വന്യമൃഗ ആക്രമണങ്ങള്‍ മൂലം ദുരിതമനുഭവിക്കുന്ന കര്‍ഷകര്‍ക്ക് ആശ്വാസകരമായ പ്രഖ്യാപനങ്ങളുമായി വനംമന്ത്രി ഷിബു ബേബി ജോണ്‍. വന്യജീവി സംഘര്‍ഷത്തില്‍ ജീവന്‍ നഷ്ടപ്പെടുന്നവര്‍ക്കുള്ള നഷ്ടപരിഹാര തുക 14 ലക്ഷം രൂപയില്‍ നിന്ന് 21 ലക്ഷം രൂപയായി ഉയര്‍ത്തുമെന്നും കൃഷി നാശത്തിനുള്ള നഷ്ടപരിഹാരം ഇരട്ടിയാക്കുമെന്നും മന്ത്രി അറിയിച്ചു. യുഡിഎഫ് പ്രകടനപത്രികയില്‍ 50 ശതമാനം വര്‍ധനവാണ് വാഗ്ദാനം ചെയ്തിരുന്നതെങ്കിലും നിലവിലെ സാഹചര്യം കണക്കിലെടുത്താണ് നഷ്ടപരിഹാര തുക 100 ശതമാനം വര്‍ധിപ്പിക്കാന്‍ തീരുമാനിച്ചതെന്ന് മന്ത്രി വ്യക്തമാക്കി.

2015ലാണ് ഇതിനുമുമ്പ് വന്യമൃഗ ശല്യത്തിനുള്ള നഷ്ടപരിഹാരം വര്‍ധിപ്പിച്ചത്. അതിനുശേഷം തുകയില്‍ മാറ്റമൊന്നും ഉണ്ടായിരുന്നില്ല. സര്‍ക്കാറിന്റെ 'നക്കാപ്പിച്ച'ക്ക് വേണ്ടി കര്‍ഷകര്‍ക്ക് കാത്തിരിക്കേണ്ടി വരുന്നു എന്ന തന്റെ മുന്‍ പ്രസംഗത്തിലെ പരാമര്‍ശത്തില്‍ മന്ത്രി വ്യക്തത വരുത്തി. കര്‍ഷകര്‍ക്ക് നിലവില്‍ ലഭിക്കുന്ന തുക തികച്ചും അപര്യാപ്തമാണെന്ന അര്‍ത്ഥത്തിലാണ് താന്‍ 'നക്കാപ്പിച്ച' എന്ന് പ്രയോഗിച്ചതെന്ന് അദ്ദേഹം പറഞ്ഞു. കാത്തിരുന്ന് മടുത്ത് നഷ്ടപരിഹാരം വേണ്ടെന്ന് വെക്കേണ്ടി വരുന്ന കര്‍ഷകരുടെ കണക്കുകളാണ് തന്റെ മുന്നിലേക്ക് എത്തിയത്. ആ സ്ഥിതിക്ക് മാറ്റം വരുത്താനാണ് സര്‍ക്കാര്‍ ശ്രമിക്കുന്നതെന്നും മന്ത്രി വ്യക്തമാക്കി.

വന്യജീവിശല്യം വളരെ സങ്കീര്‍ണമായ ഒരു വിഷയമാണെന്നും വിവിധ വകുപ്പുകള്‍ ഒരുമിച്ച് നിന്ന് പ്രവര്‍ത്തിച്ചാല്‍ മാത്രമേ ഇത് ഫലപ്രദമായി കൈകാര്യം ചെയ്യാന്‍ സാധിക്കൂ എന്നും മന്ത്രി ഷിബു ബേബി ജോണ്‍ ചൂണ്ടിക്കാട്ടി. വന്യമൃഗങ്ങളെ വനത്തിനകത്ത് തന്നെ നിലനിര്‍ത്താനുള്ള പ്രായോഗിക ശ്രമങ്ങള്‍ തുടരുമെന്നും അദ്ദേഹം കൂട്ടിച്ചേര്‍ത്തു.