ഞായറാഴ്ച ഗുരുവായൂരിൽ കല്യാണമേളം... ചിങ്ങമാസത്തിലെ ആദ്യത്തെ ഞായറാഴ്ചയായ 23ന് ഇതുവരെ ബുക്ക് ചെയ്ത വിവാഹങ്ങൾ 429 ആയി. രണ്ട്‌ ദിവസംകൂടിയുള്ളതിനാൽ വിവാഹങ്ങളുടെ എണ്ണം വർധിക്കുമെന്നാണ് കണക്കുകൂട്ടലുകളുള്ളത്. ഇതിനകം ആഗസ്ത് 30 ന് 342 ഉം സെപ്തംബർ 13ന് 328 ഉം വിവാഹങ്ങൾ ബുക്ക്‌ ചെയ്തിട്ടുണ്ട്‌.

2024 ചിങ്ങമാസത്തിലെ അവസാന ഞായറാഴ്ചയായിരുന്ന സെപ്തംബർ 8നാണ്‌ ഇതിനുമുമ്പത്തെ റെക്കോർഡ്. അന്ന് നടന്നത് 334 വിവാഹങ്ങളായിരുന്നു. വിവാഹത്തിന് പുറമെ ദർശനത്തിനും കുട്ടികളുടെ ചോറൂണിനും തുലാഭാരത്തിനുമായി എത്തുന്നവരുടെ തിരക്കു കൂടിയാകുന്നതോടെ വൻ ജനാവലിയായിരിക്കും ഗുരുവായൂരിലെത്തുകയെന്ന് ഉറപ്പായി. തടസ്സമില്ലാതെ ക്ഷേത്ര ദർശനത്തിനും വിവാഹ ചടങ്ങുകൾ ഭംഗിയായി നടത്തുന്നതിനും പൊലീസ് സഹകരണത്തോടെ ദേവസ്വം ക്രമീകരണങ്ങൾ സജ്ജമാക്കിയിട്ടുണ്ട്.

സമയബന്ധിതമായി പൂർത്തിയാക്കാനായി 23, 30, സെപ്‌തംബർ 13 തീയതികളിൽ പുലർച്ചെ നാലു മുതൽ കല്യാണങ്ങൾ നടത്തും. താലികെട്ടിനായി 6 മണ്ഡപങ്ങൾ സജ്ജമാക്കും. താലികെട്ട് ചടങ്ങ് നിർവഹിക്കാനായി ക്ഷേത്രം കോയ്മമാരെ വിവാഹ മണ്ഡപത്തിലേക്ക് അധികമായി നിയോഗിക്കും. മണ്ഡപത്തിന് സമീപം മംഗളവാദ്യസംഘത്തെയും നിയോഗിക്കുന്നതാണ്. ക്ഷേത്രം കിഴക്കേ നട പൂർണമായും വൺവേ ആക്കും. ഒരു ദിശയിലേക്ക് മാത്രം ആളുകളെ കടത്തിവിട്ട് തിരക്ക് നിയന്ത്രിക്കുകയും ചെയ്യും.