സംസ്ഥാനത്തെ പരിസ്ഥിതി ലോല പ്രദേശ ( ഇഎസ്എ) പട്ടികയില്‍ നിന്നും ജനവാസ മേഖലയെ ഒഴിവാക്കണമെന്ന് സര്‍ക്കാര്‍. പരിസ്ഥിതി ലോല മേഖലാ വിസ്തൃതി കുറയ്ക്കണം.

തോട്ടങ്ങളെയും കൃഷി സ്ഥലങ്ങളെയും ജനവാസ മേഖലകളെയും പൂര്‍ണമായും ഒഴിവാക്കിക്കൊണ്ടും, വന മേഖലകളില്‍ മാത്രം ഇഎസ്എ നിര്‍ണയിച്ചുകൊണ്ടും അന്തിമ വിജ്ഞാപനം പുറപ്പെടുവിക്കണമെന്നാണ് സംസ്ഥാന സര്‍ക്കാരിന്റെ ആവശ്യമെന്ന് മന്ത്രി സണ്ണി ജോസഫ് വ്യക്തമാക്കി. കേരളത്തിന്റെ പരിസ്ഥിതി ലോല മേഖല 9993.7 ചതുരശ്ര കിലോമീറ്ററാണ്. ഇതില്‍ 9,107 ചതുരശ്ര കിലോമീറ്റര്‍ വനമേഖലയും 886.7 ചതുരശ്ര കിലോമീറ്റര്‍ വനേതര മേഖലയുമാണ്. 2014 മുതല്‍ 2026 ജൂലൈ 27 വരെ പ്രസിദ്ധീകരിച്ചിട്ടുള്ള ഏഴു കരട് വിജ്ഞാപനങ്ങളിലും കേരളത്തിന്റെ ഇഎസ്എ, കസ്തൂരിരംഗന്‍ റിപ്പോര്‍ട്ട് പ്രകാരം പ്രസിദ്ധീകരിച്ച 13,108 ച. കി. മി. അല്ലെന്ന് മന്ത്രി പറഞ്ഞു. ഇതില്‍ നിന്നും ഇഎസ്എ 9993 ആക്കി കുറയ്ക്കാന്‍ കേരളത്തിന് ഇതിനോടകം കഴിഞ്ഞിട്ടുണ്ട്.

വനേതര പ്രദേശമെന്ന് വിജ്ഞാപനത്തില്‍ പറയുന്ന 886.7 ചതുരശ്ര കിലോമീറ്റര്‍ കൂടി ഒഴിവായിക്കിട്ടിയാല്‍ കേരളത്തിന്റെ അവശേഷിക്കുന്ന ആശങ്ക പൂര്‍ണമായി പരിഹരിക്കപ്പെടും. ജനവാസമേഖലകളെയും തോട്ടങ്ങളെയും കൃഷിയിടങ്ങളെയും ഒഴിവാക്കണമെന്നാണ് സര്‍ക്കാരിന്റെ വാദം.
എന്നാല്‍ കേരളത്തിന്റെ ഇഎസ്എ കരട് വിജ്ഞാപനത്തിലുള്ള 9993.7 ചതുരശ്ര കിലോമീറ്ററില്‍ നിന്നും കുറച്ച് 8590.69 ചതുരശ്ര കിലോമീറ്ററായി നിര്‍ണയിക്കണമെന്നാണ് കേരള സര്‍ക്കാര്‍ ആവശ്യം ഉന്നയിക്കുന്നത്. ജനവാസ മേഖകളെയും തോട്ടങ്ങളെയും ഒഴിവാക്കി, വനമേഖലയില്‍ മാത്രം ഇഎസ്എ നിര്‍ണയിച്ചുകൊണ്ട് അന്തിമ വിജ്ഞാപനം പുറപ്പെടുവിക്കണമെന്നുമാണ് സര്‍ക്കാര്‍ ആവശ്യപ്പെടുന്നത്.