പിണറായി വിജയന്റെ രാഷ്ട്രീയ പൊതുപ്രവർത്തനത്തിൽ അവസാനം ആണിയും അടിക്കപ്പെട്ടിരിക്കുന്നു. പണാപഹരണത്തിനും കോഴയ്ക്കും ആദ്യം പുറത്താകുന്ന സിപിഎം മുഖ്യമന്ത്രി എന്ന ദുഷ്‌പേര് സിപിഎമ്മിന് സമ്മാനിച്ചിട്ടാവും പിണറായി വിജയൻ പ്രതിപക്ഷ നേതൃസ്ഥാനവും എംഎൽഎ സ്ഥാനവും നഷ്ടമാവുക. അഴിമതി നടത്തിതായി കോടതി വിധിച്ചാൽ നാലു വർഷം വരെ തടവു ലഭിക്കാവുന്ന അതീവ ഗുരുതരമായ കുറ്റമായി ഇത് മാറുകയും ചെയ്യും.

സിഎംആർഎൽ മാസപ്പടി കേസിൽ ഇ.ഡിയുടെ ശുപാർശ പ്രകാരം മുൻ മുഖ്യമന്ത്രി പിണറായി വിജയനും മുൻമന്ത്രി മുഹമ്മദ് റിയാസിനും എതിരെ അന്വേഷണം പ്രഖ്യാപിച്ച് സർക്കാർ. ഇക്കാര്യത്തിൽ ആഭ്യന്തരമന്ത്രി രമേശ് ചെന്നിത്തല സംസ്ഥാന പൊലീസ് മേധാവിക്കു നിർദേശം നൽകിയിരിക്കുന്നത് മുഖ്യമന്ത്രി വിഡി സതീശനും രമേശ് ചെന്നിത്തലയും തമ്മിൽ കൂടിക്കാഴ്ച നടത്തിയ ശേഷമാണ്. പിണറായി വിജയനു മുൻപേ കുരുക്കുവീഴുന്നതും കൈയിൽ വിലങ്ങുവീഴുന്നതും മകൾ വീണയ്ക്കും മരുമകനും എംഎൽഎയുമായ റിയാസിനുമായിരിക്കുന്നു.

ഇതിനിടെ സി.എം.ആർ.എൽ.-എക്‌സാലോജിക് ദുരൂഹപണമിടപാടുകേസിൽ പ്രതിപക്ഷനേതാവ് പിണറായി വിജയന്റെ മകൾ വീണയുടെ സ്വത്ത് ഇ.ഡി. കണ്ടുകെട്ടു എന്നതാണ് പാർട്ടിക്കു കളങ്കമുണ്ടാക്കുന്ന മറ്റൊരു വാർത്ത. ഇ.ഡി. ഓഫീസിൽ ഇതിനായി നടപടികൾ തുടങ്ങിക്കഴിഞ്ഞു. കേസിൽ കുറ്റപത്രം സമർപ്പിക്കുന്നതിനും അറസ്റ്റു ചെയ്യുന്നതിനും മുന്നോടിയായാണിത്. നേരത്തേ വീണയുൾപ്പെടെയുള്ള പ്രതികളുടെ 29.02 കോടിയുടെ സ്വത്ത് മരവിപ്പിച്ചിരുന്നു. ടി. വീണയുടെ പേരിൽ ഫ്‌ളാറ്റ് ഉണ്ടെന്നാണ് ഇ.ഡി. കണ്ടെത്തൽ. ഇതെവിടെയാണെന്ന് അന്വേഷണസംഘം വെളിപ്പെടുത്തിയിട്ടില്ല. എന്നാൽ ഇത് തിരുവനന്തപുരത്തോ കോഴിക്കോട്ടോ ആണെന്നാണ് സൂചനകൾ.

രണ്ടുമാസം മുൻപ് ഇ.ഡി. ഉദ്യോഗസ്ഥസംഘം കണ്ണൂരിലെ പിണറായി, പാതിരിയാട് വില്ലേജുകളിൽ പരിശോധന നടത്തിയിരുന്നു. പിണറായി വില്ലേജിൽ പിണറായി-പാറപ്രം റോഡിൽ വീണയുടെ പേരിൽ 80 സെന്റ് സ്ഥലം ഉണ്ടെന്നാണ് കണ്ടെത്തൽ. പാതിരിയാട് വില്ലേജിൽ പിണറായി വിജയന്റെ വീടിനോട് ചേർന്നുള്ള സ്ഥലവും അന്ന് ഇ.ഡി. സംഘം പരിശോധിച്ചിരുന്നു. ഇതും വീണയുടെ പേരിലാണെന്നാണ് സൂചന. ഇ.ഡി. മരവിപ്പിച്ച സ്വത്തിൽ വീണ പങ്കാളിയായ ലേക്കർ ഇന്ത്യ കോർപ്പറേഷന്റെ 15.57 ലക്ഷവും എക്സാലോജിക്കിന്റെ 27,585 രൂപയുമുണ്ട്. കഴിഞ്ഞയാഴ്ച സി.എം.ആർ.എൽ. കേസുമായി ബന്ധപ്പെട്ട് മുൻമന്ത്രി പി.എ. മുഹമ്മദ് റിയാസിന്റെ സുഹൃത്ത് മുഹമ്മദ് ഫെബീഷിന്റെ ബാങ്ക് ലോക്കറിൽനിന്ന് ഒരു കിലോഗ്രാമിലേറെ സ്വർണാഭരണങ്ങളും ഇ.ഡി. കണ്ടെത്തിയിരുന്നു. ഇതും മരവിപ്പിച്ചിട്ടുണ്ട്. കണ്ടുകെട്ടലിന് ഇ.ഡി. ഉന്നതരുടെ അനുമതിക്കായി അതിവേഗമാണ് ഫയൽ നീക്കങ്ങൾ.

വീണ കരിമണൽ കമ്പനി ഉൾപ്പെടെ അനവധി നിരവധി പേരിൽ നിന്ന് മാസപ്പടിയും കോഴയും വാങ്ങി സ്വദേശത്തും വിദേശത്തും നിക്ഷേപം നടത്തിയെന്നതിൽ സംശയമില്ല. അന്വേഷണ സംഘം വ്യക്തമായ തെളിവുകൾ ഇതിനായി കണ്ടെത്തി കോടതിയിൽ നിരത്തുകയും ചെയ്യും. സിഎംആർഎല്ലിൽനിന്നു മകൾ വീണ വഴി മുഖ്യമന്ത്രിയായിരുന്ന പിണറായി വിജയൻ കൈക്കൂലി വാങ്ങിയെന്നും ഇതിന്റെ അടിസ്ഥാനത്തിൽ അഴിമതി നിരോധന നിയമപ്രകാരം കേസെടുക്കണമെന്നും ചൂണ്ടിക്കാട്ടിയാണ് ഇ.ഡി സംസ്ഥാന പൊലീസ് മേധാവിക്കു കത്തു നൽകിയത്.

പിണറായിക്കും മുഹമ്മദ് റിയാസിനും വീണയ്ക്കും എതിരെ കേസെടുക്കണമെന്നായിരുന്നു ആവശ്യം. ഡിജിപി ഈ കത്ത് സർക്കാരിനു കൈമാറിയതോടെ നിയമോപദേശം തേടാനായിരുന്നു സർക്കാർ തീരുമാനം. ഇ.ഡിയുടെ കത്തിന്റെ അടിസ്ഥാനത്തിൽ അന്വേഷണം നടത്തുന്നതിൽ തെറ്റില്ലെന്ന് നിയമോപദേശം ലഭിച്ചതിന്റെ അടിസ്ഥാനത്തിലാണ് സർക്കാർ ഇപ്പോൾ അന്വേഷണം പ്രഖ്യാപിച്ചിരിക്കുന്നത്. ആദ്യഘട്ടത്തിൽ എഫ്ഐആർ റജിസ്റ്റർ ചെയ്യാതെയുള്ള അന്വേഷണം ആവും നടത്തുകയെന്നാണു റിപ്പോർട്ട്. കള്ളപ്പണം വെളുപ്പിക്കൽ തടയൽ നിയമപ്രകാരം കേസിൽ ഇ.ഡി നടത്തിയ അന്വേഷണത്തിലാണ് സിഎംആർഎല്ലിൽനിന്നു വീണ വഴി പിണറായി വിജയൻ പണം കൈപ്പറ്റിയെന്നു കണ്ടെത്തിയത്.

കൈക്കൂലിപ്പണം ഹവാല ഇടപാടുകൾ വഴി വീണയും റിയാസും വിദേശത്തേക്കു കടത്തിയെന്നും ഇ.ഡി കണ്ടെത്തി. വീണയുടെ കൈപ്പടയിൽ എഴുതിയ കുറിപ്പുകളും ഇ.ഡി കണ്ടെത്തിയിരുന്നു. മുൻമന്ത്രി മുഹമ്മദ് റിയാസ് സുഹൃത്തുക്കളുടെ സഹായത്തോടെയാണ് ഹവാല ഇടപാട് നടത്തിയതെന്നാണ് ഇ.ഡി വ്യക്തമാക്കുന്നത്. ഈ സാഹചര്യത്തിലാണ് അഴിമതി നിരോധന നിയമപ്രകാരം കേസെടുക്കണമെന്ന് ആവശ്യപ്പെട്ട് സംസ്ഥാന പൊലീസ് മേധാവിക്ക് ഇ.ഡി. കത്തു നൽകിയത്. പിണറായി വിജയനെ വെള്ളപൂശാനായി കൈപ്പുസ്തകം തയാറാക്കി വീടുകളിൽ വിതരണം ചെയ്യാൻ സിപിഎമ്മിലെ പിണറായി പക്ഷം തയാറായി വരുമ്പോഴാണ് ഇപ്പോഴത്തെ ഇരുട്ടടി. കൈപ്പുസ്തകം ഇറങ്ങിവരുന്നതിനു മുൻപുതന്നെ പിണറായി അകത്താകുമെന്നതാണ് നിലവിലെ സാഹചര്യം.