തലസ്ഥാന ജില്ലയെ വീണ്ടും ആശങ്കയിലാക്കി നഗരത്തിലും ഗ്രാമ - മലയോര മേഖലകളിലും കനത്ത മഴ തുടരുന്നു. ശനിയാഴ്ചയും ഞായറാഴ്ചയും മഴയെത്തുടര്‍ന്ന് ഉണ്ടായ വെള്ളക്കെട്ട് മാറിവരുന്നതിന് ഇടയ്ക്കാണ് വീണ്ടും തിരുവനന്തപുരത്ത് കനത്ത മഴ ഉണ്ടായിരിക്കുന്നത്. നഗരത്തില്‍ ഒരു മണിക്കൂറിലേറെയായി കനത്ത മഴ തുടരുകയാണ്. ഇതിനെ തുടര്‍ന്ന് വിതുരയില്‍ വാമനപുരം നദി കരകവിഞ്ഞു. കൂടാതെ പൊഴിയൂരിലെ തീരദേശ മേഖലകളില്‍ കടലാക്രമണം രൂക്ഷമായിരിക്കുകയാണ്. അഗസ്ത്യ വനമേഖലയില്‍ ഉച്ചയ്ക്ക് തുടങ്ങിയ മഴ ഇപ്പോഴും തുടരുകയാണ്. അമ്പൂരി, വെള്ളറട മേഖലയില്‍ ഒരു മണിക്കൂറായി ഭേദപെട്ട ഇടിയോടു കൂടിയ മഴയുണ്ട് എന്നാണ് വിവരം.

അതേസമയം ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്. കേരള തീരത്ത് മണിക്കൂറില്‍ 40 മുതല്‍ 45 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 55 കിലോമീറ്റര്‍ വരെയും വേഗതയില്‍ ശക്തമായ കാറ്റിനും മോശം കാലാവസ്ഥയ്ക്കും സാദ്ധ്യതയുണ്ട്.

കൂടാതെ രാത്രി 11.30 വരെ 0.5 മുതല്‍ 1.8 മീറ്റര്‍ വരെ ഉയര്‍ന്ന തിരമാലയും കടലാക്രമണവും ഉണ്ടായേക്കുമെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു. കേരള തീരത്തും ലക്ഷദ്വീപ് പ്രദേശത്തും മത്സ്യബന്ധനത്തിന് പോകാന്‍ പാടില്ലെന്നും കര്‍ണാടക തീരത്ത് മത്സ്യബന്ധനത്തിന് തടസമില്ലെന്നും കേന്ദ്ര കാലാവസ്ഥ വകുപ്പ് അറിയിച്ചു.