9 വര്‍ഷത്തെ കാത്തിരിപ്പിനൊടുവില്‍ ഒറ്റ പ്രസവത്തില്‍ ജനിച്ച 4 പേര് പ്ലസ്ടു പരീക്ഷയ്ക്കുള്ള അവസാനവട്ട തയാറെടുപ്പിലാണ്. അരൂക്കുറ്റി വടുതല പുത്തന്‍പുരയില്‍ പി.ജി. സുനില്‍ കുമാറിന്റെയും കെ.എം. രേഖയുടെയും മക്കളായ അനന്തകൃഷ്ണന്‍, ഗോപിക കൃഷ്ണന്‍, ഗോപീകൃഷ്ണന്‍, രാജ് കൃഷ്ണന്‍ എന്നിവരാണ് പരീക്ഷയ്ക്ക് ഒരുങ്ങുന്നത്. അരൂക്കുറ്റി വടുതല ജമാഅത്ത് എച്ച്എസ്എസിലെ വിദ്യാര്‍ഥികളാണ് നാല്‍വരും. ഗോപിക കൃഷ്ണന്‍, ഗോപീകൃഷ്ണന്‍, രാജ്കൃഷ്ണന്‍ എന്നിവര്‍ കംപ്യൂട്ടര്‍ സയന്‍സ് വിദ്യാര്‍ഥികളും അനന്തകൃഷ്ണന്‍ കൊമേഴ്‌സാണ് വിദ്യാര്‍ഥിയുമാണ്.

തുടര്‍പഠനത്തിന് അനന്തകൃഷ്ണന്‍ ബി.കോം താല്‍പര്യപ്പെടുമ്പോള്‍ മറ്റുള്ളവര്‍ ബി.ടെക് പഠനമാണ് ലക്ഷ്യമിടുന്നത്. 2008 മേയ് 17നാണ് ഇവര്‍ ജനിച്ചത്. 10–ാം ക്ലാസ് വരെ ഒരേ സ്‌കൂളിലും ഒരേ ക്ലാസിലുമാണ് പഠിച്ചത്. ജമാഅത്ത് എച്ച്എസ്എസില്‍ 10–ാം ക്ലാസ് പരീക്ഷ എഴുതിയതും ഒരുമിച്ചായിരുന്നു. പ്ലസ്ടുവില്‍ ഒരാള്‍ വിഷയം മാറിയപ്പോള്‍ ക്ലാസും മാറി. സുനില്‍ കുമാറിന്റെയും രേഖയുടെയും വിവാഹത്തിന് ശേഷം 9 വര്‍ഷത്തെ കാത്തിരിപ്പിനൊടുവിലാണ് നാല്‍വര്‍ സംഘത്തിന്റെ ജനനം.