഉടന്‍ ഉണ്ടാകുമെന്ന അഭ്യൂഹങ്ങള്‍ ശക്തമായത്.

മന്ത്രിസഭാ പുനഃസംഘടന ചര്‍ച്ചാവിഷയമായെന്നകാര്യം പാര്‍ട്ടി വൃത്തങ്ങള്‍ സ്ഥിരീകരിച്ചുവെന്ന് വാര്‍ത്താ ഏജന്‍സിയുടെ റിപ്പോര്‍ട്ടില്‍ പറയുന്നു. ലോക്സഭാ തിരഞ്ഞെടുപ്പ് മുന്നില്‍ക്കണ്ട് കേന്ദ്രമന്ത്രിമാരില്‍ ചിലരെ പാര്‍ട്ടി ചുമതലകളിലേക്ക് മാറ്റിയേക്കുമെന്നാണ് വിവരം. അതിനിടെയാണ് സുരേഷ് ഗോപി കേന്ദ്ര മന്ത്രിസഭയില്‍ എത്തിയേക്കുമെന്ന അഭ്യൂഹങ്ങള്‍ പുറത്തുവരുന്നത്. അതിനിടെ അദ്ദേഹം തൃശ്ശൂരില്‍നിന്നുതന്നെ വീണ്ടും മത്സരിച്ചേക്കുമെന്നും വാര്‍ത്താ ഏജന്‍സിയുടെ റിപ്പോര്‍ട്ടില്‍ പറയുന്നു.

2024-ലെ ലോക്സഭാ തിരഞ്ഞെടുപ്പില്‍ പാര്‍ട്ടി നേരിടുന്ന വെല്ലുവിളികള്‍ പ്രധാനമന്ത്രിയുടെ വസതിയില്‍ ചേര്‍ന്ന യോഗത്തില്‍ മുതിര്‍ന്ന നേതാക്കള്‍ ചര്‍ച്ച ചെയ്തുവെന്നാണ് പുറത്തുവരുന്ന വിവരം. യോഗത്തിലെ ജെ.പി നഡ്ഡയുടെ സാന്നിധ്യമാണ് പാര്‍ട്ടിയിലും പുനഃസംഘടന ഉണ്ടായേക്കുമെന്ന അഭ്യൂഹങ്ങള്‍ ശക്തമാക്കിയത്. സംസ്ഥാന നേതൃത്വങ്ങളിലടക്കം മാറ്റമുണ്ടായേക്കുമെന്ന സൂചനയുണ്ട്.

ഏക സിവില്‍ കോഡിനെക്കുറിപ്പ് പ്രധാനമന്ത്രി നരേന്ദ്രമോദി കഴിഞ്ഞ ദിവസം ഭോപ്പാലില്‍ നടത്തിയ പരാമര്‍ശം ലോക്സഭാ തിരഞ്ഞെടുപ്പ് മുന്നില്‍ക്കണ്ടാണെന്ന വിലയിരുത്തലുകളുണ്ട്. രാജസ്ഥാന്‍, ഛത്തീസ്ഗഢ്, മധ്യപ്രദേശ്, തെലങ്കാന, മിസോറം സംസ്ഥാനങ്ങളിലും തിരഞ്ഞെടുപ്പ് നടക്കാനിരിക്കുകയാണ്.

2019ലെ ലോക്‌സഭാ തിരഞ്ഞെടുപ്പിലും 2021ലെ നിയമസഭാ തിരഞ്ഞെടുപ്പിലും സുരേഷ് ഗോപി തൃശൂരില്‍ നിന്നാണ് മത്സരിച്ചത്.സുരേഷ് ഗോപിക്കൊപ്പം മെട്രോമാന്‍ ഇ ശ്രീധരനെയും മന്ത്രിസഭയില്‍ ഉള്‍പ്പെടുത്തിയേക്കുമെന്നും സൂചനയുണ്ട്.

2024ലെ ലോക്സഭാ തിരഞ്ഞെടുപ്പിനായുള്ള തന്ത്രങ്ങള്‍ മെനയാന്‍ കഴിഞ്ഞ ദിവസം അര്‍ദ്ധരാത്രി പ്രധാനമന്ത്രി നരേന്ദ്ര മോദിയുടെ വസതിയില്‍ ബി ജെ പി നേതാക്കള്‍ യാേഗം ചേര്‍ന്നിരുന്നു. കേന്ദ്ര ആഭ്യന്തര മന്ത്രി അമിത് ഷാ, ബി ജെ പി ദേശീയ അദ്ധ്യക്ഷന്‍ ജെ പി നദ്ദ തുടങ്ങിയവര്‍ യോഗത്തില്‍ പങ്കെടുത്തു. വരുന്ന ലോക്‌സഭാ തിരഞ്ഞെടുപ്പ് മുന്നില്‍ക്കണ്ട് മന്ത്രിസഭയില്‍ മാറ്റങ്ങള്‍ വരുത്താന്‍ ബി ജെ പി തയ്യാറെടുക്കുന്നതായി നേരത്തേ റിപ്പോര്‍ട്ടുണ്ടായിരുന്നു. അക്കാര്യവും യോഗത്തില്‍ ചര്‍ച്ചയായെന്നാണ് വിവരം.

തിങ്കളാഴ്ച െൈവകിട്ട് വിശാല മന്ത്രിസഭാ യോഗം ചേരുന്നുണ്ട്. ഈ യോഗത്തോടെ മന്ത്രിസഭാ പുനഃസംഘടയുടെ കാര്യത്തില്‍ വ്യക്തമായ ധാരണ ഉണ്ടാകുമെന്നാണ് റിപ്പോര്‍ട്ട്. ഗതാഗത മന്ത്രി നിതിന്‍ ഗഡ്കരിയുടെ വകുപ്പുകളില്‍ ഉള്‍പ്പടെ മാറ്റമുണ്ടാവുമെന്നാണ് അറിയുന്നത്. അതിനിടെ വരുന്ന ലോക്സഭാ തിരഞ്ഞെടുപ്പില്‍ കേന്ദ്രമന്ത്രി വി മുരളീധരന്‍ ആറ്റിങ്ങലില്‍ നിന്ന് മത്സരിച്ചേക്കും എന്നും റിപ്പോര്‍ട്ടുണ്ട്. കഴിഞ്ഞ രണ്ട് തിരഞ്ഞെടുപ്പുകളില്‍ ബി ജെ പിക്ക് ഈ മണ്ഡലത്തില്‍ വ്യക്തമായ വര്‍ദ്ധനവുണ്ടായിരുന്നു. ഇത് വിജയത്തിലെത്തിക്കാനാണ് ബി ജെ പിയുടെ ശ്രമം. കേരളത്തില്‍ പാര്‍ട്ടി വിജയപ്രതീക്ഷ വച്ചുപുലര്‍ത്തുന്ന മണ്ഡലങ്ങളില്‍ ഒന്നാണ് ആറ്റിങ്ങല്‍. ആഞ്ഞുപിടിച്ചാല്‍ മണ്ഡലം കൈപ്പിടിയിലൊതുക്കാമെന്നാണ് പാര്‍ട്ടിയുടെ പ്രതീക്ഷ. കേരളത്തിലെത്തുന്ന മുരളീധരന്‍ ഇപ്പോള്‍ കൂടുതല്‍ ശ്രദ്ധകേന്ദ്രീകരിക്കുന്നതും മണ്ഡലത്തിലാണ്. ഇവിടത്തെ പൊതുപരിപാടികളിലും അദ്ദേഹം പങ്കെടുക്കുന്നുമുണ്ട്.