സങ്കടക്കാഴ്ചയായി... പ്രവാസി മലയാളി യുവാവ് ഹൃദയാഘാതം മൂലം റിയാദിൽ അന്തരിച്ചു. എറണാകുളം ആലുവ കൊമ്പറ നോച്ചിമ തയ്യിൽ വീട്ടിൽ ഷമീർ (36) ആണ് മരിച്ചത്. റിയാദിൽ ഡ്രൈവറായി ജോലി ചെയ്തു വന്നിരുന്ന ഷമീർ കഴിഞ്ഞ ദിവസം ഉച്ച ഭക്ഷണത്തിന് ശേഷമുള്ള വിശ്രമസമയത്ത് ഉറങ്ങാൻ കിടന്നതായിരുന്നു.

പതിവ് സമയത്ത് കാണാതായതിനെ തുടർന്ന് വൈകുന്നേരത്തോടെ റൂമിലെ സുഹൃത്തുക്കൾ തിരക്കിയെത്തിയപ്പോൾ അബോധാവസ്ഥയിൽ കണ്ടെത്തുകയായിരുന്നു. ഒപ്പമുള്ളവർ വിവരമറിയിച്ചതിനെ തുടർന്ന് ഉടൻ സ്ഥലത്തെത്തിയ റെഡ് ക്രെസന്റ് ആരോഗ്യവിഭാഗം അടിയന്തിര ചികിത്സ നൽകി റിയാദ് കിങ് ഫൈസൽ ആശുപത്രിയിലെ അത്യാഹിത വിഭാഗത്തിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. മറിയുമ്മ, പരേതനായ ലത്തീഫ് എന്നിവരാണ് മാതാപിതാക്കൾ. ഭാര്യ: മുർഷിദ.