ഏതു സമയം വേണമെങ്കിലും കേന്ദ്ര മന്ത്രിസഭാ പുനഃസംഘടന നടക്കും. അതിനിടെ നടൻ സുരേഷ് ഗോപിയെ കേന്ദ്രമന്ത്രിസഭയിലേക്കു പരിഗണിക്കുന്നതായി സൂചന ശക്തം. അടുത്തവർഷത്തെ ലോക്‌സഭാ തിരഞ്ഞെടുപ്പ് മുന്നിൽക്കണ്ടുള്ള മന്ത്രിസഭാ അഴിച്ചുപണിക്കു ബിജെപി തയ്യാറെടുക്കവെയാണ് സുരേഷ് ഗോപിയുടെ പേര് ചർച്ചകളിൽ സജീവമായത്. എന്നാൽ സുരേഷ് ഗോപിയെ മന്ത്രിയാക്കാതിരിക്കാൻ ചില ശക്തികൾ പണിയും തുടങ്ങി. കേരളത്തിലെ ചില നേതാക്കളാണ് സുരേഷ് ഗോപിക്കെതിരെ രംഗത്തുള്ളത്.

കേന്ദ്രമന്ത്രിയെന്ന നിലയിൽ അദ്ദേഹം തൃശൂർ ലോക്‌സഭാ സീറ്റിൽ മത്സരിക്കുന്നതു വിജയസാധ്യത കൂട്ടുമെന്നാണു പാർട്ടിയുടെ കണക്കുകൂട്ടൽ. സുരേഷ് ഗോപി മന്ത്രിയാകുമെന്നു കഴിഞ്ഞവർഷവും അഭ്യൂഹമുയർന്നിരുന്നു. എന്നാൽ, രാജ്യസഭാംഗത്വം നീട്ടിനൽകാൻ അന്നു ബിജെപി തയാറായില്ല. പരസ്യമായി തന്നെ രാജ്യസഭാ അംഗമാകാനുള്ള താൽപ്പര്യം സുരേഷ് ഗോപി പ്രകടിപ്പിച്ചിരുന്നു. എന്നാൽ കേരളത്തിൽ ഏറ്റവും അധികം ജനസമ്മതിയുള്ള ബിജെപി നേതാവ് സുരേഷ് ഗോപിയാണെന്ന് ബിജെപി കേന്ദ്ര നേതൃത്വം തിരിച്ചറിയുന്നു. ഈ സാഹചര്യത്തിൽ സുരേഷ് ഗോപിയെ കേന്ദ്ര മന്ത്രിയാക്കുന്നത് ഗുണം ചെയ്യുമെന്നാണ് വിലയിരുത്തൽ. മന്ത്രിയായാൽ സുരേഷ് ഗോപിയെ രാജ്യസഭയിലും എത്തിക്കും.

ഇ.ശ്രീധരന്റെ പേരും ചർച്ചകളിലുണ്ടെങ്കിലും 75 വയസ്സു കഴിഞ്ഞത് അദ്ദേഹത്തിനു തടസ്സമാകുമെന്നു പാർട്ടി വൃത്തങ്ങൾ പറഞ്ഞു. കോൺഗ്രസ് വിട്ട് ബിജെപിയിൽ ചേർന്ന അനിൽ ആന്റണിക്കു ദേശീയതലത്തിൽ സംഘടനാ പദവി നൽകുന്നതും പരിഗണനയിലുണ്ട്. മലയാളികളായ രണ്ട് കേന്ദ്രമന്ത്രിമാർ നിലവിലുണ്ട്. വി മുരളീധരനും രാജീവ് ചന്ദ്രശേഖറും. മഹാരാഷ്ട്രയിൽ നിന്നുള്ള രാജ്യസഭാ അംഗമാണ് മുരളീധരൻ. കർണ്ണാടകയിൽ നിന്നാണ് രാജീവ് ചന്ദ്രശേഖർ രാജ്യസഭയിലെത്തിയത്. ഇവർക്ക് രണ്ടു പേർക്കും മന്ത്രിസ്ഥാനം നഷ്ടമാകാൻ ഇടയില്ല. മുരളീധരനെ മന്ത്രിസഭയിൽ നിന്നൊഴിവാക്കി കേരളത്തിലെ ബിജെപി അധ്യക്ഷനാക്കാനുള്ള ചർച്ചയുംസജീവമാണ്. ഏതായാലും പ്രധാനമന്ത്രി നരേന്ദ്ര മോദിയുടേതാകും അന്തിമ തീരുമാനം.