കൂട്ടായ്മയുടെ വിജയം.... നിലമ്പൂര്‍ ഉപതിരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി ആര്യാടന്‍ ഷൗക്കത്തിന് 11432 വോട്ടിന്റെ ഭൂരിപക്ഷത്തില്‍ വിജയം. 76493 വോട്ടുകള്‍ നേടിയാണ് യുഡിഎഫിനായി നിലമ്പൂര്‍ ഷൗക്കത്ത് തിരിച്ചുപിടിച്ചത്.

65,061 വോട്ടുകള്‍ നേടി എല്‍ഡിഎഫിന്റെ എം സ്വരാജ് രണ്ടാമതെത്തി. 19,946 വോട്ടുകള്‍ നേടി പി വി അന്‍വര്‍ നിര്‍ണായക ശക്തിയായി. എന്‍ഡിഎ സ്ഥാനാര്‍ത്ഥി മോഹന്‍ ജോര്‍ജ് 8706 വോട്ടുമായി നാലാം സ്ഥാനത്തായി.

ഒരു പതിറ്റാണ്ടിനുശേഷമാണ് നിലമ്പൂര്‍ യുഡിഎഫിന്റെ കയ്യിലെത്തുന്നത്. എട്ട് തവണ ആര്യാടന്‍ മുഹമ്മദ് ജയിച്ച മണ്ഡലമാണ് ഇനി മകന്‍ ഷൗക്കത്ത് ഭരിക്കുന്നത്. കൂട്ടായ്മയുടെ വിജയമാണ് ഇതെന്നാണ് യുഡിഎഫ് നേതാക്കള്‍ പ്രതികരിച്ചിരിക്കുന്നത്.

മണ്ഡലത്തിലുടനീളം യുഡിഎഫ് പ്രവര്‍ത്തകര്‍ വിജയാഘോഷം തുടങ്ങി.നിലമ്പൂര്‍ ഉപതിരഞ്ഞെടുപ്പിന്റെ ആദ്യഫലസൂചനകള്‍ വന്നുതുടങ്ങിയപ്പോള്‍ തന്നെ ആര്യാടന്‍ ഷൗക്കത്ത് ലീഡ് നേടിയിട്ടുണ്ടായിരുന്നു. യുഡിഎഫിന്റെ ശക്തികേന്ദ്രങ്ങളായ മൂത്തേടം, വഴിക്കടവ് പഞ്ചായത്തുകളില്‍ അന്‍വര്‍ നടത്തിയ മുന്നേറ്റം ഷൗക്കത്തിന്റെ കുതിപ്പിന് നേരിയ തടസം ഉണ്ടാക്കിയെങ്കിലും വിജയം ഉറപ്പിക്കുകയായിരുന്നു.

അതേസമയം, സ്വന്തം പഞ്ചായത്തായ പോത്തുകല്ലില്‍ പോലും എല്‍ഡിഎഫിന്റെ എം സ്വരാജിന് ലീഡുയര്‍ത്താന്‍ കഴിഞ്ഞില്ല. 800 വോട്ട് ലീഡ് നേടി യുഡിഎഫാണ് അവിടെയും മുന്നിലെത്തിയത്. കഴിഞ്ഞ തവണ ഇവിടെ 506 വോട്ടിന് എല്‍ഡിഎഫ് മുന്നിലായിരുന്നു. പോത്തുകല്‍ പഞ്ചായത്ത് ഭരിക്കുന്നത് എല്‍ഡിഎഫാണ്.