തിരുവനന്തപുരത്ത് യുവതിയെ കുത്തിയതിനുശേഷം സ്വയം കഴുത്തറുത്ത് ആത്മഹത്യയ്ക്ക് ശ്രമിച്ച് യുവാവ്. തിരുവനന്തപുരം നേമത്താണ് സംഭവം നടന്നത്. നേമം സ്വദേശിനി രമ്യ രാജീവിനാണ് കുത്തേറ്റത്. ദീപക്ക് എന്ന യുവാവാണ് രമ്യയെ കുത്തിയതിനുശേഷം കഴുത്തറുത്ത് ആത്മഹത്യയ്ക്ക് ശ്രമിച്ചത്.

രമ്യയുടെ നില ഗുരുതരമെന്നാണ് സൂചനകള്‍. ഇരുവരും തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുകയാണ്. നഴ്സിംഗ് പഠനം പൂര്‍ത്തിയാക്കിയ രമ്യ നേമത്തുള്ള സൂപ്പര്‍ മാര്‍ക്കറ്റില്‍ ജോലി ചെയ്യുകയായിരുന്നു. രമ്യയും ദീപക്കും നാല് വര്‍ഷമായി പ്രണയത്തിലായിരുന്നുവെന്നാണ് സൂചനകള്‍.

ഇന്ന് രാവിലെ രമ്യയുടെ വീട്ടിലെത്തിയ ദീപക്ക് തന്നോടൊപ്പം ഇറങ്ങിവരാനായി ആവശ്യപ്പെട്ടു. ഇത് രമ്യ നിരസിച്ചതോടെ വീട്ടിലുണ്ടായിരുന്ന കത്തിയെടുത്ത് രമ്യയെ ആക്രമിക്കുകയായിരുന്നു. ശേഷം സ്വയം കഴുത്തറുക്കുകയും ചെയ്തു. ദീപക് അപകടനില തരണം ചെയ്തതായി സൂചനകളുണ്ട്. സംഭവത്തില്‍ നേമം പൊലീസ് കേസെടുത്ത് അന്വേഷണം തുടങ്ങി.