മത്സ്യബന്ധനത്തിനിടെ നടുക്കടലിൽ എഞ്ചിൻ തകരാറിലായതിനെ തുടർന്ന് ബോട്ട് അപകടത്തിൽപ്പെട്ടു. കൊല്ലം കാവനാട് സ്വദേശി ശരവണൻറെ ഉടമസ്ഥതയിലുള്ള 'വേളാങ്കണ്ണി മാത' എന്ന ബോട്ടാണ് അപകടത്തിൽപ്പെട്ടത്.

കഴിഞ്ഞ രാത്രി പന്ത്രണ്ടോടെ നീർക്കുന്നം പടിഞ്ഞാറ് മത്സ്യബന്ധനത്തിനിടെയാണ് എഞ്ചിൻ തകരാറിലായത്. ഇതോടെ നിയന്ത്രണം തെറ്റിയ ബോട്ട് കരയ്ക്കടിയുകയായിരുന്നു. ബോട്ടിലുണ്ടായിരുന്ന പന്ത്രണ്ടോളം തൊഴിലാളികൾ അത്ഭുതകരമായി നീന്തി രക്ഷപ്പെടുകയും ചെയ്തു.

ബോട്ടിൻറെ അടിഭാഗം പൂർണമായി തകർന്ന് വെള്ളം കയറിയതിനാൽ മാറ്റാൻ കഴിയാത്ത സ്ഥിതിയാണുള്ളത്. മറ്റൊരു ബോട്ടിൻറെയും ജെസിബികളുടെയും സഹായത്താൽ രക്ഷാപ്രവർത്തനം പുരോഗമിക്കുന്നു. ബോട്ടിലുണ്ടായിരുന്ന നാല് ലക്ഷത്തിൽപ്പരം രൂപയുടെ മത്സ്യവും അപകടത്തിൽ നഷ്ടപ്പെട്ടു. രണ്ടു വർഷം മുൻപാണ് ഉടമ ഈ ബോട്ട് നീറ്റിലിറക്കിയത്. ബോട്ട് തകർന്നതോടെ നിരവധി കുടുംബങ്ങളുടെ ഉപജീവനമാർഗം കൂടിയാണ് നിലച്ചിരിക്കുന്നത്.