169ാമത് ശ്രീനാരായണഗുരുദേവ ജയന്തി ലോകമെമ്പാടും ഭക്ത്യാദരപൂര്‍വം ഇന്ന് ആഘോഷിക്കും. ശിവഗിരി മഠത്തിലും, അനുബന്ധ മഠങ്ങളിലുംഎസ്.എന്‍.ഡി.പി യോഗത്തിന്റെയും മറ്റ് ശ്രീനാരായണ പ്രസ്ഥാനങ്ങളുടെയും ആഭിമുഖ്യത്തിലും ജയന്തി ഘോഷയാത്രയും പ്രത്യേക പ്രാര്‍ത്ഥനകളും പൂജകളും പൊതുസമ്മേളനങ്ങളും സംഘടിപ്പിക്കുന്നുണ്ട്.

ഗുരുദേവന്റെ ജന്മഗൃഹമായ ചെമ്പഴന്തി ശ്രീനാരായണഗുരുകുലത്തില്‍ ഇന്ന് വൈകുന്നേരം6. 30 ന് നടക്കുന്ന ജയന്തി മഹാസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. കടകംപള്ളി സുരേന്ദ്രന്‍ എം.എല്‍.എ അദ്ധ്യക്ഷത വഹിക്കും. ശ്രീനാരായണ ധര്‍മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ ജയന്തി സന്ദേശം നല്‍കും.


രാവിലെ ആറിന് വയല്‍വാരം വീട്ടില്‍ വിശേഷാല്‍ പൂജയും സമൂഹപ്രാര്‍ത്ഥനയും നടക്കും. 10 ന് ശ്രീനാരായണ ദാര്‍ശനിക സമ്മേളനം പ്രതിപക്ഷ നേതാവ് വി. ഡി. സതീശന്‍ ഉദ്ഘാടനം ചെയ്യും. ധര്‍മ്മസംഘം ട്രസ്റ്റ് മുന്‍ ജനറല്‍ സെക്രട്ടറി സ്വാമി ഋതംഭരാനന്ദ അദ്ധ്യക്ഷത വഹിക്കും.ഉച്ചയ്ക്കു ശേഷം 3ന് തിരുജയന്തി ഘോഷയാത്രയുടെ ഉദ്ഘാടനം മന്ത്രി വി. ശിവന്‍കുട്ടി നിര്‍വഹിക്കും.

വി.കെ. പ്രശാന്ത് എം.എല്‍.എ അദ്ധ്യക്ഷത വഹിക്കും. വൈകിട്ട് നാലിന് ഗുരുകുലത്തില്‍ നിന്നാരംഭിക്കുന്ന ജയന്തി ഘോഷയാത്ര ഉദയഗിരി, ജനതാറോഡ്, ചെല്ലമംഗലം, ചെക്കാലമുക്ക്, വെഞ്ചാവോട് വഴി ചെമ്പഴന്തി പോസ്റ്റോഫീസ് ജംഗ്ഷന്‍ വരെ പോയി ഗുരുകുലത്തില്‍ സമാപിക്കും.
4.30ന് ജയന്തി ഘോഷയാത്ര മഹാസമാധിയില്‍ നിന്നും പുറപ്പെടും. ശ്രീനാരായണഗുരുദേവന്‍ ശിവപ്രതിഷ്ഠ നടത്തിയ ചരിത്രപ്രസിദ്ധമായ അരുവിപ്പുറത്ത് മഠത്തിന്റെ ആഭിമുഖ്യത്തില്‍ നടക്കുന്ന ജയന്തി സമ്മേളനം രാവിലെ 11 ന് മന്ത്രി ജി.ആര്‍. അനില്‍ ഉദ്ഘാടനം നടത്തും.